U tagara ni Yezu ye Pilati fɛ

Tuma min na Piyɛri ko ale tɛ Yezu lɔn a siɲɛ sabanan na, dugu tun be ɲini ka gwɛ. Yahutuw ka kititigɛlaw jɛnkulu tilara u ka nanbara kitikow la ani u yɛrɛkɛra. U ye ɲɔgɔn lajɛn tugun jumalon sɔgɔma joona. U ye kiti tilenbali min tigɛ suu la, n’a sɔrɔ u b’a fɛ ka mɔgɔw ɲɛnafin o koo la ani k’a to u k’a miiri k’olu be kiti tigɛra cogo bɛnnin na. U nana ni Yezu ye u ɲɛɛ kɔrɔ.

Kititigɛlaw ye Yezu ɲininga tugun ko: “N’i ye Ala ka Mɔgɔ wolomanin nin [o kɔrɔ, Krista] ye, a fɔ an ye.” Yezu y’u jaabi ko: “Ni ne y’a fɔ aw ye, aw tena la a la. Ni ne y’aw ɲininga fana, aw tena ne jaabi.” Nka, Yezu y’a jaa gwɛlɛya k’a fɔ u ye ko Daniyɛli 7:13 be kuma ale lo koo la. A ko: “Kabini sisan, Mɔgɔ Dencɛ bena sigi Setigi Ala kinibolo fɛ.”—Luka 22:67-69; Matiyo 26:63.

U tilara k’a ɲininga tugun ko: “O tuma na, e ye Ala Dencɛ ye wa?” Yezu y’u jaabi ko: “Aw yɛrɛ y’a fɔ ko ne lo.” U basigira o kuma dama kan ka Yezu jalaki ko a ka ɲi ka faga sabu a ye Ala nɛni. U y’a fɔ ɲɔgɔn ye ko: “An mako te mɔgɔ ka seereya la tugu.” (Luka 22:70, 71; Mariki 14:64). U ye Yezu bolow siri ka taga n’a ye Ɔrɔmukaw ka gofɛrɛnɛrɛ Pɔnsi Pilati fɛ.

N’a sɔrɔ Zuda Isikariyɔti y’a ye k’u be tagara ni Yezu ye Pilati fɛ. Zuda y’a faamu tuma min na k’u ye jalaki ben Yezu kan, a nimisara ani a jigi tigɛra. Nka, sanni a ka nimisa sɔbɛ la ka kɔsegi Ala ma, a segira ka taga ni warigwɛ 30 nunu ye sarakalasebagaw kuntigiw fɛ. A y’a fɔ u ye ko: “Ne ye hakɛ kɛ ka mɔgɔ jalakibali don aw bolo.” Nka, a makari yɛrɛ m’u minɛ hali dɔɔni. U y’a jaabi ko: “O te an ka sira la, o y’i ka koo ye.”—Matiyo 27:4.

Zuda ye warigwɛ 30 nunu fili Alabatosoba kɔnɔ. O kɔ, a y’a ka koo tɔɔ juguya a kɛtɔ k’a ɲini k’a yɛrɛ faga. A b’a ɲinina k’a yɛrɛ dulon tuma min na, a be komi a ye juru siri yiribolo min na, o karila n’a ye. A bɔra ka ben farakuruw kan ka yɛrɛkɛ.—Kɛwaliw 1:17, 18.

Tuma min na u be tagara ni Yezu ye Pɔnsi Pilati ka soo, tile bele ma bɔ fɔlɔ. Yahutu minw tagara ni Yezu ye, olu ma sɔn ka don luu kɔnɔ. U tun b’a miiri ko n’u donna siya wɛrɛ mɔgɔw ka luu kɔnɔ, u bena u yɛrɛ nɔgɔ. N’u nɔgɔra, u tɛna se ka seli dumuni kɛ Nisan tile 15nan loon na. O loon tun ye Buru funubali seli loon fɔlɔ ye. O seli ni Tɛmɛnkan seli tun be taga ɲɔgɔn fɛ.

Pilati bɔra k’u ɲininga ko: “Aw be cɛɛ nin jalaki mun le kama?” U ye Pilati jaabi ko: “N’a tun te kojugukɛla ye, an tun ten’a minɛ ka na n’a ye e fɛ.” N’a sɔrɔ Pilati y’a miiri k’u b’a fɛ k’ale lasun ka koo dɔ kɛ. O kama, a y’a fɔ u ye ko u k’a minɛ ka taga n’a ye k’a kiti u yɛrɛ ma ka kɛɲɛ n’u yɛrɛ ka sariya ye. U ye Pilati jaabi ko “sira ma di u ma ka mɔgɔ faga.” O kumaw b’a yira ka gwɛ k’u b’a fɛ Yezu ka faga le.—Zan 18:29-31.

N’u ye Yezu faga Tɛmɛnkan seli wagati la, n’a sɔrɔ mɔgɔw bena wuli u kama sabu mɔgɔ caaman tun lanin be Yezu la. Ni mɔgɔ murutira Ɔrɔmu masacɛ kama, sira dira Ɔrɔmukaw ma k’o tigi faga. O kama, u b’a fɛ Ɔrɔmukaw ka Yezu jalaki ko a wulila Ɔrɔmu masacɛ kama. O la, u b’a faga. Yahutuw jigi b’a la ko n’u sera k’o kɛ, mɔgɔ si tɛna olu jalaki Yezu fagari koo la.

Diinan kuntigiw m’a fɔ Pilati ye k’u ye jalaki ben Yezu kan sabu olu fɛ a ye Ala nɛni. U ye ngalon wɛrɛw tigɛ ka la Yezu kan ko: “An y’a ye ko cɛɛ nin [1] b’an ka siya kunnacɛnna. [2] A b’u bali ka lɛnpo sara Ɔrɔmu masacɛ ma. [3] A ko ale ye Ala ka mɔgɔ wolomanin nin ye, ko ale ye masa ye.”—Luka 23:2.

Pilati ye Ɔrɔmu masacɛ ka lasigiden ye. Yahutuw be min fɔra Yezu koo la, a tɛ se k’a ɲɛɛ tugu o kan. O kama, Pilati donna luu kɔnɔ ka Yezu weele k’a ɲininga ko: “E le ye zuwifuw ka masacɛ ye wa?” O kɔrɔ, ‘yala ele be masacɛ ka sariya tiɲɛ k’i yɛrɛ kɛ masacɛ ye ani ka Ɔrɔmu masacɛ kɛlɛ wa?’ Yezu tun b’a fɛ k’a lɔn Pilati be min lɔn ale koo la. O kama, a y’a jaabi ko: “Nin kuma nin bɔra e yɛrɛ le la wa? Walima i y’o mɛn mɔgɔ dɔw le fɛ?”—Zan 18:33, 34.

Pilati y’a kɛ komi a tɛ foyi lɔn Yezu koo la ani a b’a ɲinina ka dɔ lɔn. O kama, a ye Yezu jaabi ko: “Ne ye zuwifu ye wa? E ka siya n’u ka sarakalasebagaw kuntigiw le nana n’i ye ne fɛ, i ye mun le kɛ?”—Zan 18:35.

Yezu ka jaabili la, a sinsinna Masaya koo kan. Siga t’a la, a ye min fɔ, o ye Pilati kabakoya kosɔbɛ.