Mun na Ala b’a to kojugu ni tɔɔrɔkow ka kɛ?

1. Kojugu daminɛna cogo di?

Kojugu daminɛna dugukolo kan tuma min na Sutana ye ngalon fɔlɔ tigɛ. A daminɛ na, Sutana tun ye mɛlɛkɛ dafanin ye, nka a “ma to tiɲɛ kan.” (Zan 8:44, ABM ). Ala kelenpe ka kan ni batoli min ye, ale ɲɛɛ bɔra o fɛ. A ye ngalon tigɛ muso fɔlɔ Awa ye, ani a y’a lasun a ka mɛnni kɛ ale fɛ ka Ala to yen. Adama tugura Awa kɔ ka muruti Ala ma. O lo nana ni tɔɔrɔ ni saya ye.​—Zɛnɛsi 3:1-6, 19 kalan.

Sutana kɛtɔ ka Awa lasun a kana mɛnni kɛ Ala fɛ, a tun be murutili koo dɔ lo labɛnna Ala kama ko joo t’a fɛ ka kuntigiya kɛ. Adamadenw fanba tugura Sutana kɔ ani u banna Ala ka kuntigiya la. O cogo la, Sutana kɛra “diɲɛ nin kuntigi” ye.​—Zan 14:30; 1 Zan 5:19 kalan.

2. Yala fiyɛn tun be Ala ka danfɛnw na wa?

Ala ka danfɛnw bɛɛ dafanin lo. Ala tun ye mɛlɛkɛw ni mɔgɔ minw dan, u tun be se ka mɛnni kɛ Ala fɛ cogo dafanin na (Deteronɔmu 32:4, 5). Ala y’an dan cogo min na, an be se k’a latigɛ an yɛrɛ ma ka koo ɲuman wala koo jugu kɛ. O be sababu di an ma an k’a yira ko an be Ala kanu.​—Zaki 1:13-15; 1 Zan 5:3 kalan.

3. Mun na Ala y’a to tɔɔrɔkow ka kɛ fɔɔ ka na se bi ma?

Kabi Edɛn nankɔ kɔnɔ, Jehova ma mɔgɔw bali u ka muruti ale ka kuntigiya ma. Mun na do? A y’o kɛ walisa k’a yira ko see tɛ adamadenw ye k’u yɛrɛ mara koɲuman ale Ala kɔ (Waajulikɛla 7:29; 8:9). Adamadenw ka koow y’o lo yira ka gwɛ saan 6 000 kɔnɔ. U ka kuntigiw dɛsɛra ka kɛlɛw, kojugukɛ, tilenbaliyakow ni banaw ban.​—Zeremi 10:23; Ɔrɔmukaw 9:17 kalan.

Ala ka kuntigiya tɛ komi adamadenw ta, n’i sɔnna a ma, a b’i nafa (Ezayi 48:17, 18). Yanni dɔɔni, Jehova bena adamadenw ka gofɛrɛnɛmanw bɛɛ halaki. Mɔgɔ minw sɔnna Ala ka kuntigiya ma, olu dɔrɔn lo bena sigi dugukolo kan.—Ezayi 11:9; Daniyɛli 2:44 kalan.

Videwo nin filɛ: Mun na Ala b’a to tɔɔrɔkow ka kɛ?

4. Ala ka muɲuli be sababu di an ma ka mun lo kɛ?

Sutana ko mɔgɔ si tɛna baara kɛ Jehova ye kanuya kosɔn. A tɛna diya i ye k’a yira k’o ye ngalon ye wa? I be se k’o kɛ! Ala ka muɲuli be sababu di an bɛɛ ma an k’a yira n’an be Ala ka kuntigiya lo fɛ wala n’an be adamadenw ta lo fɛ. An b’o yira an ka ɲɛnamaya kɛcogo lo fɛ.​—Zɔbu 1:8-12; Talenw 27:11 kalan.

5. An be se k’a yira cogo di ko an sɔnna Ala ka kuntigiya ma?

An be se k’a yira ko an sɔnna Ala ka kuntigiya ma n’an b’a ɲini ka tiɲɛn batoli kɛcogo lɔn ani k’an seen don a la. O batoli basiginin lo Bibulu kan (Zan 4:23). An be se ka ban Sutana ka kuntigiya ma n’an be ban k’an seen don politikikow ni kɛlɛkow la i ko Yezu y’a kɛ cogo min na.​—Zan 17:14 kalan.

Sutana be mɔgɔw lasun u k’a jati ko farati foyi tɛ yen kakalayakow la. N’an banna o koow la, an teri dɔw wala an somɔgɔ dɔw be se k’an lɔgɔbɔ wala k’an kɛlɛ (1 Piyɛri 4:3, 4). O kama, an ka kan ka sugandili kɛ. Mɔgɔ minw be Ala kanu, yala an bena sɔn ka jɛn n’olu lo ye wa? Ala ye sariya minw di an ma hakilitigiya ni kanuya kosɔn, yala an bena sɔn k’u labato wa? N’an y’o kɛ, an bena a yira ko Sutana ye ngalon tigɛ k’a fɔ ko mɔgɔ si tɛna Ala sago kɛ n’a ka gwɛlɛ a ma.​—1 Korɛntikaw 6:9, 10; 15:33 kalan.

Ala ka kanuya b’an jigi sigi ko kojugukɛ ni tɔɔrɔ bena ban. Minw b’a yira ko u lanin b’o la, olu bena ɲɛnamaya kɛ dugukolo kan fɔɔ abada.​—Zan 3:16 kalan.