Furusa ni farali, Bibulu be min fɔ o koo la

Furuɲɔgɔnmaw ye dajuru min ta u ka furu kun kɔrɔ, Jehova b’a ɲini u fɛ u k’o labato. Tuma min na Jehova ye cɛɛ fɔlɔ ni muso fɔlɔ jɛn ka kɛ kelen ye furu kɔnɔ, a y’a fɔ ko: ‘Cɛɛ bena nɔrɔ a muso la, u fila be jɛn ka kɛ kelen ye.’ Kɔfɛ, Yezu Krista segira o kuma kelen kan, ani a y’a fara a kan ko: “Ala ye min jɛn ka kɛ kelen ye, mɔgɔ si kana o faran.” (Zɛnɛsi 2:24; Matiyo 19:3-6). O la, Jehova ni Yezu be furu jati furututuko ye cɛɛ ni muso cɛ fɔɔ ni u la kelen sara (1 Korɛntikaw 7:39). Komi furu ye labɛn senuman ye, furusa man kan ka jati tulonko ye. Furusa minw basiginin tɛ Bibulu kan, Jehova b’u kɔniya tiɲɛn na.—Malasi 2:15, 16.

Bibulu ka fɔta la, mun lo be furusa daga? An kɔni b’a lɔn ko Jehova be ɲamɔgɔya ni jatɔya kɔniya (Zɛnɛsi 39:9; 2 Samuyɛli 11:26, 27; Zaburuw 51:6). Jatɔya ka gwo Jehova ye fɔɔ a be sɔn o ka kɛ furusa sababu ye. (Kalansen 9nan, dakun 7nan b’a ɲɛfɔ jatɔya ye fɛɛn min ye.) Jehova be sira di furuɲɔgɔn jalakibali ma a k’a latigɛ n’a bena to wala n’a bena a ka furu sa n’a furuɲɔgɔn ye o min y’a janfa (Matiyo 19:9). O la, ni furuɲɔgɔn jalakibali y’a latigɛ k’a ka furu sa, o furusa tɛ koo jugu ye Jehova ɲɛɛ kɔrɔ. O wagati kelen na, kerecɛn kafo tɛ mɔgɔ si jija a k’a ka furu sa. Koo dɔw be se ka furuɲɔgɔn jalakibali lasun a k’a latigɛ ka to n’a furuɲɔgɔn ye o min y’a janfa, sanko n’a nimisara sɔbɛ la a ka jurumu na. A laban, joo be minw fɛ k’u ka furu sa ka kɛɲɛ ni Bibulu ka fɔta ye, olu yɛrɛ lo ka kan k’o koo latigɛ ani ka lɔ n’a nɔfɛkow ye.—Galatikaw 6:5.

Ni gwɛlɛya kɛrɛnkɛrɛnnin dɔw b’u kan, kerecɛn dɔw b’a latigɛ ka faran wala k’u ka furu sa hali n’u furuɲɔgɔn ma jatɔya kɛ. O koo ɲɔgɔn na, Bibulu b’a fɔ ko “a furubali ka to, wala a ka kɔsegin” a furuɲɔgɔn ma (1 Korɛntikaw 7:11, ABM ). Sira ma di o kerecɛn ɲɔgɔn ma a ka tagamaɲɔgɔnya kɛ ni mɔgɔ wɛrɛ ye furu kama (Matiyo 5:32). An ka gwɛlɛya kɛrɛnkɛrɛnnin dɔw lajɛ, o minw na furuɲɔgɔn dɔw y’a ye ko a daganin lo u ka faran ɲɔgɔn na.

