Yezu Krista: Layidu tara Masiya min koo la

LAYIDU tun tara Kisibaga min koo la, o ye Masiya ye. Walisa k’an dɛmɛ k’a faranfasi k’a lɔn, Jehova Ala tɛmɛna kira caaman fɛ ka kunnafoniw di a koo la Bibulu kɔnɔ. U kumana a woloni, a ka cidenya baara ani a ka saya koo la. O kiraya kumaw bɛɛ dafara Yezu Krista kan. U pereperelatigɛra ani u bɛɛ ye tiɲɛn ye. Kabako lo dɛ! An ka ɲɛyirali dɔw lajɛ minw ɲɛsinna Masiya woloni n’a denmisɛnya ma.

Kira Ezayi tun kɔnna k’a fɔ ko Masiya tun bena kɛ masacɛ Dawuda bɔnsɔn dɔ ye (Ezayi 9:6). Tiɲɛn na, Yezu wolola Dawuda buruju lo la.—Matiyo 1:1, 6-17.

Ala ka kira wɛrɛ, Mise, tun kɔnna k’a fɔ ko o deen tun bena kɛ kuntigi ye ani a tun bena wolo “Bɛtilehɛmu Efarata.” (Mise 5:1). Yezu wolotuma na, dugu fila tun be weele ko Bɛtilehɛmu, Israɛl jamana kɔnɔ. Kelen tun be jamana saheli fan fɛ Nazarɛti dugu gɛrɛ fɛ ani tɔɔ kelen tun ka surun Zeruzalɛmu la Zuda mara la. Galen, Bɛtilehɛmu min tun ka surun Zeruzalɛmu la, o tun be weele ko Efarata. Yezu wolola o dugu lo kɔnɔ tigitigi i ko kira tun kɔnna k’a fɔ cogo min na!—Matiyo 2:1.

Kira wɛrɛ tun kɔnna k’a fɔ Bibulu kɔnɔ ko Ala Dencɛ tun bena “wele ka bɔ Misira.” Yezu denmisɛn tuma na, u tagara n’a ye Misira jamana na. Masacɛ Erɔdi sanin kɔ, u kɔsegira n’a ye: o ye kiraya kuma dafa.—Oze 11:1; Matiyo 2:15, ABM.

Gafe nin ɲɛɛ 200 ka tabulo la, vɛrise dɔw sɛbɛra kumaden nunu jukɔrɔ: “Kiraya kuma.” O vɛrisew be Masiya ka koow pereperelatigɛ. I ka u suma ni vɛrisew ye minw sɛbɛra kumaden nunu jukɔrɔ: “A dafani.” O la, i ka limaniya barika bena bonya Ala ka Kuma koo la.

O vɛrisew lajɛtɔ, i kana ɲinɛ ko u dɔw ye kiraya kumaw ye ani ko u sɛbɛra saan kɛmɛ caaman sanni Yezu yɛrɛ ka wolo. Yezu y’a fɔ ko: “Ko minnu sɛbɛnna ne ko la Musa ka sariya ni kiraw ka kitabuw ni Zaburuw la, wajibi don olu bɛɛ ka dafa.” (Luka 24:44, ABM ). I be se k’a sɛgɛsɛgɛ i ka Bibulu kɔnɔ k’a ye ko u bɛɛ dafara. Foyi m’u jɛn!