Koow ɲɛnabɔla jɛnkulu ka bataki

E min be Jehova kanu:

“Yezu y’a fɔ ko: “Aw bena tiɲɛ lɔn, o tiɲɛ le bena aw kɛ hɔrɔnw ye.” (Zan 8:32) Nin ye jijali kuma ye dɛ! An be “laban tuma” na min ka gwɛlɛ ani nanbarakow ni ngalonkow ka ca (2 Timote 3:1). O bɛɛ n’a ta, mɔgɔ be se ka tiɲɛn lɔn. I hakili b’a la tuma min na i ye tiɲɛn lɔn i ko a ɲɛfɔra Ala ka Kuma kɔnɔ cogo min na wa? O kɛra ɲagaliba ye i fɛ!

A kɔrɔtanin lo ka tiɲɛn tigitigi lɔn ani k’a kofɔ mɔgɔw ye tuma o tuma. Nka a kɔrɔtanin lo fana an k’a sira tagama. Walisa k’o kɛ, fɔɔ an ka to Ala ka kanuya la. O kɔrɔ ko di? An b’o jaabili sɔrɔ Yezu ka kumaw na a ye minw fɔ suu laban na sanni a ka sa. A y’a fɔ a ka ciden kantigimanw ye ko: “N’aw be ne ka ciiw bato, aw fana be to ne ka kanuya la, i n’a fɔ ne be n Faa ka ciiw bato cogo min na ka to a ka kanuya la.”—Zan 15:10.

An k’a kɔrɔsi ko Yezu tora a Faa Ala ka kanuya la sabu a y’a ka ciiw bato. An fana ka kan k’o kelen lo kɛ bi. N’an b’a fɛ ka to Ala ka kanuya la, fɔɔ an ka tiɲɛn sira tagama loon o loon. Yezu y’a fɔ o suu kelen na ko: “Sisan aw y’o koo lɔn, n’aw y’o koo nin kɛ, aw dagamuna.”—Zan 13:17.

An jigi b’a la sɔbɛ la ko gafe nin bena i dɛmɛ i ka to ka tiɲɛn sira tagama ani o la, i ka to “Ala ka kanuya la . . . fo ɲɛnamaya banbali la.”—Zude 21, ABM.