An labɛnnin lo ka “Hɛrɛtigi Ala” bato

1, 2. Saan 1895 zanwiyekalo la, yɛlɛmani juman lo kɛra Kɔrɔsili Sangaso la, ani o ye mun lo kɛ balimaw na?

BALIMACƐ John Bohnet tun ye Bibulu Kalanden dɔ ye min kisɛyanin lo kosɔbɛ. Tuma min na a ye saan 1895 zanwiyekalo ka Kɔrɔsili Sangaso sɔrɔ, a ye min ye a kɔnɔ, o y’a ninsɔn diya kosɔbɛ! U tun ye desɛn kura dɔ kɛ a ɲɛɛ fɔlɔ kan. Sangaso dɔ jaa tun lo. Yeelenba dɔ tun be bɔra o sangaso la ka dibiba cɛtigɛ ka jigi kɔgɔji dɔ lamagatɔ kan. O zurunali kɔnɔ, barokun dɔ tun be yen ko: “Zurunali cogoya kura.”

² Balimacɛ Bohnet dusu diyara kosɔbɛ fɔɔ a ye lɛtɛrɛ ci balimacɛ Russell ma. A y’a sɛbɛ ko: “N’ dusu diyara kosɔbɛ k’a ye k’o SANGASO jaa filɛ ka di. A cɛ ka ɲi yɛrɛ le!” Bibulu Kalanden kantigi wɛrɛ, min tɔgɔ ko John Brown, ale y’a sɛbɛ zurunali kɔgolo koo la ko: “A cɛ ka ɲi yɛrɛ le. Jikuruw ani sanfɔɲɔbaw b’o sangaso gosira, nka a juu siginin lo ka ɲɛ.” O kɔgolo kura tun ye yɛlɛmani fɔlɔ ye balimaw ye min kɔrɔsi o saan na. Nka a laban tun tɛ. Novanburukalo la, yɛlɛmaniba wɛrɛ kɛra. O yɛlɛmani fana tun ɲɛsinna baji dɔ ma min jikuru tun be lamagara kosɔbɛ.

3, 4. U kumana gwɛlɛya juman lo koo la saan 1895 novanburukalo tile 15nan ka Kɔrɔsili Sangaso kɔnɔ? Ani yɛlɛmaniba juman lo kofɔra yen fana?

³ Saan 1895 novanburukalo tile 15nan ka Kɔrɔsili Sangaso kɔnɔ (angilikan na), barokunjan dɔ kumana gwɛlɛya nin koo la: Bɛnbaliyakow tun be Bibulu Kalandenw cɛma u ka ɔriganisasiyɔn kɔnɔ, ani o tun be ɲini k’u ka hɛɛrɛ nagasi. Mɔgɔ min ka ɲi ka kafo ɲɛminɛ, balimacɛw tun ka teli ka ɲɔgɔn sɔsɔ o koo la. O koo tun nana ni faranfaranli ye kafow kɔnɔ. Walisa ka balimaw dɛmɛ k’o bɛnbaliyako ɲɛnabɔ, o barokun ye an ka ɔriganisasiyɔn suma ni bato ye. O kɔ, u y’u kɔnɔ gwɛ k’a fɔ ko balimacɛ minw tun be ɔriganisasiyɔn ɲɛminɛna, olu m’o bato labɛn walisa a ka lɔ yɔrɔ kelen na fɔɲɔba tuma na. Mun lo tun ka ɲi ka kɛ?

⁴ A fɔra o barokun kɔnɔ ko kapitɛni ɲuman b’a janto ko mɔgɔ niin kisifɛnw b’a ka bato kɔnɔ ani ko bato baarakɛlaw labɛnnin lo ka finɛtiriw datugu ni sanfɔɲɔba dɔ be daminɛna. O cogo kelen na, ɔriganisasiyɔn ɲɛminɛbagaw ka ɲi ka la a la ko kafow bɛɛ labɛnnin lo ka see sɔrɔ gwɛlɛyaw bɛɛ kan. O kama, yɛlɛmaniba dɔ kofɔra o barokun na ko a ɲinina “jɛnkuluw kelen kelen bɛɛ fɛ u ka diinan mɔgɔkɔrɔw sugandi” walisa u k’u “ ‘janto’ Krista ka sagadenw na.”—Kɛw. 20:28.

