Yala kibaro diiman nin bɔra Ala yɔrɔ tiɲɛn na wa?

1. Jɔn lo ye Bibulu Tigi ye?

Kibaro diiman lo k’a lɔn ko mɔgɔw bena ɲɛnamaya kɛ fɔɔ abada dugukolo kan. O kibaro diiman sɛbɛnin be Bibulu kɔnɔ (Zaburuw 37:29). Kitabu fitinin fitinin 66 lajɛnnin lo kɛra Bibulu ye. Ala tɛmɛna cɛɛ 40 ɲɔgɔn lo fɛ k’u sɛbɛ. Bibulu daminɛna ni kitabu duuru minw ye, Musa lo y’u sɛbɛ a saan 3 500 ɲɔgɔn ye nin ye. Ciden Zan lo ye Bibulu ka kitabu laban sɛbɛ, a saan 1 900 ni kɔ ye nin ye. O cɛɛ 40 ye jɔn lo ka miiriyaw sɛbɛ Bibulu kɔnɔ? Ala tɛmɛna a ka hakili senu fɛ k’a ka Kuma lase Bibulu sɛbɛbagaw ma (2 Samuyɛli 23:2). U ye Ala ka miiriyaw lo sɛbɛ, u yɛrɛw ta tɛ. O la, Jehova lo ye Bibulu Tigi ye.​—2 Timote 3:16; 2 Piyɛri 1:20, 21 kalan.

Videwo nin filɛ: Jɔn lo ye Bibulu Tigi ye?

2. Mun lo b’a yira an na ko Bibulu bɔra Ala yɔrɔ?

An b’a lɔn ko Bibulu bɔra Ala yɔrɔ sabu a be sinikow fɔ tigitigi k’u pereperelatigɛ. Adamaden si tɛ se k’o kɛ (Zozuwe 23:14). Sebagayabɛɛtigi Ala kelenpe lo be se ka adamadenw ka sinikow fɔ tigitigi.​—Ezayi 42:9; 46:10 kalan.

Kitabu min bɔra Ala yɔrɔ, a ka kan ka kɛ dan na kitabu tɔɔw bɛɛ la. Bibulu do ɲɔgɔn tɛ yen tiɲɛn na. Bibulu kuturu bɛɛ deen miliyari fila ni kɔ lo tilantilanna ka di mɔgɔw ma kaan 450 ni kɔ la. Hali ni kitabu kɔrɔ lo, a be min fɔ lɔnnikow ta fan fɛ, o ye tiɲɛn ye. Cɛɛ 40 minw y’a sɛbɛ, u tɛ ɲɔgɔn sɔsɔ.a Ka fara o kan, Bibulu be min fɔ kanuya koo la, o tɛ se ka bɔ yɔrɔ wɛrɛ kanutigi Ala kɔ. A bele be se ka mɔgɔw dɛmɛ u k’u ka ɲɛnamaya kɛcogo fisaya. O koow bɛɛ lo y’a to mɔgɔ miliyɔn caaman lara a la ko Bibulu ye Ala ka Kuma ye.​—1 Tesalonikaw 2:13 kalan.

Videwo nin filɛ: Mun lo b’a yira an na ko Bibulu bɔra Ala yɔrɔ?

3. Mun lo be sɔrɔ Bibulu kɔnɔ?

Kibaro diiman min be Bibulu kɔnɔ, o ye ko Ala be ni sagonata ɲuman ye adamadenw koo la. Bibulu b’a ɲɛfɔ fɛɛn min kama adamadenw bɔnɛna alijɛnɛ na dugukolo kan u ka koow daminɛ na, ani cogo min na Ala bena alijɛnɛ sigi kokura.​—Yirali 21:4, 5 kalan.

Sariyaw ni miiriya jɔnjɔnw ani ladiliw be sɔrɔ fana Ala ka Kuma kɔnɔ. Galen, Ala ye adamadenw minɛ cogo min na, o fana sɛbɛra Bibulu kɔnɔ ani o b’a yira Ala ye mɔgɔ sifa min ye. O kama, Bibulu be se k’i dɛmɛ ka Ala lɔn. A b’a ɲɛfɔ fana cogo min na i be se ka kɛ Ala teri ye.​—Zaburuw 19:8, 12; Zaki 2:23; 4:8 kalan.

4. Mun lo be se k’i dɛmɛ ka Bibulu faamu?

Sɛbɛ nin bena i dɛmɛ ka Bibulu faamu. A be tugu Yezu ka kalan kɛcogo kɔ. Yezu tun be Bibulu yɔrɔ dɔw ta ta k’u ɲɛfɔ walisa mɔgɔw ka “Ala ka kuma faamu.”​—Luka 24:27, 45 kalan.

Kibaro diiman min bɔra Ala yɔrɔ, fɛɛn bɛrɛ tɛ mɔgɔ ninsɔndiya ka se o ma. Nka mɔgɔ dɔw mako t’a la ani a yɛrɛ be dɔw dusu gwan. Kana i fari faga. I tɛ se ka kɛ ni ɲɛnamaya banbali jigiya ye n’i m’a ɲini ka Ala lɔnniya sɔrɔ.​—Zan 17:3 kalan.