U ye sumankisɛw tigɛ lafiɲɛlon na

Yezu n’a ka kalandenw be tagara saheli fan fɛ, Galile mara la. Sumanw kɔgɔra ka ban forow kɔnɔ. Kɔngɔ be kalandenw na minkɛ, u ye sumankisɛ dɔw tigɛ k’u ɲimi. Nka, lafiɲɛlon lo ani u be min kɛra, Fariziɲɛw y’o ye.

I hakili to a la ko Yahutuw ye Yezu jalaki Zeruzalɛmu ko a ye lafiɲɛlon sariya tiɲɛ. U tun b’a fɛ k’a faga o kosɔn. Sisan, Fariziɲɛw be Yezu jalakira a ka kalandenw ka kɛwalew lo kosɔn. U ko: “A filɛ, koo min daganin te lafiɲɛlon na, i ka kalandenw b’o kɛra.”—Matiyo 12:2.

Ka sumankisɛw bɔ, k’u tereke i tɛgɛw la ani k’u ɲimi, Fariziɲɛw b’a jati ko i ye suman lo tigɛ ani k’a gosi (Ɛkizɔdi 34:21). U be baara koo jati cogo min na, o ye lafiɲɛlon gwɛlɛya mɔgɔw ma. K’a sɔrɔ fɔlɔfɔlɔ la, lafiɲɛlon tun ye ninsɔndiya loon lo ye ani a tun be barika don mɔgɔ la Alako ta fan fɛ. Yezu tɛmɛna ɲɛyirali dɔw fɛ k’a yira ko Fariziɲɛw ka miiriya tilennin tɛ ani ko Jehova t’a fɛ mɔgɔ ka lafiɲɛlon labato o cogo la.

Ɲɛyirali fɔlɔ ɲɛsinna Dawuda n’a nɔfɛmɔgɔw ma. Kɔngɔ y’u minɛ minkɛ, u donna Ala ka fanibugu kɔnɔ. Buru minw tun be bila Ala ɲɛɛ kɔrɔ, u y’o dumu. O buruw tun tara ka bɔ Jehova ɲɛɛ kɔrɔ ani kuramanw bilara u nɔɔ na. Sarakalasebagaw dɔrɔn lo tun ka ɲi k’o buru kɔrɔmanw dumu. Nka, Ala ma Dawuda n’a nɔfɛmɔgɔw jalaki sabu u y’o buruw dumu.—Levitiki 24:5-9; 1 Samuyɛli 21:1-6.

Ɲɛyirali filanan kɔnɔ, Yezu ko: “Aw m’a kalan ka ye sariya sɛbɛ kɔnɔ wa, ko sarakalasebagaw be baara kɛ Alabatosoba kɔnɔ lafiɲɛlon, k’a sɔrɔ u te jalaki fana?” O kɔrɔ ko lafiɲɛlon na, u be bɛgɛnw saraka ani u be baara wɛrɛw kɛ Alabatoso kɔnɔ. O kɔ, Yezu y’a fɔ ko: “Ne b’a fɔ aw ye ko mɔgɔ be yan min ka fisa ni Alabatosoba ye.”—Matiyo 12:5, 6; Nɔnburuw 28:9.

Yezu basigira Ala ka Kuma kan k’a ka kuma kɔrɔ yira ko: “Ala y’a fɔ a ka kuma na ko: ‘Ne be makari le fɛ, ne te saraka fɛ.’ N’aw tun b’o kɔrɔ lɔn, mɔgɔ minw ma kojugu kɛ, aw tun tena sariya boli olu kɔɔ kan.” A y’a ka kuma kuncɛ ko: “Mɔgɔ Dencɛ ye lafiɲɛlon kuntigi ye.” Yezu tun kaan be a ka saan waa kelen mara nata lo ma, o min na hɛɛrɛ bena kɛ.—Matiyo 12:7, 8; Oze 6:6.

Kabi wagatijan adamadenw be tɔɔrɔla Sutana ka kuntigiya kosɔn. Fariyakow ani marifakɛlɛw lo be yen. O koo ɲɔgɔnw tɛna kɛ Lafiɲɛlonba wagati la, o min ye Krista ka mara wagati ye. An mako be lafiya min na, a bena o di an ma!