5. a) Labɛn fɔlɔ min kɛra diinan mɔgɔkɔrɔw koo la, mun na an be se k’a fɔ ko o kɛra wagati bɛnnin na? b) An bena ɲiningali jumanw lo jaabi?

⁵ Labɛn fɔlɔ min kɛra diinan mɔgɔkɔrɔw koo la, o kɛra wagati bɛnnin na yɛrɛ le. O kɛra sababu ye kafow sabatira. O ye balimaw dɛmɛ u sera ka kɛlɛba fɔlɔ gwɛlɛyaw muɲu. O gwɛlɛyaw tun be i ko jikuruba minw be bato lamaga. Saan minw tugura o kɔ, yɛlɛmani wɛrɛw kɛra minw ye Ala sagokɛlaw ka koow cogoya fisaya. O y’a to u labɛnnin tora koɲuman walisa ka Jehova bato. Bibulu ka kiraya kuma juman lo tun kɔnna k’o yɛlɛmaniw kofɔ? Labɛn jumanw lo kɛra Jehova ka ɔriganisasiyɔn kɔnɔ ele ɲɛɛ na? U ye ele nafa cogo di?

‘Hɛɛrɛ le bɛna kɛ i kɔrɔsibaga ye’

6, 7. a) Ezayi 60:17 ka kumaw kɔrɔ ko di? b) ‘Kɔrɔsibaga’ ani ‘kuntigi’ minw kofɔra o vɛrise kɔnɔ, o be mun lo yira an na?

⁶ I ko an y’a ye gafe nin sapitiri 9nan na, Ezayi tun kɔnna k’a fɔ ko Jehova ka duga barika la, a sagokɛlaw bena buguya (Ezayi 60:22). Nka, Jehova ye layidu ta fana ko a tɛna dan o ma. O kiraya kuma kɔnɔ, a y’a fɔ ko: “Ne bɛna sanin di i ma siranɛgɛ nɔ ra, ka warigbɛ di i ma nɛgɛ nɔ ra, ka siranɛgɛ di yiri nɔ ra ka nɛgɛ di kabakuru nɔ ra. Hɛra le bɛna kɛ i kɔrɔsibaga ye, terenninya bɛ kɛ i kuntigi ye.” (Ezayi 60:17, Biblu Ala ta Kuma). O kiraya kuma kɔrɔ ko di? Bi, a ɲɛsinna an ma cogo di?

⁷ Ezayi ka kiraya kuma ko fɛɛn dɔ bena bila fɛɛn wɛrɛ nɔɔ na. A kɔrɔsi ko fɛɛn jugu lo tɛ bila fɛɛn ɲuman nɔɔ na. Nka, fɛɛn min ka fisa kosɔbɛ, o lo be bila fɛɛn ɲuman nɔɔ na. Ka sanu bila ziranɛgɛ nɔɔ na, o ye ka koow cogoya fisaya. O kelen lo fana ni fɛɛn tɔɔw ye minw kofɔra. Ka kɛɲɛ n’o kiraya kuma ye, Jehova tun kɔnna k’a fɔ ko a sagokɛlaw ka koow cogoya bena to ka fisaya. Mun ni mun lo tun bena to ka fisaya? Komi Jehova kumana ‘kɔrɔsibagaw’ ani ‘kuntigiw’ koo la, o b’a yira ko a b’a janto a sagokɛlaw la cogo min na, o bena to ka fisaya. Ani, u ka koow labɛnnin lo cogo min na, o fana bena to ka fisaya.

8. a) Ɲɛtaga min kofɔra Ezayi ka kiraya kuma kɔnɔ, o kɛra jɔn sababu lo la? b) O ɲɛtaga b’an nafa cogo di? (koorilen nin fana lajɛ: “A y’a yɛrɛ majigi ka sɔn kololi ma”).

