ƝININGALI 7

N’u be n’ lasunna ka cɛnimusoko kɛ do?

O ƝININGALI KUUN?

I bena min latigɛ cɛnimusoko la, o be se ka nɔɔba to i ka ɲɛnamaya kan.

E TUN BENA MUN LO KƐ DO?

Miiri k’a filɛ: Rozali ni Seku be teriya kɛra ɲɔgɔn fɛ a kalo fila dɔrɔn ye nin ye. Nka, a be komi u tun be ɲɔgɔn lɔn ka kɔrɔ. U be sms ci ɲɔgɔn ma tuma bɛɛ. U be lɛri caaman kɛ telefɔni na ani n’u dɔ be kumana, tɔɔ kelen yɛrɛ b’a lɔn a bena min fɔ!

Kalo fila tɛmɛninw na, Rozali ni Seku tun be to ka ɲɔgɔn bolo minɛ ani ka bizu di ɲɔgɔn ma. Nka sisan, Seku t’a fɛ ka dan o dɔrɔn ma. Rozali do t’a fɛ ka tɛmɛ o kan. A fana t’a fɛ k’a ka teriya tiɲɛ ni Seku ye. N’a be ni Seku ye, a b’a ye ko ale cɛ ka ɲi ani ko a ɲɔgɔn tɛ yen. A b’a fɔ a yɛrɛ ye ko: “Ne ni Seku koo ka di ɲɔgɔn ye. N’ m’a lɔn n’ bena min kɛ yɛrɛe . . .”

N’i sanda sera ka teriya kɛ ni kanbele wala sunguru dɔ ye ani i tun be Rozali nɔɔ na, i tun bena mun lo kɛ do?

MIIRI FƆLƆ!

U be fani ɲuman dɔ kɛra ka yɔrɔ jɔsi — Cɛnimusoko ye nilifɛn ye, Ala ye min di mɔgɔ furuninw dɔrɔn ma. N’i ye cɛnimusoko kɛ k’a sɔrɔ i ma furu, i b’o nilifɛn mafiɲɛyara le. A be komi mɔgɔ dɔ ye fani cɛɲumanba dɔ di i ma ani i b’o fani ta ka yɔrɔ jɔsi

N’i tora yiri kan ani k’a ɲini ka pan i n’a fɔ kɔnɔ, i be se k’i niin bila farati la. O cogo kelen na, n’i y’a ɲini ka Ala ka sariya tiɲɛ cɛnimusoko la, faratiba b’o la. Ɲɛyirali fɛ, o sariya dɔ b’a fɔ ko: “Ala be min fɛ, o ye aw dusu saniyako ye, aw kana kakalaya kɛ.”—1 Tesalonikaw 4:3.

N’i y’o sariya tiɲɛ, farati jumanw lo b’a la? Bibulu b’a fɔ ko: “Min be kakalaya kɛ, o tigi b’a yɛrɛ hakɛ le ta.” (1 Korɛntikaw 6:18). O be se ka kɛ cogo di?

Lɔnnikɛlaw y’a yira ko kanbelew ni sunguru minw be cɛnimusoko kɛ k’a sɔrɔ u ma furu, koo nunu dɔ ka teli k’olu sɔrɔ:

NIMISA. Kanbelew ni sunguru minw ye cɛnimusoko kɛ k’a sɔrɔ u ma furu, u fanba y’a fɔ ko u nimisara kɔfɛ.
KA TIGƐ ƝƆGƆN NA. Cɛnimusoko kɛnin kɔ, kanbele ni sunguru fila bɛɛ b’u yɛrɛ ɲininga ko: “A ye cɛnimusoko kɛ ni jɔn le ye fana?”
JIGITIGƐ. Tiɲɛn na, sunguruw fanba be ɲɛbɔ kanbele minw fɛ, o ye minw bena u latanga ani minw tɛna a ɲini k’u yɛrɛ sago dɔrɔn kɛ n’u ye. Tuma caaman, ni kanbele lara ni sunguru dɔ ye, a man teli ka ɲɛbɔ o sunguru fɛ tugun.
Nin to i hakili la: N’i ye cɛnimusoko kɛ ni mɔgɔ dɔ ye k’a sɔrɔ i ma furu, i b’i yɛrɛ mafiɲɛya sabu i bɔnɛna i ka npogotigiya la (Ɔrɔmukaw 1:24). I farikolo ye fɛɛn nafamanba ye. I man kan k’a mafiɲɛya!

A yira ko see b’i ye ka ban ka “kakalaya kɛ.” (1 Tesalonikaw 4:3). N’i nana furu loon dɔ, i bena se ka cɛnimusoko kɛ ni ninsɔndiya ye. I tɛna hami, i tɛna nimisa ani i tɛna kɛ farati la i n’a fɔ kanbelew ni sunguru minw be cɛnimusoko kɛ k’a sɔrɔ u ma furu.—Talenw 7:22, 23; 1 Korɛntikaw 7:3.

ELE KA MIIRIYA YE JUMAN YE?

Mɔgɔ min b’i kanu tiɲɛn na, yala o tigi bena a ɲini ka koo jugu kɛ i la ani k’i dusu kasi wa?
Mɔgɔ min b’a janto i la sɔbɛ la, yala a bena i lasun ka koo dɔ kɛ min bena ele ni Ala ka teriya tiɲɛ wa?—Eburuw 13:4.