Yezu be kabakobaw kɛ kapɛrnaum dugu la

Yezu ye kalanden naani weele u ka kɛ mɔgɔ ɲinilaw ye: Piyɛri, Andere, Zaki ani Zan. Sisan, u bɛɛ tagara Kapɛrnaum ka Alabatoso kɔnɔ, lafiɲɛlon na. O yɔrɔ la, Yezu ye mɔgɔw kalan ani u kabakoyara tugun a ka kalankɛcogo kosɔn. A m’u kalan i n’a fɔ sariya karamɔgɔw, nka a y’u kalan ni barika ye.

O lafiɲɛlon na, jinatɔcɛ dɔ tun be Alabatoso kɔnɔ. A pɛrɛnna ko: “Mun be an ni e cɛ, Nazarɛtika Yezu? I nana k’an halaki wa? I ye mɔgɔ min ye, ne b’o lɔn. I ye Ala ka ciden senuman ye.” Yezu sɔngɔra o jina kun na ko: “I daje ka bɔ cɛɛ nin na!”—Mariki 1:24, 25.

O wagati la, jina ye cɛɛ ta ka ben duguma. A tora ka cɛɛ yuguyugu fanga la ani ka kule ni kaanba ye. A laban, o jina bɔra a la. “Nga foyi ma kɛ cɛɛ la.” (Luka 4:35). Mɔgɔ minw tun b’a gɛrɛfɛ Alabatoso kɔnɔ, u bɛɛ kabakoyara! U ko: “Nin ye kabako ye dɛ . . . Hali jinaw be sɔn a ta ma.” (Mariki 1:27). Ayiwa, o kabako ye Galile dugu bɛɛ ta.

O kɔ, Yezu n’a ka kalandenw tagara Simɔn ka soo, u be min weele fana ko Piyɛri. Piyɛri buranmuso tun be yen ani a fari tun gwannin lo kosɔbɛ. Kalandenw ye Yezu deli ko a k’a dɛmɛ. O kama, Yezu gwɛrɛla a la, k’a bolo minɛ k’a wuli. A kɛnɛyara o yɔrɔnin bɛɛ ani a ye baara daminɛ walisa ka Yezu n’a ka kalandenw mako ɲɛ. N’a sɔrɔ a ye gwa lo kɛ u ye.

Tileben fan fɛ, mɔgɔw bɔra yɔrɔ bɛɛ ka na n’u ka banabagatɔw ye Piyɛri ka soo. Dɔɔni, a kɛra i n’a fɔ dugu bɛɛ lo lajɛnna Piyɛri ka daa la. Mun na do? U b’a fɛ Yezu k’u kɛnɛya. “Mɔgɔw tagara Yezu sɛgɛrɛ n’u ka banabagatɔw bɛɛ ye. A y’a bolo la u kelen kelen bɛɛ kan k’u kɛnɛya.” (Luka 4:40). Tiɲɛn na, bana o bana tun b’u la, Yezu y’u bɛɛ kɛnɛya i ko kira Ezayi tun kɔnna k’a fɔ cogo min na (Ezayi 53:4). A ye jinatɔw yɛrɛ kɛnɛya. O jinaw bɔtɔ, u tun be kule ko: “I ye Ala Dencɛ ye.” (Luka 4:41). Nka Yezu y’u kɔrɔfɔ ani a m’a to u ka kuma. U b’a lɔn ko Yezu lo ye Krista ye, ani a t’a fɛ jinaw k’a kɛ i n’a fɔ u ye tiɲɛn Ala sagokɛlaw ye.