⁸ Jɔn sababu lo la ɲɛtaga be kɛra an ka koow labɛncogo la? Jehova ko: “Ne bɛna sanin di. . . ka warigbɛ di . . . Hɛra le bɛna kɛ i kɔrɔsibaga ye.” O la, yɛlɛmani minw kɛra sababu ye kafow labɛncogo fisayara, Jehova yɛrɛ lo y’u kɛ, adamaden tɛ. Jehova tora k’o yɛlɛmaniw kɛ Yezu barika la kabi a y’a sigi Masaya la. O yɛlɛmaniw b’an nafara cogo di? O vɛrise kelen nin kɔnɔ, a fɔra k’o yɛlɛmaniw bena na ni ‘hɛɛrɛ’ ni ‘tilennenya’ ye. Komi an be sɔn Ala k’an ɲɛminɛ ani an be to ka yɛlɛmaniw kɛ, o b’a to hɛɛrɛ b’an ni ɲɔgɔn cɛ. Tilenninya ka di an ye minkɛ, o b’an lasun ka Jehova bato, ale min ye “Hɛrɛtigi Ala” ye i ko ciden Pol y’a fɔ cogo min na.—Filip. 4:9.

9. Mun lo y’a to kelenya be kafo kɔnɔ ani koo bɛɛ labɛnnin lo ka ɲɛ? Mun na an be se k’o fɔ?

⁹ Ciden Pol y’a sɛbɛ Jehova koo la ko: “Ala te koferekenin tigi ye, nga hɛrɛtigi lo.” (1 Kor. 14:33). A kɔrɔsi ko Pol m’a fɔ ko koferekenin kɔkana ye labɛnko ɲuman ye, nka a ko hɛɛrɛ. Mun na do? Miiri nin na: Labɛnko ɲuman dɔrɔn tɛ se ka na ni hɛɛrɛ ye. Misali la, sɔrɔdasikulu dɔ be se ka tagama cogo labɛnnin na ka taga kɛlɛ yɔrɔ la. Nka, o labɛnko ɲuman laban ye kɛlɛ lo ye, hɛɛrɛ tɛ. An minw ye kerecɛnw ye, an ka ɲi ka nin to an hakili la: Jɛnkulu o jɛnkulu ka koow labɛncogo siginin tɛ hɛɛrɛ kan, a mɛɛn o mɛɛn, o jɛnkulu be ben. Nka, labɛnko ɲuman min basiginin lo Ala ka hɛɛrɛ kan, o be mɛɛn fɔɔ abada! O kama, an ninsɔn ka di kosɔbɛ k’a ye ko “Hɛrɛtigi Ala” lo be an ka ɔriganisasiyɔn ɲɛminɛna ani ale lo b’a ka koow cogoya fisayara! (Ɔrɔm. 15:33). Duniɲa kuru bɛɛ la, an be labɛnko ɲuman ni kelenya diyabɔra kafow kɔnɔ sabu Ala be hɛɛrɛ kɛ an ye.—Zab. 29:11.

10. a) An ka ɔriganisasiyɔn daminɛ na, ɲɛtaga juman lo kɛra? (koorilen nin lajɛ: “Yɛlɛmani minw kɛra diinan mɔgɔkɔrɔw koo la”). b) An bena ɲiningali jumanw lo jaabi sisan?

¹⁰ Ɲɛtaga min kɛra an ka ɔriganisasiyɔn daminɛ na, o ɲɛfɔra koorilen nin kɔnɔ: “Yɛlɛmani minw kɛra diinan mɔgɔkɔrɔw koo la.” Nka kɔsa la, Jehova tɛmɛna an ka Masacɛ fɛ cogo di ka ‘sanu’ di ‘ziranɛgɛ’ nɔɔ na? Duniɲa kuru bɛɛ la, o yɛlɛmaniw kɛra sababu ye cogo di hɛɛrɛ ni kelenya sabatira kafow kɔnɔ? O be ele yɛrɛ dɛmɛna cogo di ka “Hɛrɛtigi Ala” bato?

Krista be kafo ɲɛminɛna cogo di?

11. a) Bibulu sɛgɛsɛgɛri kɔ, Koow Ɲɛnabɔla Jɛnkulu ye mun lo faamu? b) U tun cɛsirinin lo ka mun lo kɛ?

