Yezu kisɛyanin lo tiɲɛn batoli koo la

Yezu bɔnin kɔ kɔɲɔya la Kana dugu la, ale n’a bamuso n’a badenw Zaki, Yusufu, Simɔn ni Zuda tagara Kapɛrnaum dugu la. A badenw tun ye a lamɔfa Yusufu deenw ye.

Nka, mun na Yezu tagara Kapɛrnaum? O dugu yiriwanin lo ka tɛmɛ Nazarɛti ni Kana dugu kan ani a ka bon. Ka fara o kan, Yezu ka kalanden kura caaman tun be Kapɛrnaum dugu la wala a gɛrɛfɛ yɔrɔw la. O la, Yezu be se k’u kalan koo caaman na k’u to u ka mara la.

Yezu tun be Kapɛrnaum tuma min na, a ye kabako dɔw kɛ. A ye koo minw kɛ, dugumɔgɔw ni dugu gɛrɛfɛ mɔgɔw y’o mɛn. Saan 30 ka Tɛmɛnkan seli sera ka ban. Komi Yezu n’a ka kalandenw ye Yahutu kantigiw ye, yanni dɔɔni u ka ɲi ka taga o seli kɛ Zeruzalɛmu.

U senin kɔ Alabatoso kɔnɔ Zeruzalɛmu, koo dɔ ye Yezu ka kalandenw kabakoya! U ye Yezu ye a be koo dɔ kɛra ani u tun m’a miiri ko a tun be se k’o kɛ.

Ala ka sariya tun b’a ɲini Israɛldenw fɛ u ka bɛgɛnw saraka Alabatoso kɔnɔ. Ka fara o kan, minw be na Tɛmɛnkan seli la, u mako be dumunifɛnw na. O kosɔn, Ala ka sariya tun b’a to mɔgɔ minw be bɔ dugu wɛrɛw la ka na Zeruzalɛmu, olu ka na ni wari ye u bolo walisa ka se ka misi, saga, bakɔrɔnin wala fɛɛn wɛrɛw san (Deteronɔmu 14:24-26). Mun sɔrɔla o la do? Jagokɛla minw be Zeruzalɛmu, olu be bɛgɛnw feere hali Alabatoso ka luba kɔnɔ. Ka fara o kan, dɔw be ta o ma ka fɛɛnw sɔngɔ gwɛlɛya kojugu.

O koo ye Yezu dusu gwan. A ye warifalenbagaw ka wari bɔn, k’u ka tabaliw yɛlɛma ani k’olu n’u ka sannikɛlaw gwɛn ka bɔ Alabatoso kɔnɔ. Yezu y’a fɔ u ye ko: “Aw ye nunu ta ka bɔ yan! Aw kana n Faa ka soo kɛ jago kɛyɔrɔ ye.”—Zan 2:16.

Yezu ka kalandenw y’o ye minkɛ, u hakili jigira kiraya kuma dɔ la min ɲɛsinna Ala Dencɛ ma ko: “E ka soo hami be ne tɔɔrɔ n dusu la kosɔbɛ.” Nka, Yahutuw y’a ɲininga ko: “I be se ka kabako jumɛn kɛ min b’a yira an na ko i ka kan ka nin kɛ?” Yezu y’u jaabi ko: “Aw ka Alabatosoba nin ci, ne ben’a lɔ tile saba kɔnɔ.”—Zan 2:17-19; Zaburuw 69:10.

U y’a miiri ko Yezu kaan be Zeruzalɛmu Alabatoso lo ma. O kama, u y’a ɲininga ko: “I ko di? Soo nin lɔra saan bi naani ni wɔɔrɔ kɔnɔ, e ko i bena o lɔ tile saba kɔnɔ kɛ!” (Zan 2:20). Nka, Yezu tun kaan be a yɛrɛ farikolo lo ma. Saan saba o kɔ, a ka kalandenw hakili jigira o kumaw na tuma min na a kununa ka bɔ saya la.