Tɔɔrɔ fɔlɔ ka taga se 3nan ma

Israɛldenw tun ye jɔɔnw ye ani Ezipitikaw tun b’u waajibiya ka baara gwɛlɛw kɛ. Jehova ye Musa ni Arɔn ci Farahuna fɛ k’a fɔ a ye ko: ‘Ne ka mɔgɔw bila u ka taga ka ne bato kongokolon kɔnɔ.’ Farahuna ye kuncɛbaya kɛ k’u jaabi ko: ‘Ne mako tɛ Jehova ka fɔta la. N’ tɛna Israɛldenw bila ka taga.’ O kɔ, Farahuna ye dɔ fara u ka baara kan. Jehova tun bena koo yira Farahuna na. I b’a lɔn a ye min kɛ wa? A ye tɔɔrɔ tan lase Ezipiti jamana ma. Jehova y’a fɔ Musa ye ko: ‘Farahuna ma sɔn ka mɛnni kɛ ne fɛ. A bena sɔrɔ Nili baji daa la sini sɔgɔma. Taga a fɔ a ye ko Nili baji bɛɛ bena yɛlɛma ka kɛ joli ye sabu a banna ka ne ka mɔgɔw bila ka taga.’ Musa sɔnna ka taga Farahuna fɛ. Farahuna ye Arɔn filɛ a be Nili baji gosira n’a ka bere ye. Baji yɛlɛmana ka kɛ joli ye. Baji y’a daminɛ ka kasa bɔ, jɛgɛw sara ani Nili baji tun tɛ se ka min. Farahuna bele banna ka Israɛldenw bila u ka taga.

Tile wolonfila o kɔ, Jehova ye Musa ci a ka kɔsegi Farahuna fɛ ka kuma nin fɔ a ye: ‘N’i ma ne ka mɔgɔw bila ka taga, tɔrisenjanw lo bena fa Ezipiti jamana kɔnɔ.’ Farahuna ma mɛnni kɛ. O kama, Arɔn y’a ka bere kɔrɔta, tɔrisenjanw y’a daminɛ ka jamana yɔrɔ bɛɛ fa. Mɔgɔw ye tɔrisenjanw sɔrɔ u ka boonw, layɔrɔw ani minanw kɔnɔ. U tun be yɔrɔ bɛɛ! Farahuna ye Musa deli a ka Jehova deli ko a k’o tɔɔrɔ ban. Farahuna y’a daa di ko a bena Israɛldenw bila ka taga. Jehova y’o tɔɔrɔ lalɔ. Tɔrisenjan minw sara, Ezipitikaw y’u cɛ k’u ton ton caaman. U kasa daminɛna ka bɔ jamana na. Nka Farahuna tun t’a fɛ halibi ka Israɛldenw bila ka taga.

O kɔ, Jehova y’a fɔ Musa ye ko: ‘Arɔn ka dugukolo gosi n’a ka bere ye. Dugukolo buguri bena yɛlɛma ka kɛ sosow ye.’ Sosow barila ka yɔrɔ bɛɛ fa. Farahuna ka mɔgɔ dɔw y’a fɔ a ye ko: ‘Tɔɔrɔ nin ye Ala ka baara nɔɔ ye dɛ!’ Nka Farahuna tun t’a fɛ halibi ka Israɛldenw bila ka taga.