I ka denbaya be se ka hɛɛrɛ sɔrɔ cogo di?

1. Mun na a kɔrɔtanin lo k’i ka furu siri faamanw fɛ n’i b’a fɛ ka hɛɛrɛ sɔrɔ denbaya kɔnɔ?

Kibaro diiman bɔra Jehova lo yɔrɔ. Ale lo ye hɛɛrɛtigi Ala ye, ani a b’a fɛ denbayaw ka kɛ hɛɛrɛ la (1 Timote 1:11, ABM ). Ale lo ye furuko juu sigi. A kɔrɔtanin lo furu ka siri faamanw fɛ. O lo b’a to hɛɛrɛ be kɛ denbaya kɔnɔ ani deenw be lamɔ cogo fisaman na. Faamanw ka sariya be min fɔ furusiri koo la, kerecɛnw ka kan k’o sira tagama.​—Luka 2:1, 4, 5 kalan.

Ala be furuko jati cogo di? A b’a fɛ furu ka kɛ furututuko ye cɛɛ n’a muso cɛ. Jehova b’a fɛ cɛɛ n’a muso ka kantigiya kɛ ɲɔgɔn ye (Eburuw 13:4). Furusa man di Ala ye fewu (Malasi 2:16). Nka, a be sɔn kerecɛn k’a ka furu sa ani ka furu wɛrɛ siri n’a furuɲɔgɔn ye ɲamɔgɔya kɛ.​—Matiyo 19:3-6, 9 kalan.

2. Cɛɛ n’a muso ka kan ka ɲɔgɔn minɛ cogo di?

Jehova ye cɛɛ ni muso dan ko u ka ɲɔgɔn dafa furu kɔnɔ (Zɛnɛsi 2:18). Furucɛ lo ye denbaya kuntigi ye. Ale lo ka kan ka bila ɲɛ k’a ka denbayamɔgɔw mako wasa bololafɛnw ta fan fɛ ani k’u kalan Ala koo la. Komi a b’a muso kanu, a ka kan ka sɔn k’a yɛrɛ saraka a kosɔn. Furucɛw n’u musow ka kan ka ɲɔgɔn kanu ani ka ɲɔgɔn bonya. Komi an si dafanin tɛ, a kɔrɔtanin lo cɛɛw n’u musow k’u yɛrɛ degi ka yafa ɲɔgɔn ma walisa hɛɛrɛ ka kɛ furu kɔnɔ.​—Efɛzikaw 4:31, 32; 5:22-25, 33; 1 Piyɛri 3:7 kalan.

3. Ni hɛɛrɛ tɛ yen i ka furu kɔnɔ, yala i ka kan k’i furuɲɔgɔn bila wa?

Ni gwɛlɛyaw be yen i ka furu kɔnɔ, aw fila bɛɛ ka kan k’aw jija ka ɲɔgɔn minɛ ni kanuya ye (1 Korɛntikaw 13:4, 5). Gwɛlɛya minw ka teli ka sɔrɔ furuw kɔnɔ, Ala ka Kuma t’a yira k’u ɲɛnabɔcogo ye ka faran ɲɔgɔn na.​—1 Korɛntikaw 7:10-13 (ABM) kalan.

4. Denmisɛnw, Ala b’a fɛ aw ka kɛ cogo di?

Jehova b’a fɛ aw ka kɛ hɛɛrɛ la. Ladili fisaman minw be se k’aw nafa aw denmisɛnya wagati la, Jehova b’o di aw ma. A b’a fɛ aw ka mɛnni kɛ aw wolobagaw fɛ sabu u be ni hakilitigiya ye ani u be koo lɔn ka tɛmɛ aw kan (Kɔlɔsikaw 3:20). Jehova b’a fɛ fana aw k’ale n’a Dencɛ sago kɛ ani ka ninsɔndiya sɔrɔ o la.​—Waajulikɛla 11:9–12:1; Matiyo 19:13-15; 21:15, 16 kalan.

5. Wolobagaw, aw deenw be se ka hɛɛrɛ sɔrɔ cogo di?

I ka kan ka baara kɛ sɔbɛ la walisa ka dumuni, siyɔrɔ ni faniw di i deenw ma (1 Timote 5:8). Nka n’i b’a fɛ i deenw ka hɛɛrɛ sɔrɔ, i ka kan k’u kalan u ka Ala kanu ani ka lɔnniya sɔrɔ a fɛ (Efɛzikaw 6:4). N’i deenw ɲɛɛ b’a la ko ele yɛrɛ be Ala kanu, o be se ka nɔɔba to u kan. N’i ka kalan basiginin lo Ala ka Kuma kan, a be se ka nɔɔ ɲuman to i deenw ka miiriyaw kan.​—Deteronɔmu 6:4-7; Talenw 22:6 kalan.

N’i be i deenw jija ani k’u tando, u be nafa sɔrɔ o la. I ka kan k’u kolo fana. O kololi ɲɔgɔn b’a to u tɛna sɔɔn dɔ ta min bena u bali ka hɛɛrɛ sɔrɔ (Talenw 22:15). Nka kololi man kan ka kɛ ni fariya ye abada.​—Kɔlɔsikaw 3:21 kalan.

Jehova Seerew ye gafe caaman sɛbɛ minw ɲɛsinna wolobagaw ni deenw ma tigitigi. O gafew basiginin lo Bibulu kan.​—Zaburuw 19:8, 12 kalan.