Jehova ye Zozuwe sugandi

Musa ka saya wagati surunyana. A ye Israɛl siya ɲɛminɛ a saan caaman ye nin ye. Jehova y’a fɔ a ye ko: ‘Ele lo tɛna don ni Israɛldenw ye Layidu jamana na. Nka, n’ bena a to i b’a ye.’ O kɔ, Musa y’a ɲini Jehova fɛ a ka kuntigi kura dɔ sugandi min ben’a janto jama na. Jehova y’a fɔ a ye ko: ‘Taga a fɔ Zozuwe ye ko ne y’ale lo sugandi.’

Musa y’a fɔ jama ye ko ale ka saya wagati surunyana. A ko Jehova ye Zozuwe lo sugandi ka don n’u ye Layidu jamana na. O kɔ, Musa y’a fɔ Zozuwe ye ko: ‘Kana siran. Jehova bena i dɛmɛ.’ Wagati dɔɔni o kɔ, Musa yɛlɛla Nebo kulu sanfɛ. K’a to o yɔrɔ la, Jehova tun ye layidu ta ko a bena jamana min di Ibrayima, Isiyaka ani Yakuba ma, a y’o yira a la. Musa sara k’a sii to saan 120.

Jehova y’a fɔ Zozuwe ye ko: ‘Zurudɛn baji cɛtigɛ ka don Kanaan jamana na. N’ bena i dɛmɛ i ko n’ tun ye Musa dɛmɛ cogo min na. Banba ka ne ka Sariya kalan loon o loon. Kana siran. I jaa gwɛlɛya. Taga ani ne ye min bɛɛ fɔ i ye, o kɛ.’

Zozuwe ye kolajɛbaga fila ci Zeriko dugu la. Fɛɛn min kɛra o yɔrɔ la, an bena o ye kalan nata la. U kɔseginin kɔ, u y’a fɔ ko wagati sera u fɛ ka don Kanaan jamana na. O dugusagwɛ, Zozuwe y’a fɔ jama ye k’u ka minanw siri. O kɔ, a ye sarakalasebagaw bila ɲɛ ni Layidu tagamasiɲɛ kɛsu ye ka taga Zurudɛn baji la. Baji tun fanin lo. Nka, sarakalasebagaw y’u seen don baji la dɔrɔn, jii min tun be woyo ka bɔ sanfɛ, o lɔra. Jii min tun be woyo ka jigi, o tigɛra pewu! Sarakalasebagaw tagara lɔ baa dingɛ cɛmancɛ la walisa Israɛldenw bɛɛ ka tɛmɛ. Jehova ye kabako min kɛ ten, o ye u hakili jigi a ka kabako wɛrɛ la a tun ye min kɛ Kɔgɔji Wulen na. Tiɲɛn tɛ?

O saanw bɛɛ tɛmɛnin kɔ, Israɛldenw labanna ka don Layidu jamana na. U tun bena se ka boonw lɔ ani ka duguw sigi. U tun bena se fana ka forow, ɛrɛzɛnforow ani yiriforow bɔ. Jamana lo, nɔnɔ ni lii ka ca yɔrɔ min na.