Ala ka Masaya ye mun lo ye?

1. Ala ka Masaya ye mun lo ye?

Ala ka Masaya ye sankolola gofɛrɛnɛman lo ye. A bena gofɛrɛnɛman tɔɔw bɛɛ bɔ yen ani ka sigi u nɔɔ na walisa Ala sago ka kɛ sankolo la ani dugukolo kan. O ye kibaro diiman ye. Adamadenw mako be gofɛrɛnɛman ɲuman na. Yanni dɔɔni, Ala ka Masaya bena o mako wasa. A bena mɔgɔw bɛɛ kaan bɛn k’u kɛ kelen ye dugukolo kan.​—Daniyɛli 2:44; Matiyo 6:9, 10; 24:14 kalan.

Masaya bɛɛ n’a ka masacɛ lo. Jehova y’a Dencɛ Yezu Krista lo sigi a ka Masaya kun na.​—Yirali 11:15 kalan.

Videwo nin filɛ: Ala ka Masaya ye mun lo ye?

2. Mun na a bɛnnin be Yezu lo ka kɛ Masacɛ ye?

A bɛnnin be Ala Dencɛ lo ka kɛ Masacɛ ye sabu Yezu ka ɲi ani tilenninyakow ka di a ye kosɔbɛ (Zan 1:14). Ka fara o kan, see b’a ye ka mɔgɔw dɛmɛ kosɔbɛ sabu a bena to sankolo la ka dugukolo mara. A lakununin kɔ, a yɛlɛla sankolo la ka sigi Jehova kinibolo la ani a ye kɔnɔni kɛ yen (Eburuw 10:12, 13). A laban, Ala ye see di a ma a k’a daminɛ ka Masaya kɛ.​—Daniyɛli 7:13, 14 kalan.

3. Jɔn lo bena mara kɛ ni Yesu ye?

Minw bena mara kɛ ni Yezu ye sankolo la, u weelela ko ‘senumanw’ (Daniyɛli 7:27, ABM ). Yezu ka ciden kantigiw lo sugandira fɔlɔ ka kɛ senumanw ye. Jehova tora ka cɛɛw ni muso kantigiw sugandi k’u kɛ senumanw ye fɔɔ kana se sisan ma. U mana sa, u be lakunu ka kɛ danfɛn yebaliw ye i ko Yezu.​—Zan 14:1-3; 1 Korɛntikaw 15:42-44 kalan.

Mɔgɔ joli lo be taga sankolo la? Yezu ye u weele ko “sagakulufitini” (Luka 12:32). U bɛɛ lajɛnnin hakɛ bena kɛ mɔgɔ 144 000 ye. Olu lo bena dugukolo mara ni Yezu ye.​—Yirali 14:1 kalan.

4. Mun lo kɛra tuma min na Yesu ye masaya daminɛ?

Ala ka Masaya sigira sen kan saan 1914 la.a Yezu siginin kɔ masaya la, a ye koo fɔlɔ min kɛ, o tun ye ka Sutana n’a ka jinaw gwɛn ka jigi dugukolo kan. Sutana dusu dimina ani a y’a daminɛ ka dugukolo kuru bɛɛ ɲagami ( Yirali 12:7-10, 12). Kabini o wagati, tɔɔrɔkow cayara kosɔbɛ adamadenw kan. Kɛlɛw, kɔngɔ, banaw ani dugukoloyɛrɛyɛrɛ minw be kɛra, u bɛɛ ye “taamasiɲɛ” ye min b’a yira ko yanni dɔɔni Ala ka Masaya bena dugukolo kuru bɛɛ mara.​—Luka 21:7, 10, 11, 31 kalan.

5. Ala ka Masaya be koo jumanw lo dafa?

Waajuli baara sababu fɛ duniɲa kuru bɛɛ kɔnɔ, Ala ka Masaya b’a la ka jamaba dɔ lajɛn ka bɔ siyaw bɛɛ la ani k’u kaan bɛn. Mɔgɔ majiginin miliyɔn caaman kɛra Yezu ka marakɔnɔmɔgɔw ye. Ala ka Masaya bena u latanga tuma min na a bena duniɲa juguman nin halaki. O la, mɔgɔ o mɔgɔ b’a fɛ ka nafa sɔrɔ Ala ka Masaya la, o tigi ka kan ka kolo Yesu ye.​—Yirali 7:9, 14, 16, 17 kalan.

Ala sagonata fɔlɔ tun ye min ye adamadenw koo la, Ala ka Masaya bena o dafa saan 1 000 kɔnɔ. Dugukolo bɛɛ bena kɛ alijɛnɛ ye. A laban, Yezu bena Masaya segi a Faa ma (1 Korɛntikaw 15:24-26). Yala mɔgɔ dɔ be yen i b’a fɛ ka Ala ka Masaya kofɔ min ye wa?​—Zaburuw 37:10, 11, 29 kalan.