¹¹ K’a ta saan 1964 ka taga a bila saan 1971, Koow Ɲɛnabɔla Jɛnkulu ye Bibulu sɛgɛsɛgɛri baara dɔ ɲɛminɛ. O kuun tun ye k’a lɔn kerecɛn kafow tun labɛnnin lo cogo min na saan kɛmɛkulu fɔlɔ la.a O sɛgɛsɛgɛri y’a yira k’o wagati la, kafo kɔrɔsili baara tun ma kalifa diinan mɔgɔkɔrɔ kelen dɔrɔn lo ma. Nka, a tun kalifara diinan mɔgɔkɔrɔw jɛnkulu dɔ lo ma (Filipikaw 1:1; 1 Timote 4:14 kalan). Koow Ɲɛnabɔla Jɛnkulu mɔgɔw y’a faamu ko u ka Masacɛ Yezu lo b’u ɲɛminɛna walisa u ka Ala ka jama ka koow labɛncogo fisaya. O balimaw tun cɛsirinin lo ka Masacɛ ka cikanw labato. U sinna ka yɛlɛmaniw kɛ walisa ɔriganisasiyɔn ka koow labɛncogo ka kɛ ka kɛɲɛ ni Bibulu ka fɔta ye diinan mɔgɔkɔrɔw koo la. Yɛlɛmani minw kɛra saan 1970 fan fɛ, u dɔw ye jumanw ye?

12. a) Yɛlɛmani juman lo kɛra Koow Ɲɛnabɔla Jɛnkulu koo la? b) A ɲɛfɔ Koow Ɲɛnabɔla Jɛnkulu labɛnnin lo cogo min na bi (koorilen nin lajɛ ɲɛɛ 130 kan: Koow Ɲɛnabɔla Jɛnkulu b’a janto Ala ka Masayakow la cogo min na”).

¹² Yɛlɛmani fɔlɔ min kɛra, o ɲɛsinna Koow Ɲɛnabɔla Jɛnkulu yɛrɛ lo ma. Fɔɔ ka na se o wagati ma, balimacɛ mɔlen wolonfila lo tun y’o jɛnkulu mɔgɔw ye ani olu fana lo tun ye Watch Tower tɔɔn ɲɛmɔgɔw ye. Nka saan 1971, mɔgɔ dɔw farala o jɛnkulu mɔgɔw kan. U kɛra mɔgɔ 11 ye ani u tun tɛ Watch Tower tɔɔn ɲɛmɔgɔw ye tugun. O jɛnkulumɔgɔw tun b’a jati k’u bɛɛ ye kelen ye ani u y’a daminɛ k’u ka lajɛnw ɲɛminɛ ka di ɲɔgɔn ma saan o saan.

13. a) Labɛn juman lo tora sen kan fɔɔ saan 40? b) Koow Ɲɛnabɔla Jɛnkulu ye mun lo kɛ saan 1972?

¹³ Yɛlɛmani filanan min kɛra, o tun ɲɛsinna kafow kelen kelen bɛɛ lo ma. Cogo di do? K’a ta saan 1932 ka taga se saan 1972, diinan mɔgɔkɔrɔ kelen dɔrɔn lo tun be kafo ɲɛminɛ. Fɔɔ ka na se saan 1936, o balimacɛ tun be weele ko kafo ɲɛmɔgɔ. Nka kɔfɛ, o tɔgɔ yɛlɛmana ka fɔ ko jɛnkulu baarakɛla. O kɔ, a tun be weele ko kafo baarakɛla, ani a laban, kafo kɔrɔsibaga. O balimaw tun be baara kɛ ni kisɛya ye walisa k’u janto Jehova ka sagakulu la Alako ta fan fɛ. O kama, kafo kɔrɔsibaga tun ka teli ka desizɔnw bɛɛ ta a kelen ani a tun tɛ kaan bɔ diinan mɔgɔkɔrɔ tɔɔw ma. Nka saan 1972, Koow Ɲɛnabɔla Jɛnkulu ye yɛlɛmaniba dɔ kɛ. O tun ye yɛlɛmani juman lo ye?

14. a) Labɛn kura juman lo daminɛna saan 1972 ɔkutɔburukalo tile fɔlɔ la? b) Ladili min be sɔrɔ Filipikaw 2:3 la, diinan mɔgɔkɔrɔw ka koow labɛnbaga b’o sira tagama cogo di?

