Yezu: ale lo “ye dumunifɛn ye” min be ɲɛnamaya di

Ka Yezu to Galile baji tilebɔ fan fɛ, a ye kabako koo kɛ ka mɔgɔ waa caaman balo. Nka, tuma min na u tun b’a fɛ k’a kɛ masacɛ ye, a bolila. O loon sufɛ, a tagamana jikuruw kan. Ani, a ye Piyɛri kisi sabu ale tun be tagamana jii kan fana, nka siranya bolo, a y’a daminɛ ka jigi jii jukɔrɔ. Yezu y’a kɛ fana fɔɲɔba lɔra. N’a sɔrɔ o lo kɛra sababu ye kalandenw ka kurun ma halaki.

Sisan, Yezu kɔsegira Galile baji tileben fan fɛ, Kapɛrnaum mara la. A tun ye kabako kɛ ka mɔgɔ minw balo, olu y’a yɔrɔ ɲini ka taga a sɔrɔ yen. U y’a ɲininga ko: “I sera yan tuma jumɛn?” Yezu y’u kɔrɔfɔ ani a ko u b’ale yɔrɔ ɲinina sabu u b’a miiri ko ale bena u balo tugun. A y’a fɔ u ye ko: “Aw kana baara kɛ dumuni tolita kosɔn dɛ! Nga dumuni min te cɛn, aw ye baara kɛ o le kosɔn, min be nii [ɲɛnamaya] banbali di.” O kama, u y’a ɲininga ko: “An ka kan ka mun le kɛ, waasa ka Ala sago kɛ?”—Zan 6:25-28.

N’a sɔrɔ u be miirila Musa ka sariya koo le la. Nka, Yezu be kumana fɛɛn min koo la, o kɔrɔtanin lo ka tɛmɛ Musa ka sariya kan. A ko: “Ala ye min ci, fɔɔ aw ka la ale la. O le ye Ala sago ye.” Yezu ye kabako koo caaman kɛ. O bɛɛ n’a ta, mɔgɔw ma la a la. U b’a fɛ a ka kabako wɛrɛ kɛ walisa u ka la a la. U y’a ɲininga ko: “I bena mun kɛ? An faaw ye maanɛ dumu kongokolon kɔnɔ, i ko a fɔra Ala ka kuma na cogo min na ko: ‘A ye dumuni di u ma ka bɔ sankolo la.’”—Zan 6:29-31; Zaburuw 78:24.

Yezu y’a yira u la mɔgɔ min be se ka kabakow kɛ ka adamadenw mako wasa. A ko: “Tiɲɛ tiɲɛ la ne b’a fɔ aw ye ko: Musa ma dumunifɛn di aw ma ka bɔ sankolo la, nka ne Fa bɛ dumunifɛn sɛbɛ di aw ma ka bɔ sankolo la. Katuguni min jiginna ka bɔ sankolo la ka ɲɛnamaya di diɲɛ ma, o ye Ala ka dumunifɛn ye.” U ma Yezu ka kumaw faamu minkɛ, u ko: “Matigi, i ka o dumunifɛn di an ma tuma bɛɛ.” (Zan 6:32-34, ABM). Nka Yezu tun kaan be “dumuni” juman lo ma?

A y’a ɲɛfɔ ko: “Ne le ye dumunifɛn ye min be nii kura don mɔgɔ la. Ni mɔgɔ min sɔnna ne ma, kɔngɔ t’o tigi minɛ tugu. Ni min lara ne la, minnɔgɔ t’o tigi minɛ tugu. Ne tun kɔnna k’a fɔ aw ye, aw y’a ye nga aw ma la ne la. . . . Ne bɔra sankolo la ka na diɲɛ na n cibaga sago kɛli kama, n’o tɛ ne ma na n yɛrɛ sago kama. Ne cibaga sago ye jumɛn ye? A ye mɔgɔ minw di ne ma, ne kan’a to u si ka tunu. Nga ko ne k’u bɛɛ kunun diɲɛ labanlon na. N Faa ko ni mɔgɔ o mɔgɔ ye ne ye k’a jigi la ne kan, k’o tigi bena nii banbali sɔrɔ.”—Zan 6:35-40.

Yezu ka kumaw ye mɔgɔw kɔnɔ gwan ani Yahutuw y’a daminɛ ka ŋunuŋunu a koo la. A be se k’a fɔ cogo di ko ale ye “dumunifɛn ye min bɔra sankolo la”? (Zan 6:41). Mɔgɔw fɛ, Yezu bangebagaw ye adamaden gwansanw lo ye minw be Nazarɛti, Galile mara la. U ko: “O tuma na, Yusufu dencɛ Yezu tɛ wa? An b’a faa lɔn, k’a baa lɔn!”—Zan 6:42.

Yezu y’u jaabi ko: “Aw ye ŋunuŋunu dabila aw ni ɲɔgɔn cɛ. Mɔgɔ si te se ka sɔn ne ma ni n Faa sababu tɛ. Ne fana bena o tigi kunun labanlon. A sɛbɛnnin be kiraw ka kitabuw kɔnɔ ko: ‘Ala bena u bɛɛ ladi.’ Ayiwa, mɔgɔ o mɔgɔ ye mɛnni kɛ Faa Ala fɛ ka sɔn a ta ma, olu bɛɛ be la ne la. Mɔgɔ si ɲaa ma deli ka la Faa Ala kan, fɔɔ min bɔr’a fɛ ka na, ale lo y’a ye. Tiɲɛ tiɲɛ na, ne b’a fɔ aw ye ko ni min lara ne la, o tigi ye nii banbali sɔrɔ.”—Zan 6:43-47; Ezayi 54:13.

Yezu tun kumana ni Nikodɛmu ye tuma min na, a tun y’a fɔ ko ni mɔgɔ b’a fɛ ka ɲɛnamaya banbali sɔrɔ, a ka kan ka limaniya mɔgɔ Dencɛ la. A ko: “Ni mɔgɔ min y’a jigi la a kan, o tigi kana halaki, nga o ka nii banbali sɔrɔ.” (Zan 3:15, 16). Nka, sisan, Yezu be kumana jamaba lo fɛ ani a b’a fɔra u ye ko u be se ka ɲɛnamaya banbali sɔrɔ ale barika la. Maanɛ wala buru min be sɔrɔ Galile, u si tɛ se k’o di mɔgɔ ma. Ɲɛnamaya banbali be sɔrɔ cogo di do? Yezu segira a ka kumaw kan ko: “Ne ye dumunifɛn ye min be nii banbali di mɔgɔw ma.”—Zan 6:48.

U tora ka ɲɔgɔn sɔsɔ o dumunifɛn koo la min bɔra sankolo la. O sɔsɔli nana gwan tuma min na Yezu tun be mɔgɔw kalanna Alabatoso kɔnɔ, Kapɛrnaum.