Ala ye jɔn lo ye?

1. Mun na an ka kan ka Ala bato?

Tiɲɛn Ala lo ye fɛɛn bɛɛ Danbaga ye. Daminɛ t’a la ani laban fana t’a la (Zaburuw 90:2). Kibaro diiman min be sɔrɔ Bibulu kɔnɔ, o bɔra ale lo yɔrɔ (1 Timote 1:11). Komi Ala lo ye niin di an ma, an ka kan k’ale kelenpe lo bato.​—Yirali 4:11 kalan.

2. Ala be cogo di?

Adamaden si ma deli ka Ala ye sabu a be sankolo la. Ale be ni ɲɛnamaya cogo dɔ ye min kɔrɔtanin lo ka tɛmɛ adamadenw ni bɛgɛnw ta kan (Zan 1:18; Zaburuw 11:4). Nka, fɛɛn danninw be Ala jogow yira an na. Ɲɛyirali fɛ, yiridenw ani filɛru sifaw ka ca, o be Ala ka kanuya n’a ka hakilitigiya yira an na. Duniɲa bonya be Ala ka sebagaya yira an na.​—Ɔrɔmukaw 1:20 kalan.

N’an be Bibulu kalan, an be se ka koo caaman lɔn tugun Ala jogow koo la. Ɲɛyirali fɛ, Bibulu b’a yira an na min ka di Ala ye ani min ka gwo a ye, a be mɔgɔw minɛ cogo min na ani a be min kɛ u ka kɛwale dɔw sen fɛ.​—Zaburuw 103:7-10 kalan.

3. Tɔgɔ be Ala la wa?

Yezu y’a fɔ ko: “An Fa min bɛ sankolo la, i tɔgɔ ka saniya.” (Matiyo 6:9, ABM ). Bonyatɔgɔ caaman be Ala la, nka a tɔgɔ yɛrɛyɛrɛ ye kelen dɔrɔn lo ye. O tɔgɔ fɔcogo tɛ kelen ye kaanw bɛɛ la. Julakan na, a be weele ko “Jehova.” Nka, mɔgɔ dɔw b’a weele fana ko “Yawe.”​—Zaburuw 83:19 kalan, Bible senuma 1961.

Bibulu caaman kɔnɔ, u ye Ala tɔgɔ bɔ yen ka bonyatɔgɔ dɔw bila a nɔɔ na i n’a fɔ Matigi wala Ala. Nka, Bibulu sɛbɛra tuma min na, Ala tɔgɔ tun b’a kɔnɔ siɲɛ 7 000 ɲɔgɔn. Tuma min na Yezu tun be mɔgɔw kalanna Ala koo la, a ye Ala tɔgɔ fɔ u ye.​—Zan 17:26 kalan.

Videwo nin filɛ: Tɔgɔ be Ala la wa?

4. Yala Ala b’a janto an na wa?

Tɔɔrɔ caaman minw be duniɲa kɔnɔ, yala u b’a yira ko Jehova Ala t’a janto an na wa? Mɔgɔ dɔw b’a fɔ ko Ala b’an tɔɔrɔ walisa k’an kɔrɔbɔ. Nka o tɛ tiɲɛn ye.​—Zaki 1:13 kalan.

Ala ye bonya la adamaden kan, a ye see di an ma an ka sugandili kɛ ani k’a latigɛ an yɛrɛ ma ka ale sago kɛ. Yala an man kan k’a waleɲuman lɔn o kosɔn wa? (Zozuwe 24:15). Nka, mɔgɔ caaman b’a latigɛ ka kojugu kɛ u mɔgɔɲɔgɔnw na. O lo kama tɔɔrɔ ka ca ten. O tilenbaliyakow be Jehova dusu kasi.​—Zɛnɛsi 6:5, 6 kalan.

Jehova Ala b’a janto an na. A b’a fɛ an ka ninsɔndiya sɔrɔ an ka ɲɛnamaya la. Yanni dɔɔni a bena tɔɔrɔw ban. Minw b’u mɔgɔɲɔgɔnw tɔɔrɔ, a bena olu halaki. Nka, n’a y’a to tɔɔrɔ ka kɛ wagati dɔ kɔnɔ, kuun b’o la. Kalansen 8nan bena o kuun ɲɛfɔ an ye.​—2 Piyɛri 2:9; 3:7, 13 kalan.

5. An be se k’an magwɛrɛ Ala la cogo di?

Jehova b’a ɲini an fɛ an ka kuma n’ale ye delili la walisa k’an magwɛrɛ ale la. A b’a mako don an kelen kelen bɛɛ la (Zaburuw 65:3; 145:18). A be sɔn ka yafali kɛ. N’an b’an jija k’an koo diya Ala ye, a b’o kɔrɔsi hali n’an be fili tuma dɔw la. O kama, an ka dafabaliya bɛɛ n’a ta, an be se ka teriya sɔbɛ kɛ ni Ala ye tiɲɛn na.​—Zaburuw 103:12-14; Zaki 4:8 kalan.

Komi Jehova lo ye niin di an ma, an ka kan k’ale lo kanu ka tɛmɛ fɛɛn bɛɛ kan (Mariki 12:30). A ɲini ka Ala lɔn ka ɲɛ ani k’a sago kɛ walisa k’a yira ko i b’a kanu. O la, i bena se k’i magwɛrɛ a la kosɔbɛ.​—1 Timote 2:4; 1 Zan 5:3 kalan.