¹⁴ Balimacɛ kelen dɔrɔn tun tɛna kafo ɲɛminɛ tugun. Nka sisan, kafo balimacɛ minw tun be Bibulu ka saratiw dafa, olu tun be se ka kɛ diinan mɔgɔkɔrɔw ye kafo kɔnɔ. Diinan mɔgɔkɔrɔw bɛɛ lajɛnnin be kɛ diinan mɔgɔkɔrɔw jɛnkulu ye. O jɛnkulu lo tun be kafo ɲɛminɛ. O labɛn kura bilara sen kan saan 1972, ɔkutɔburukalo tile fɔlɔ la. Bi bi nin na, diinan mɔgɔkɔrɔw ka koow labɛnbaga t’a jati ko ale ka fisa ni diinan mɔgɔkɔrɔ tɔɔw ye. Nka, a b’a yɛrɛ jati u bɛɛ la “fitini ye.” (Luka 9:48, Biblu Ala ta Kuma). O balimacɛ majigininw ye dugaba yɛrɛ lo ye balimaw fɛ duniɲa kuru bɛɛ la!—Filip. 2:3.

15. a) Diinan mɔgɔkɔrɔw labɛnna ka kɛ jɛnkulu ye minkɛ, nafa juman lo b’o la? b) Mun lo b’a yira ko an ka Masacɛ ye koow kɛ ni hakilitigiya ye?

¹⁵ Kafo ka kunkanbaaraw kalifara diinan mɔgɔkɔrɔw jɛnkulumɔgɔw lo ma minkɛ, o kɛra ɲɛtagaba yɛrɛ lo ye! An ka kuma o yɛlɛmani nafa saba koo la. A fɔlɔ, o min kɔrɔtanin lo kosɔbɛ: o labɛn ye diinan mɔgɔkɔrɔw bɛɛ dɛmɛ. U ka kunkanbaara mana kɛ min o min ye kafo kɔnɔ, u tɛ ɲinɛ ko Yezu lo ye kafo Kuntigi ye (Efɛz. 5:23). A filanan, i ko a fɔra Talenw 11:14 kɔnɔ cogo min na, “ladilikɛbaga caaman be na ni hɛrɛ ye.” Ni diinan mɔgɔkɔrɔw be kumaɲɔgɔnya kɛ kafo ka Alakow la ani u be u janto u kelen kelen bɛɛ ka miiriyataw la, u ka teli ka desizɔn ɲumanw ta minw bɛnnin lo ni Bibulu ka sariyakolow ye (Talenw 27:17). Jehova be diinan mɔgɔkɔrɔw duga o desizɔnw ɲɔgɔn kosɔn, ani o b’a to koow be ɲɛ u bolo. A sabanan, komi diinan mɔgɔkɔrɔw ka ca, ɔriganisasiyɔn be sera ka kafow mako wasa. Mɔgɔ caaman be kɛra Jehova sagokɛlaw ye minkɛ, ɔriganisasiyɔn mako be diinan mɔgɔkɔrɔw ni ɲɛminɛbagaw la walisa k’a janto kafow la (Ezayi 60:3-5). Miiri dɔɔni k’a filɛ: saan 1971, kafo 27 000 lo tun be yen. Saan 2013, u hakɛ cayara fɔɔ ka se 113 000 ni kɔ ma! A gwɛnin lo ko an ka Masacɛ kɔnna ka koow ye, ani an mako tun be diinan mɔgɔkɔrɔ minw na, a y’o di an ma wagati bɛnnin na.—Mise 5:5.

‘Aw ka kɛ ɲɛyirabagaw ye sagakulu la’

16. a) Diinan mɔgɔkɔrɔw ka kunkanbaara ye juman ye? b) Yezu ko diinan mɔgɔkɔrɔw ka ale ka “sagaw kɔlɔsi.” Bibulu Kalandenw ye o koo ta cogo di?

¹⁶ Kabi Bibulu Kalandenw ka koow daminɛ na, diinan mɔgɔkɔrɔw y’a faamu ko u ka kunkanbaara ye ka balimaw dɛmɛ u ka to kantigiya la Ala ye (Galatikaw 6:10 kalan). Saan 1908, Kɔrɔsili Sangaso ka barokun dɔ kumana Yezu ka cikan nin koo la: “Ne ka sagaw kɔlɔsi.” (Zan 21:15-17). O barokun kɔnɔ, a tun fɔra diinan mɔgɔkɔrɔw ye ko: “Matigi ye kunkanbaara kalifa an ma ko an k’an janto ale ka sagakulu la. A kɔrɔtanin lo an k’an dusu bɛɛ don o baara la. An k’a jati ko nɛɛmaba lo an fɛ ka Matigi ka kalandenw balo Alako ta fan fɛ ani k’an janto u la.” Saan 1925, Kɔrɔsili Sangaso sinsinna a kan tugun ko a kɔrɔtanin lo diinan mɔgɔkɔrɔw ka kɛ saga ladonbagaw ye. A y’u hakili jigi ko: “Ala ka legilizi ye Ala yɛrɛ ta lo ye, . . . ani nɛɛma min dira aw ma ko aw k’aw balimaw dɛmɛ, aw bɛɛ b’o kɛra cogo min na, aw bena o ɲɛfɔ Ala ye.”

