Yiritunin tasumaman

Musa sigira Madiyan jamana na ka saan 40 kɛ. A furula ani a ye deenw sɔrɔ. Loon dɔ, k’a to saga dɛndɛ la Sinayi kulu gɛrɛfɛ, a ye kabako dɔ ye. Tasuma tun ye ŋɔni yiritunin dɔ minɛ, nka a tun tɛ jɛnina! Musa gwɛrɛla ko a b’o kabako filɛ minkɛ, a ye kaan dɔ mɛn ka bɔ yiritunin kɔnɔ ko: ‘Musa, i kana gwɛrɛ yan. I ka sanbara bɔ bari i lɔnin be yɔrɔ senuman lo la.’ Jehova lo tun be kumana a fɛ mɛlɛkɛ dɔ sababu fɛ.

Musa siranna. O kama, a y’a ɲɛda biri. O kaan ko: ‘Ne ye Israɛldenw ka sɛgɛn ye. Ne bena u bɔ Ezipitikaw bolo ani ka taga n’u ye jamana ɲuman na. Ele lo bena ne ka mɔgɔw ɲɛminɛ ka bɔ n’u ye Ezipiti jamana na.’ N’a sɔrɔ o koo barila Musa la dɛ! Tiɲɛn tɛ?

Musa y’a fɔ Ala ye ko: ‘N’u ye n’ ɲininga ko jɔn lo ye n’ ci, n’ ka ɲi ka mun lo fɔ?’ Ala y’a jaabi ko: ‘A fɔ u ye ko Ibrayima, Isiyaka ani Yakuba ka Ala Jehova lo ye i ci.’ O kɔ, Musa ko: ‘Nka n’u ma sɔn ka n’ lamɛn do?’ Jehova ye koo dɔ kɛ k’a yira Musa la ko ale bena a dɛmɛ. A y’a fɔ Musa ye ko a k’a ka bere fili duguma. O kɔ, bere yɛlɛmana ka kɛ saa ye! Musa ye saa minɛ a kuu la tuma min na, a yɛlɛmana ka kɛ bere ye tugun. Jehova ko: ‘ N’i y’o kabako kɛ, o bena a yira ko ne lo ye i ci.’

Musa ko: ‘Ne tɛ se kuma na.’ Jehova ye layidu ta a ye ko: ‘I ka kan ka min fɔ, ne bena o fɔ i ye. Ne bena i kɔrɔcɛ Arɔn ci ka na i dɛmɛ.’ Komi Musa lara a la ko Jehova be n’ale ye, a y’a muso n’a dencɛw minɛ ka Ezipiti jamana sira minɛ.