Jɛnɲɔgɔnya min be Yezu n’a Faa cɛ

Yahutu dɔw ye Yezu jalaki ko a ma lafiɲɛlon sariya labato sabu a ye cɛɛ dɔ kɛnɛya lafiɲɛlon na. Yezu y’u jaabi ko: “N Faa be baara la halibi, o la, ne fana b’a kɛ.”—Zan 5:17.

Yezu ye min kɛ, o tɛ Ala ka sariya tiɲɛ lafiɲɛlon koo la. Yezu be waajuli kɛ ani a be mɔgɔw kɛnɛya walisa k’a Faa ka baara ɲumanw ladegi. O lo kama, a be to ka koo ɲuman kɛ loon bɛɛ. Yezu ka jaabili y’a jalakibagaw kɔnɔ gwan kosɔbɛ ani u b’a ɲinina k’a faga. Mun na u dimina do?

U b’a miiri ko Yezu tɛ lafiɲɛlon sariya labato sabu a be mɔgɔw kɛnɛya lafiɲɛlon na. Nka o dɔrɔn tɛ, u dimina kosɔbɛ fana sabu Yezu y’a fɔ ko ale ye Ala Dencɛ ye. Olu fɛ, ni Yezu ko Jehova y’ale Faa ye, a be komi a b’a yɛrɛ sumana ni Ala ye. U b’a jati k’o ye Ala tɔgɔ tiɲɛniko lo ye. Nka, Yezu ma siran u ɲɛ. A y’u jaabi walisa k’a yira ko jɛnɲɔgɔnya kɛrɛnkɛrɛnnin be ale ni Ala cɛ. A ko: “Deen koo ka di a Faa ye, o la a b’a ka koo kɛta bɛɛ yira a la.”—Zan 5:20.

Faa ye ɲɛnamaya Dibaga ye ani a y’o yira galen tuma min na a ye setigiya di cɛɛ dɔw ma ka suu dɔw kunu. Yezu y’a fɔ ko: “N Faa be suuw kunun ka nii di u ma cogo min na, o cogo kelen na, a Deen fana be nii di a diyanamɔgɔw ma.” (Zan 5:21). O kuma kɔrɔ ka bon ani a be jigiya di mɔgɔ ma siniɲasigi koo la! Dencɛ be suuw lakununa Alako ta fan fɛ kabi sisan yɛrɛ. Yezu y’a fɔ ko: “Ne b’a fɔ aw ye ko ni mɔgɔ min ye n ka kuma lamɛn ka la n cibaga la, o tigi ye nii banbali sɔrɔ. A tena kiti, a niin bɔra saya la ka don hɛrɛ la ka ban.”—Zan 5:24.

O tuma na, a tun ma fɔ yɔrɔ si ko Yezu ye mɔgɔ dɔ kunu ka bɔ saya la. Nka, a y’a fɔ a jalakibagaw ye ko suuw bena kunu yɛrɛ yɛrɛ la. A ko: “Waati bɛ na, mɔgɔ salen minnu bɛ kaburuw kɔnɔ, olu n’a kan mɛn. U na bɔ yen.”—Zan 5:28, 29, ABM.

Tiɲɛn lo ko Yezu lɔyɔrɔ ka bon kosɔbɛ. Nka, a y’a yira ka gwɛ ko Ala y’ale Kuntigi ye. A ko: “Ne te se ka foyi kɛ n yɛrɛ ma. . . . Ne te n yɛrɛ sago kɛra fɔɔ ne cibaga sago.” (Zan 5:30). Yezu be ni lɔyɔrɔba min ye Ala sagonata koo la, a siɲɛ fɔlɔ lo k’o ɲɛfɔ jamaba ɲɛɛ na. Nka, Yezu jalakibagaw be ni seereya wɛrɛw ye minw b’a yira ko Yezu lɔyɔrɔ ka bon. Yezu y’u hakili jigi ko: “Aw tun ye mɔgɔw ci Zan [Batizelikɛla] fɛ k’a ɲininga. A ye tiɲɛ fɔ aw ye ne ka koo la.”—Zan 5:33.

A saan fila ɲɔgɔn ye nin ye, Zan tun y’a fɔ Yahutu diinan kuntigiw ye ko Mɔgɔ dɔ bena na ale kɔ min bena weele ko “Kiraba” ani “Ala ka Mɔgɔ wolomanin [wala Krista].” Yezu jalakibagaw tun y’o kuma mɛn (Zan 1:20-25). Yezu y’u hakili jigi ko u tun be bonya la kosɔbɛ Zan kan fɔlɔ la, nka sisan a be kaso la. O kɔ, Yezu y’a fɔ u ye ko: “Aw tun b’a fɛ ka nisɔndiya a ka yeelen fɛ waatinin kɔnɔ.” (Zan 5:35). Yezu ka seereya do kɔrɔtanin lo ka tɛmɛ Zan batizelikɛla ta kan.

Yezu ko: “Ne be minw kɛ [i n’a fɔ ka mɔgɔ kɛnɛya i ko a y’a kɛ cogo min na a ma mɛɛn], o le b’a yira ko Faa ye ne ci. N Faa min ye n ci, ale fana be ne koo fɔ.” (Zan 5:36, 37). Ɲɛyirali fɛ, Ala ye seereya kɛ Yezu koo la a batize tuma na.—Matiyo 3:17.

Tiɲɛn na, joo tɛ Yezu jalakibagaw fɛ ka ban ka la a la. U b’a fɔ k’u be Ala ka Kuma min sɛgɛsɛgɛ, o Kuma yɛrɛ be seereya kɛ Yezu koo la. Yezu y’a ka kuma kuncɛ ko: “N’aw tun lara Musa la, aw tun bena la ne la. Bari Musa ye ne le koo fɔ a ka sɛbɛ kɔnɔ. A ye min sɛbɛn, n’aw ma la o la, ne be min fɔra, aw bena se ka la o la cogo di?”—Zan 5:46, 47.