17. Diinan mɔgɔkɔrɔw ye dɛmɛ juman lo sɔrɔ walisa ka kɛ kɔrɔsibaga ɲumanw ye kafo kɔnɔ?

¹⁷ Jehova ka ɔriganisasiyɔn ye diinan mɔgɔkɔrɔw dɛmɛ cogo di walisa u ka ‘warigbɛ di nɛgɛ’ nɔɔ na u ka saga ladonbaara la? A y’o kɛ fɔrɔmasɔn lo sababu fɛ. Masaya cidenyabaara lakɔli daminɛna saan 1959. O lakɔli labɛnna diinan mɔgɔkɔrɔw lo kama. O lakɔli ka kalan dɔ barokun tun ye ko: “An k’an janto u kelen kelen bɛɛ la.” U ye diinan mɔgɔkɔrɔw jija ko “u ka porogramu dɔ kɛ walisa ka to ka taga bɔ weleweledalaw ye u ka soo.” U y’a yira u la u be se ka weleweledalaw jija kosɔbɛ cogo caaman minw na n’u tagara bɔ u ye. Saan 1966, Masaya cidenyabaara lakɔli kalanw lakurayara. O kalanw dɔ tun b’a yira ko a kɔrɔtanin lo diinan mɔgɔkɔrɔw ka to ka taga bɔ balimaw ye. O kalan miiriya jɔnjɔn tun ye juman ye? O ye ko diinan mɔgɔkɔrɔw “ka ɲi k’u janto Ala ka sagakulu la ni kanuya ye. Nka, u man ɲi k’u mako bɔ u ka denbayamɔgɔw la ani ka waajuli baara bila ka suma.” A saan tɛmɛninw na, diinan mɔgɔkɔrɔw ka lakɔli caaman kɛra. U tora ka fɔrɔmasɔn sɔrɔ minkɛ, nafa juman lo sɔrɔla o la? Bi, balimacɛ waa caaman ye diinan mɔgɔkɔrɔw ye kafow kɔnɔ.

18. a) Kunkanbaaraba juman lo kalifara diinan mɔgɔkɔrɔw ma? b) Diinan mɔgɔkɔrɔ minw be baaraba kɛ, mun na u koo ka gwɛlɛ Jehova ani Yezu ma?

¹⁸ Jehova be tɛmɛ an ka Masacɛ Yezu fɛ ka diinan mɔgɔkɔrɔw sigi walisa u ka kunkanbaaraba dɔ dafa. O ye ka Ala ka sagakulu ɲɛminɛ wagati gwɛlɛ nunu na minw ɲɔgɔn ma kɛ ka ye (Efɛz. 4:11, 12; 2 Tim. 3:1). Diinan mɔgɔkɔrɔ minw be baaraba kɛ, u koo ka gwɛlɛ Jehova ni Yezu ma sabu u be Bibulu ka cikan nin labato: “Ala ka sagakulu min kalifalen bɛ aw ma, a’ ye aw janto o la . . . aw ka o kɛ ni diyaɲe ye . . . aw ka o kɛ ni ŋaniya ɲuman ye . . . aw ka kɛ . . . [ɲɛyirabagaw] ye sagakulu la.” (1 Piyɛri 5:2, 3, Bible senuma). Diinan mɔgɔkɔrɔw ye ɲɛyirabagaw ye sagakulu fɛ ani u be u jija walisa hɛɛrɛ ni ninsɔndiya ka to kafo kɔnɔ. U b’o kɛ cogo caaman na. An k’u la fila lajɛ.

Diinan mɔgɔkɔrɔw b’u janto Ala ka sagakulu la cogo di?

