Yezu ko Matiyo ka tugu ale kɔ

Murukucɛ kɛnɛyanin kɔ, Yezu tora Kapɛrnaum dugu la Galile baji gɛrɛfɛ ka wagati dɔɔni kɛ yen. Jama nana a fɛ tugun ani a y’a daminɛ k’u kalan. K’a to sira kan, a ye Matiyo ye, u be min weele fana ko Levi. A siginin be lanpominɛlaw ka baarakɛyɔrɔ la. Yezu y’a weele k’a fɔ a ye ko: “Tugu ne kɔ.”—Matiyo 9:9.

I n’a fɔ Piyɛri, Andere, Zaki ani Zan, n’a sɔrɔ Matiyo fana ye Yezu ka kalanw koo mɛn ka ban. Yezu ye kabako minw kɛ Kapɛrnaum mara la, n’a sɔrɔ ale fana y’u koo mɛn. O kama, ale fana sinna ka tugu Yezu kɔ. A b’o lakali a ka Evanzili kɔnɔ ko: “Matiyo wilila ka tugu a kɔ.” (Matiyo 9:9). O cogo la, Matiyo y’a ka lanpo baara to yen ka kɛ Yezu ka kalanden ye.

O kɔ, Matiyo ye fɛtiba dɔ kɛ a ka soo. N’a sɔrɔ a b’a fɛ k’a yira Yezu la ko a b’a waleɲuman lɔn o nɛɛma kosɔn. Yezu n’a ka kalandenw tun b’o fɛti la. Jɔn lo tun be yen tugun? Matiyo y’a ka baarakɛɲɔgɔn kɔrɔw weele ka na. U be lanpow minɛ Ɔrɔmu ka faamanw ye. O faamanw koo ka gwo mɔgɔw ye. Yahutuw fanba b’o lanpominɛlaw jati cogo di? U koo man di mɔgɔw ye sabu mɔgɔw ka ɲi ka lanpo min sara, olu ka teli ka dɔ fara o kan. ‘Hakɛkɛlaw,’ o kɔrɔ, kakalaw fana b’o fɛti la.—Luka 7:37-39.

Fariziɲɛw b’o fɛti la ani u be Yezu filɛra o mɔgɔw cɛma. Komi u b’u yɛrɛ jati mɔgɔ tilenninw ye, u ye Yezu ka kalandenw ɲininga ko: “Mun na aw ka karamɔgɔ be dumuni kɛ ni lɛnpominɛlaw ani hakɛkɛlaw ye?” (Matiyo 9:11). Yezu y’u ka kuma mɛn minkɛ, a ko: “Mɔgɔ minw ka kɛnɛ, olu mako te furakɛla la, banabagatɔw le mako b’a la. Aw ye taga miiri Ala ka kuma nin kɔrɔ la. A tun y’a fɔ ko: ‘Ne be makari le fɛ, ne te saraka fɛ,’ bari ne ma na mɔgɔtilenninw wele, nga ne nana hakɛkɛlaw le wele.” (Matiyo 9:12, 13; Oze 6:6). Fariziɲɛw be Yezu weele ko “karamɔgɔ,” nka, u t’a jati o cogo la. N’u tun sɔnna a ka kalanw na, u tun bena a lɔn tilenninya ye min ye.

A be komi Matiyo ye lanpominɛlaw ni hakɛkɛlaw weele ka na a ka soo walisa u ka se ka Yezu ka kumaw lamɛn “bari olu ɲɔgɔn caaman tun be to ka tugu Yezu kɔ.” (Mariki 2:15). Yezu b’a fɛ k’u dɛmɛ ka jɛnɲɔgɔnya ɲuman kɛ ni Ala ye. Fariziɲɛ minw b’u yɛrɛ jati mɔgɔ tilenninw ye, olu be o mɔgɔw mafiɲɛya. Nka, Yezu t’u jati o cogo la. O mɔgɔw makari yɛrɛ y’a minɛ. I n’a fɔ dɔgɔtɔrɔ be banabagatɔ dɛmɛ cogo min na a ka kɛnɛya, Yezu b’o mɔgɔw dɛmɛ ka jɛnɲɔgɔnya ɲuman kɛ ni Ala ye.

Yezu be makari lanpominɛlaw ni hakɛkɛlaw la. O kɔrɔ tɛ ko a b’a ɲɛɛ tugu u ka jurumuw kan dɛ. Nka, a b’o kɛ k’a yira ko a b’a janto u la ni kanuya ye, i n’a fɔ a y’a janto banabagatɔw la cogo min na. An hakili b’a la ko a makarila kunatɔcɛ dɔ la minkɛ, a magara a la ani a ko: “N sɔnna ko i ka kɛnɛya.” (Matiyo 8:3). I ko Yezu, an fana ka ɲi ka hinɛ mɔgɔw la. Min yɛrɛ kɔrɔtanin lo, o ye k’u dɛmɛ Alako ta fan fɛ.