Wari minɛcogo

An bɛɛ mako be wari la walisa k’an ka denbayaw mako ɲɛ (Talenw 30:8). Tiɲɛn na, wari be “mɔgɔ sutara.” (Waajulikɛla 7:12). N’a sɔrɔ a man nɔgɔ e ni furuɲɔgɔn fɛ ka baro kɛ wari koo la. Nka, i kana a to wariko k’i ka furu nagasi (Efɛzikaw 4:32). Cɛɛ n’a muso ka ɲi ka la ɲɔgɔn na ani k’a latigɛ ɲɔgɔn fɛ u bena min kɛ n’u ka wari ye.

1 A’ YE JATIMINƐ KƐ KOƝUMAN

BIBULU BE MIN FƆ: “Aw cɛma ni mɔgɔ dɔ b’a fɛ ka sangaso jamanjan lɔ, a te sigi fɔlɔ k’a lɔsɔngɔ jati k’a filɛ yala n’a ka wari bena se k’o baara laban wa?” (Luka 14:28). A kɔrɔtanin lo aw k’a latigɛ ɲɔgɔn fɛ aw bena min kɛ n’aw ka wari ye (Amɔsi 3:3). A’ y’a latigɛ aw mako be min na ani aw be se ka wari hakɛ min don o la (Talenw 31:16). Hali ni see be aw ye ka fɛɛn dɔ san, o kɔrɔ tɛ ko waajibi lo aw k’a san. A’ ye banba, aw kana juru ta. Aw ka sɔrɔ ye min ye, a’ ye dan o ma.—Talenw 21:5; 22:7.

I BE SE KA MIN KƐ:

• Kalosa la, n’aw ka wari tɔɔ tora, a’ y’a latigɛ ɲɔgɔn fɛ aw bena min kɛ n’a ye

• Ni aw ka wari ma bɔri kɛ, a’ ye labɛn tigitigi dɔw kɛ walisa ka dɔ bɔ aw ka musakaw la. Ɲɛyirali fɛ, aw be se ka tobili kɛ soo kɔnɔ sanni ka bɔ ka taga dumuni kɛ kɛnɛma

2 I KƆNƆ GWƐ ANI HAKILI SƆRƆ

BIBULU BE MIN FƆ: “An t’a fɛ ka tilenninya kɛ Matigi dama ɲakɔrɔ, an b’a fɛ k’a kɛ mɔgɔw ɲakɔrɔ fana.” (2 Korɛntikaw 8:21). I be wari hakɛ min sɔrɔ ani i be min dumu a la, i kɔnɔ gwɛ k’o fɔ i furuɲɔgɔn ye.

Tuma o tuma, n’i b’a fɛ ka kooba dɔw latigɛ wariko ta fan fɛ, i ka baro kɛ o kan n’i furuɲɔgɔn ye (Talenw 13:10). N’aw be kumaɲɔgɔnya kɛ wari koo la, o bena a to hɛɛrɛ ka kɛ aw ka furu kɔnɔ. Kana i ka sɔrɔ jati i kelen ta ye, nka a jati ko denbaya bɛɛ ta lo.—1 Timote 5:8.

I BE SE KA MIN KƐ:

• A’ ye bɛn a la aw kelen kelen be se ka wari daa min dumu n’a m’a sara tɔɔ kelen na

• Kana a to gwɛlɛya dɔ be sɔrɔ e n’i furuɲɔgɔn cɛ i be sɔrɔ ka kuma wari koo la