Zeremi ma Jehova ka kuma fɔli dabila

N’an be kuma Jehova koo la, tuma dɔw la mɔgɔw b’an lɔgɔbɔ wala u be dimi an kɔrɔ. O kosɔn, an be se k’a ɲini ka Ala ka kuma fɔli dabila. O miiriya ɲɔgɔn ma deli ka na i kɔnɔ wa?— Bibulu be kanbele dɔ kofɔ an ye. A tun be Jehova kanu, nka a tun be ɲini ka Jehova ka kuma fɔli dabila. A tɔgɔ ko Zeremi. An k’a ɲini ka Zeremi lɔn.

Zeremi kanbele tuma na, Jehova y’a fɔ a ye ko a ka mɔgɔw lasɔmi ko u ka kojugukɛ dabila. O tun ka gwɛlɛ Zeremi fɛ kosɔbɛ ani a tun sirannin lo. A y’a fɔ Jehova ye ko: ‘Ne ye denmisɛn ye. Ne tɛ se kuma na.’ Nka Jehova y’a fɔ ko: ‘I kana siran. Ne bena i dɛmɛ.’

O kama, Zeremi y’a daminɛ ka mɔgɔw lasɔmi ko ni u ma kojugukɛ dabila, Jehova bena u ɲɛɛ gwan. E ka miiri la, mɔgɔw ye mɛnni kɛ Zeremi fɛ wa?— Ayi. Dɔw y’a lɔgɔbɔ, dɔw dimina a kɔrɔ kosɔbɛ. Dɔw yɛrɛ y’a ɲini k’a faga! E ka miiri la, o koo ye mun lo kɛ Zeremi la?— A siranna ani a ko: ‘Ne tɛna kuma Jehova koo la tugun.’ Nka, Zeremi ye Jehova ka kuma fɔli dabila wa?— Ayi, a m’o kɛ. Jehova koo tun ka di Zeremi ye kosɔbɛ fɔɔ a tun tɛ se k’a ka kuma fɔli dabila. O kama, Jehova y’a kisi.

Loon dɔ, mɔgɔ jugu dɔw ye Zeremi fili dingɛba dɔ kɔnɔ, pɔtɔpɔtɔ fanin be min na. Jii wala dumunifɛn si tun t’a fɛ. O cɛɛ nunu tun b’a fɛ ka Zeremi to yen walisa a ka sa. Nka Jehova ka dɛmɛ sababu la, a kisira!

Zeremi ka koo b’i dɛmɛ ka mun lo faamu?— Hali n’a tun sirannin lo tuma dɔw la, a ma Jehova ka kuma fɔli dabila. Ni i be kuma Jehova koo la, mɔgɔw be se k’i lɔgɔbɔ wala ka dimi i kɔrɔ. O be se ka maloya bila i la wala k’a to i be siran yɛrɛ. Nka, kana Jehova ka kuma fɔli dabila fewu. A bena i dɛmɛ tuma bɛɛ i ko a ye Zeremi dɛmɛ cogo min na.