19. Ni diinan mɔgɔkɔrɔw be waajuli kɛ n’an ye, o be mun lo kɛ an na?

¹⁹ A fɔlɔ, diinan mɔgɔkɔrɔw be baara kɛ ni kafodenw ye. Evanzili sɛbɛbaga Luka y’a fɔ ko: “Yezu tun be yaala duguba ni dugudenninw na ka waajuli kɛ ka Ala ka masaya kibaru diman fɔ. A ka kalanden tan ni fila tun be n’a ye.” (Luka 8:1). I ko Yezu n’a ka kalandenw, diinan mɔgɔkɔrɔ minw ye ɲɛyirali ɲumanw ye bi, olu be waajuli kɛ n’u balimaw ye. U b’a faamu ko n’u b’o kɛ, o be kɛ sababu ye kafo kaan bɛnnin be to. Kafodenw be mun lo miiri o diinan mɔgɔkɔrɔw koo la? Balimamuso dɔ tɔgɔ ko Jeannine, ani bɛrɛ m’a sanda jɛn 90 na. A ko: “Waajuli kɛtɔ ni diinan mɔgɔkɔrɔ dɔ ye, n’ ye sababu ɲuman sɔrɔ ka baro kɛ n’a ye ani o y’a to n’ y’a lɔn ka ɲɛ.” Balimacɛ Steven be ni saan 35 ye ani a ko: “Ni diinan mɔgɔkɔrɔ dɔ be waajuli kɛra ni n’ ye soo ni soo, n’ b’a ye ko a b’a fɛ ka n’ dɛmɛ. O dɛmɛ ɲɔgɔn ka di n’ ye kosɔbɛ.”

20, 21. Yezu ye ntalen min la sagadɛndɛla koo la, diinan mɔgɔkɔrɔw be se k’o sagadɛndɛla ladegi cogo di? Misali dɔ fɔ (koorilen nin fana lajɛ: “Viziti dɔw, nafaba sɔrɔla minw na”).

²⁰ A filanan, Jehova ka ɔriganisasiyɔn ye fɔrɔmasɔn di diinan mɔgɔkɔrɔw ma walisa balimaw minw y’u yɔrɔ janya kafo la, u k’u mako don u la (Eburuw 12:12). O balima minw sumana Alako ta fan fɛ, mun na diinan mɔgɔkɔrɔw ka kan k’u dɛmɛ, ani u ka ɲi k’o kɛ cogo di? An b’o jaabili sɔrɔ Yezu ka ntalen dɔ la, a ye min la sagadɛndɛla ani saga tununin koo la (Luka 15:4-7 kalan). Tuma min na o sagadɛndɛla y’a ye ko a ka saga kelen tununa, a tagara a yɔrɔ yaala i n’a fɔ ale kelen dɔrɔn lo y’a ka saga ye. Bi, diinan mɔgɔkɔrɔw b’o sagadɛndɛla ladegi cogo di? Saga min tun tununa, a koo tun ka gwɛlɛ sagadɛndɛla ma. O cogo kelen na, minw ye u yɔrɔ janya kafo la, olu fana koo ka gwɛlɛ diinan mɔgɔkɔrɔw ma. U b’o balimaw jati i ko saga tununinw. U t’a jati ko n’u b’u yɔrɔ ɲinina, u b’u ka wagati tiɲɛna le. Sagadɛndɛla y’a latigɛ “ka taga [saga] kelen nin yaala fɔɔ k’a ye.” O cogo kelen na, minw ye u yɔrɔ janya kafo la, diinan mɔgɔkɔrɔw b’a latigɛ k’u yɔrɔ yaala ani k’u dɛmɛ.