Ka ban ka denbaya ladon. Dɛsɛ be se ka denbaya dɔ sɔrɔ fɔɔ dumuni ni fɛɛrɛbɔ n’a ɲɔgɔnnaw sɔrɔko yɛrɛ ye baara ye sabu furucɛ banna k’a janto u la k’a sɔrɔ see b’a ye. Bibulu b’a fɔ ko: “Mɔgɔ o mɔgɔ te janto a ka somɔgɔw la, o tigi banna lanaya la. Mɔgɔ min ma la Ala la, ale yɛrɛ ka fisa n’a ye.” (1 Timote 5:8). N’o tigi banna k’a sɔɔn yɛlɛma, a muso be se k’a latigɛ ka faran a cɛɛ la ka kɛɲɛ ni sariya ye walisa ka se k’a janto a yɛrɛ n’a deenw na. Ayiwa, n’o ye kerecɛn dɔ jalaki ko a tɛ a janto a somɔgɔw la, kafo ka diinan mɔgɔkɔrɔw ka kan k’o koo sɛgɛsɛgɛ koɲuman. Ka ban k’i janto i somɔgɔw la, o be se ka kɛ sababu ye i ka gwɛn ka bɔ kafo kɔnɔ.

Fariya kojugu. Mɔgɔ dɔ be se ka fariya fɔɔ k’a furuɲɔgɔn ka kɛnɛya wala a niin yɛrɛ bila farati la. N’o furuɲɔgɔn fariman ye kerecɛn ye, kafo ka diinan mɔgɔkɔrɔw ka kan ka sɛgɛsɛgɛri kɛ o koo la. Mɔgɔ be se ka gwɛn ka bɔ kafo kɔnɔ n’a tigi be dusubaya kɛ, wala n’a ka teli ka fariyakow kɛ.—Galatikaw 5:19-21.

Ni Alako be faratiba la. A be se ka kɛ ko mɔgɔ dɔ b’a ɲini tuma o tuma k’a furuɲɔgɔn bali ka tiɲɛn batoli kɛ. A yɛrɛ be se k’a ɲini k’a furuɲɔgɔn waajibiya a ka Ala ka sariyaw tiɲɛ cogo dɔ la. O koo ɲɔgɔn na, furuɲɔgɔn min ka Alakow be farati la, ale be se k’a latigɛ ko fɛɛrɛ kelen min fɛ a be se ka “Ala kan minɛ ka tɛmɛn mɔgɔw ta kan,” o ye ka faran a furuɲɔgɔn na ka kɛɲɛ ni sariya ye.—Kɛwaliw 5:29, ABM.

An ye gwɛlɛya kɛrɛnkɛrɛnnin minw lajɛ, n’o ɲɔgɔnna wɛrɛw be furuɲɔgɔn jalakibali dɔ kan, mɔgɔ si man kan k’a jija a ka faran wala a ka to n’a furuɲɔgɔn ye. Diinan mɔgɔkɔrɔw ani teri minw kɔgɔra Alako ta fan fɛ, olu be se ka dɛmɛ kɛ ani ka ladili dɔw di ka bɔ Bibulu kɔnɔ. Nka, koo minw be yen cɛɛ n’a muso cɛ, u tɛ se k’u bɛɛ lɔn. Jehova kelenpe be se k’u lɔn. Kerecɛn min b’a ka furu kɔnɔ gwɛlɛyaw lakali k’a dama tɛmɛ walisa ka faran a cɛɛ wala a muso la dɔrɔn, o tigi kɔni tɛ bonya la Ala ni furu labɛn kan. Mɔgɔ min be nanbara kɛ walisa ka faran a furuɲɔgɔn na, hali n’a b’o dogo cogo o cogo, Jehova b’o kala ma. Tiɲɛn na, koow “bɛɛ b’a ɲakɔrɔ, u si dogonin te a ma. An bena an ka koow bɛɛ ɲafɔ ale lo ye.” (Eburuw 4:13). Nka, ni gwɛlɛya dɔ kosɔn kerecɛn be faratiba la wagatijan kɔnɔ, ani a laban, a y’a latigɛ ka faran a furuɲɔgɔn na, mɔgɔ si man kan k’a kɔrɔfɔ o kosɔn. A laban, “an kelen kelen bɛɛ bena lɔ n’an kunko ye Ala ɲakɔrɔ.”—Ɔrɔmukaw 14:10-12.