A diyara an ye ka gundo min lɔn

Mɔgɔ dɔ delila ka gundo dɔ fɔ i ye wa?—a Bibulu be gundo dɔ kofɔ min ɲɔgɔn tɛ yen. A be weele ko “gundo” senuman. Koo senuman lo sabu a bɔra Ala yɔrɔ. Gundo lo sabu mɔgɔw tun t’a lɔn. Hali mɛlɛkɛw tun b’a fɛ k’a lɔn. I b’a fɛ k’o gundo lɔn wa?—

A mɛɛnna kosɔbɛ, Ala ye cɛɛ fɔlɔ ni muso fɔlɔ dan. U tɔgɔw ko Adama ni Awa. Ala ye u bila yɔrɔ cɛɲumanba dɔ la min be weele ko Edɛn nankɔ. Ni Adama ni Awa tun ye mɛnni kɛ Ala fɛ, olu n’u deenw tun bena dugukolo bɛɛ yɛlɛma k’a kɛ alijɛnɛ ye i n’a fɔ o nankɔ ɲuman. U tun bena to alijɛnɛ kɔnɔ fɔɔ abada. Nka i hakili b’a la Adama ni Awa ye min kɛ wa?—

Adama ni Awa ma mɛnni kɛ Ala fɛ. O lo kama an tɛ alijɛnɛ kɔnɔ bi. Nka, Ala ko ale bena dugukolo bɛɛ yɛlɛma k’a kɛ yɔrɔ cɛɲumanba ye. O la, bɛɛ bena to hɛɛrɛ la fɔɔ abada. A bena o kɛ cogo di do? Kabi tumajan, mɔgɔ si tun t’a lɔn a bena o kɛ cogo min na. O koo tun ye gundo ye.

Tuma min na Yezu nana dugukolo kan, a ye mɔgɔw kalan o gundo koo la. A y’a fɔ k’o gundo ɲɛsinna Ala ka Masaya koo ma. Yezu y’a fɔ mɔgɔw ye ko u ka Ala deli walisa o Masaya ka na. O Masaya bena dugukolo yɛlɛma k’a kɛ alijɛnɛ cɛɲumanba ye.

A diyara i ye k’o gundo nin lɔn wa?— I hakili to a la ko mɔgɔ minw be mɛnni kɛ Jehova fɛ, olu dɔrɔn lo bena sigi alijɛnɛ kɔnɔ. Cɛɛw ni muso caaman ye mɛnni kɛ Jehova fɛ ani Bibulu be olu ka koow lakali an ye. I b’a fɛ ne ka u ka koow lakali i ye wa?— An k’a ɲini k’u dɔw lɔn ani an k’a filɛ an be se k’u ladegi cogo min na.