Erebɛka tun b’a fɛ ka Jehova dusu diya

Jehova koo tun ka di Erebɛka ye. A cɛɛ tɔgɔ tun ko Isiyaka. Jehova koo tun ka di ale fana ye. Erebɛka ni Isiyaka ye ɲɔgɔn lɔn cogo di? Erebɛka y’a yira cogo di ko a b’a fɛ ka Jehova dusu diya? An k’a ɲini ka Erebɛka lɔn.

Isiyaka facɛ n’a bamuso tun ye Ibrayima ni Sara ye. U tun siginin be Kanaan jamana na. O yɔrɔ mɔgɔw tun tɛ Jehova bato. Ibrayima tun b’a fɛ a dencɛ ka muso furu min be Jehova bato. O lo kama, a y’a ka baaraden dɔ ci ka taga muso ɲini Isiyaka ye a balimaw cɛma a faso la, Aran jamana na. N’a sɔrɔ o baaraden tun ye Eliyezɛri lo ye.

Eliyezɛri ni Ibrayima ka baaraden wɛrɛw ye tagamajan kɛ. U ye bonyafɛnw ni dumunifɛnw siri ɲɔgɔmɛ tan kan ka taga n’u ye. Eliyezɛri tun bena a lɔn cogo di ale ka ɲi ka muso min sugandi Isiyaka ye do? Eliyezɛri ni baaraden tɔɔw sera Aran minkɛ, u lɔra kɔlɔnda dɔ la sabu Eliyezɛri y’a lɔn ko yanni dɔɔni, mɔgɔw bena na jii sama. A ye Jehova deli ko: ‘Ni ne y’a fɔ sunguru min ye ko a ka jii di ne ma ani a ye jii di ne ni n’ ka ɲɔgɔmɛw ma, ne bena a lɔn o le fɛ ko i ye o muso lo sugandi.’

O kɔ, sunguru Erebɛka nana kɔlɔnda la. Bibulu b’a fɔ ko a tun cɛ ka ɲi kosɔbɛ. Eliyezɛri ye jii deli a fɛ ka min. A ye Eliyezɛri jaabi ko: ‘Ɔnhɔn, jii minɛ ka min. Ne bena jii bɔ ka di i ka ɲɔgɔmɛw fana ma.’ Miiri k’a filɛ! Jii minnɔgɔ be ɲɔgɔmɛ minw na, u be jii caaman min. O kama, Erebɛka bolila ka taga kɔlɔnda la siɲɛ caaman ka jii sama ka di u ma. Jaa nin kan, i ɲɛɛ b’a la a be baaraba min kɛra wa?— Eliyezɛri kabakoyara k’a ye cogo min na Jehova ye ale ka delili jaabi.

Eliyezɛri ye bonyafɛn ɲuman caaman di Erebɛka ma. Erebɛka ko Eliyezɛri ni baaraden tɔɔw ka na ale ka soo. Eliyezɛri y’a ɲɛfɔ fɛɛn min kama Ibrayima ye ale ci u fɛ ani cogo min na Jehova y’a ka delili jaabi. O diyara Erebɛka somɔgɔw ye. U sɔnna ko a ka furu Isiyaka ma.

Nka e ka miiri la, Erebɛka tun b’a fɛ ka furu Isiyaka ma wa?— Erebɛka y’a lɔn ko Jehova lo ye Eliyezɛri ci olu fɛ. O kama, tuma min na a somɔgɔw y’a ɲininga ko: ‘I b’a fɛ ka taga ni cɛɛ nin ye Kanaan, ani ka furu Isiyaka ma wa?’ A ko: “Ɔnhɔn.” A sinna ka tugu Eliyezɛri kɔ, u tagara. U senin Kanaan, Erebɛka furula Isiyaka ma.

Komi Erebɛka ye Jehova sago kɛ, o kama Jehova y’a duga. A nana kɛ Yezu mamamuso dɔ ye! N’i be Erebɛka ladegi ani n’i be Jehova dusu diya, Jehova bena ele fana duga.