Yakuba ni Ezawu ye bɛɛn sigi

Jehova ye layidu ta Yakuba ye ko a bena a tanga i ko a tun ye Ibrayima ni Isiyaka tanga cogo min na. Yakuba tagara sigi yɔrɔ dɔ la min be weele ko Aran. A furula yen, ka denbayaba sɔrɔ ani ka kɛ nafolobatigi ye.

Kɔfɛ, Jehova y’a fɔ Yakuba ye ko: ‘Segi ka taga i faso la.’ Yakuba n’a ka denbaya mɔgɔw ye tagamajan daminɛ ka kɔsegi. K’u to sira kan, Yakuba ka baaradenw y’a fɔ a ye ko: ‘I kɔrɔcɛ Ezawu be nana ani cɛɛ 400 be n’a ye!’ Yakuba siranna ko Ezawu kana na kojugu kɛ ale n’a denbaya la. A ye Jehova deli ko: ‘Sabari ka n’ kisi n’ kɔrɔcɛ bolo.’ O dugusagwɛ, Yakuba ye kado ci Ezawu ma: sagaw, baaw, misiw, ɲɔgɔmɛw ani fali caaman.

O loon sufɛ, ka Yakuba to a kelen, a ye mɛlɛkɛ dɔ ye! O mɛlɛkɛ y’a daminɛ ka bondori kɛ n’a ye. U tora o la fɔɔ ka dugu gwɛ. Yakuba mandimina, nka a tun t’a fɛ k’a dabila. Mɛlɛkɛ ko: ‘N’ bila n’ ka taga.’ Nka Yakuba ko: ‘Ɔn ɔn, fɔɔ i ka n’ duga fɔlɔ.’

Mɛlɛkɛ labanna ka Yakuba duga. Sisan, Yakuba lara a la ko Jehova tɛna a to Ezawu ka kojugu kɛ ale la.

O loon sɔgɔma, Yakuba ye filɛri kɛ yɔrɔjan ani a ye Ezawu n’o cɛɛ 400 natɔ ye. Yakuba bilara a ka denbaya ɲɛ ani a birila duguma a kɔrɔcɛ ɲɛɛ kɔrɔ fɔɔ siɲɛ wolonfila. Ezawu bolila ka Yakuba kunbɛn k’a bolo meleke a kaan na. U fila bɛɛ y’a daminɛ ka kasi ani u ye bɛɛn sigi. Ele fɛ, Yakuba y’o koo ɲɛnabɔ cogo min na, Jehova ye mun lo miiri o la?

Kɔfɛ, Ezawu segira a ka soo, Yakuba tagara n’a ka sira ye. Yakuba dencɛw bɛɛ tun ye 12 ye. U tɔgɔw ko Urubɛn, Simeyɔn, Levi, Zuda, Dan, Nɛfutali, Gadi, Asɛri, Isakar, Zabulɔn, Yusufu ani Bɛnzamɛn. Jehova tɛmɛna u la kelen fɛ k’a ka mɔgɔw kisi: o ye Yusufu ye. I b’a lɔn a y’o kɛ cogo min na wa? An k’a ɲini k’o lɔn.