Kalanden naani bena kɛ mɔgɔ ɲinilaw ye

Nazarɛtikaw tun y’a ɲini ka Yezu faga. O kɔ, Yezu tagara Kapɛrnaum, Galile baji gɛrɛfɛ, o be min weele fana ko “Zenezarɛti baa daa.” (Luka 5:1). O be Ezayi ka kiraya kuma dafa. Ezayi tun ko Galileka minw be baji daa la, olu tun bena yeelenba dɔ ye.—Ezayi 8:23; 9:1.

O yɔrɔ la Galile, Yezu tora k’a fɔ ko “sankolo masaya waati surunyana.” (Matiyo 4:17). Yezu y’a ka kalanden naani sɔrɔ yen. Wagati damanin ka kɔn o ɲɛ, u ni Yezu tun be ɲɔgɔn fɛ. Nka, u kɔseginin kɔ ka bɔ Zude, u y’u ka mɔni baara daminɛ tugun (Zan 1:35-42). Wagati sera sisan u ka to ni Yezu ye kudayi walisa a ka se ka fɔrɔmasɔn di u ma. O la, u bena se k’u ka cidenya baara dafa Yezu taganin kɔ.

Yezu tagamatɔ baa daa la, a ye Simɔn Piyɛri n’a balimacɛ Andere ani mɔnikɛla dɔw ye, u b’u ka jɔɔw kora. Yezu gwɛrɛla u la ka don Piyɛri ka kurun kɔnɔ ani a y’a fɔ a ye ko a ka taga ni kurun ye jii cɛmancɛ la dɔɔni k’u mabɔ jama la. Tuma min na u janfara dɔɔni, Yezu sigira ani a y’a daminɛ ka jama kalan ka tiɲɛn fɔ u ye Masaya koo la.

O kɔ, Yezu y’a fɔ Piyɛri ye ko: “Jii ka dun yɔrɔ min na, taga ni kurun ye o yɔrɔ la k’aw ka jɔɔ fili.” Piyɛri y’a jaabi ko: “Karamɔgɔ, an ye baara kɛ ka dugu gwɛ, an ma foyi sɔrɔ. Nga i ka kuma kosɔn, ne bena jɔɔ fili jii la.”—Luka 5:4, 5.

U ye jɔɔ fili jii kɔnɔ ani u ye jɛgɛ caaman minɛ fɔɔ jɔɔ y’a daminɛ ka faran! U tɔɲɔgɔn minw tun be kurun wɛrɛ kɔnɔ, u sinna k’a fɔ olu ye ko u ka na u dɛmɛ. O kurun fila bɛɛ fara jɛgɛ la fɔɔ u y’a daminɛ ka jigi jii jukɔrɔ. Piyɛri y’o ye minkɛ, a y’a kunbiri gwan Yezu kɔrɔ k’a fɔ ko: “Matigi, kana gwɛrɛ n na, bari ne ye hakɛkɛla ye.” Yezu y’a jaabi ko: “Kana siran. Kabini sisan, i bena mɔgɔw le ɲini Ala ye.”—Luka 5:8, 10.

Yezu y’a fɔ Piyɛri ni Andere ye ko: “A’ ye tugu ne la, ne na aw kɛ mɔgɔ ɲininaw ye.” (Matiyo 4:19, ABM). A ye mɔnikɛla fila wɛrɛ weele fana: Olu ye Zebede dencɛw ye, Zaki ani Zan. Olu fana tugura a kɔ hali u ma sigasiga. O la, o mɔgɔ naani y’u ka mɔnibaara to yen ani u kɛra kalanden fɔlɔw ye minw tugura Yezu kɔ kudayi.