²¹ Tuma min na sagadɛndɛla y’a ka saga nin ye, a ye mun lo kɛ do? A y’a “ta k’a bila a kaan na ni nisɔndiya ye” ani ka taga n’a ye saga tɔɔw yɔrɔ la. O cogo kelen na, mɔgɔ min sumana Alako ta fan fɛ, diinan mɔgɔkɔrɔ dɔ ka kumaw n’a ka kɛwale ɲumanw be se k’o tigi dɛmɛ a be wuli dɔɔni dɔɔni ka kɔsegi kafo kɔnɔ. O ɲɔgɔn lo ye Afiriki balima dɔ sɔrɔ min tɔgɔ ko Victor. A tun y’a mabɔ kafo la. A ko: “N’ sumana Alako ta fan fɛ saan seegi minw na, diinan mɔgɔkɔrɔw tora k’a ɲini ka n’ dɛmɛ.” Mun lo y’a dusu sɔrɔ kosɔbɛ? Victor ko: “Diinan mɔgɔkɔrɔ dɔ tun be yen min tɔgɔ ko John. An tun ye piyɔniyew ka lakɔli kɛ ɲɔgɔn fɛ. Loon dɔ, a nana bɔ n’ ye ani a ye wagati ta ka foto dɔw yira n’ na an tun ye minw ta ɲɔgɔn fɛ o lakɔli la. O fotow ye n’ hakili jigi koo diiman caaman na. N’ y’a ye n’ ninsɔn tun ka di cogo min na tuma min na n’ tun be Jehova sago kɛra, ani n’ tora ka miiri o la.” Dɔɔni o kɔ, Victor y’a daminɛ ka jɛn ni kafo ye kokura. Bi bi nin na, kudayi piyɔniye lo tugun. Tiɲɛn na, diinan mɔgɔkɔrɔ minw b’u janto an na, olu be dɔ fara an ka ninsɔndiya kan.—2 Kor. 1:24.b

An ka kelenya sabatira labɛnko ɲuman barika la

22. Cogo juman na tilenninya ni hɛɛrɛ kɛra sababu ye kafo ka kelenya sabatira? (koorilen nin fana lajɛ: “O y’an kabakoya yɛrɛ le!”).

²² I ko an y’a fɔ ka tɛmɛ cogo min na, Jehova tun kɔnna k’a fɔ ko dɔ bena to ka fara a sagokɛlaw ka tilenninya n’u ka hɛɛrɛ kan (Ezayi 60:17). O jogo fila nunu bɛɛ be kafo ka kelenya sabati. Cogo di do? An ka kuma tilenninya koo la. An k’a to an hakili la ko “Masaba [Jehova] an ka Ala ye Ala kelenpe ye.” (Deter. 6:4). A ka sariyaw tilennin lo, ani i mana taga kafo o kafo kɔnɔ, u tɛ yɛlɛma. A be ɲuman ni juguman jati cogo min na, a ka sariyaw ye kelen ye o koo la “Ala ka jama cɛma yɔrɔ bɛɛ la.” (1 Kor. 14:33). O la, kafo tɛ se ka sabati ni kafodenw tɛ Ala ka sariyaw labato. Sisan, an ka kuma hɛɛrɛ koo la. An ka Masacɛ b’a fɛ an ka kɛ hɛɛrɛ la ani an ka kɛ “hɛrɛɲinibagaw” ye (Mat. 5:9). “O la sa, an ka banba ka to hɛrɛ la ɲɔgɔn fɛ.” Cogo di do? Bɛnbaliyako minw be se ka kɛ an ni ɲɔgɔn cɛ, an k’a latigɛ k’u ɲɛnabɔ (Ɔrɔm. 14:19). O cogo la, an be kɛ sababu ye hɛɛrɛ ni kelenya be sabati kafo kɔnɔ.—Ezayi 60:18.

23. Mun lo be Jehova sagokɛlaw ninsɔndiya bi bi nin na?

²³ Saan 1895 novanburukalo la, balima minw tun be ɔriganisasiyɔn ɲɛminɛna, u ye labɛn fɔlɔ kofɔ diinan mɔgɔkɔrɔw koo la Kɔrɔsili Sangaso kɔnɔ. O wagati kelen na, u y’a fɔ fana u tun be min ɲinina delili la o labɛn koo la. U tun b’a fɛ o labɛn ka Ala sagokɛlaw dɛmɛ “joona joona walisa u kaan ka bɛn Ala batoli la.” N’an ye jatiminɛ kɛ saan caaman tɛmɛninw koo la, an dusu ka di k’a ye ko Jehova tora ka tɛmɛ an ka Masacɛ fɛ ka yɛlɛmaniw kɛ an ka koow labɛncogo la. O ye an ka kelenya sabati (Zab. 99:4). O kɛra sababu ye, bi bi nin na duniɲa kuru bɛɛ kɔnɔ, Jehova sagokɛlaw “ka kɛtaw” n’u ka “miirili” bɛɛ ye kelen ye, ani u be “Hɛrɛtigi Ala” bato “ni dusu kelen ye.”—2 Kor. 12:18, Bible senuma; Sofoni 3:9 kalan.