Zozuwe ni Gabawɔnkaw

Koo min ye Zeriko dugu sɔrɔ, o kibaruya jɛnsɛnna Kanaan dugu tɔɔw la. U ka masaw y’a latigɛ ka ɲɔgɔn lajɛn ka Israɛldenw kɛlɛ. Nka Gabawɔnkaw ye hakili wɛrɛ sɔrɔ. U tagara Zozuwe fɛ ni fani faranfaranninw ye u kaan na ani k’a fɔ ko: ‘An bɔra yɔrɔjan. An ye Jehova koo mɛn ani a ye fɛɛn minw bɛɛ kɛ aw ye Ezipiti ni Mowabu jamanaw na. An b’aw deli aw kana an kɛlɛ. O la, an bena kɛ aw ka baarakɛdenw ye.’

Zozuwe lara u la ani a sɔnna ko a tɛna u kɛlɛ. Tile saba o kɔ, a bɔra a kala ma k’u ka yɔrɔ tun man jan. U tun be bɔ Kanaan jamana na. Zozuwe ye Gabawɔnkaw ɲininga ko: ‘Mun na aw ye ngalon tigɛ?’ U y’a jaabi ko: ‘An tun sirannin lo! An b’a lɔn ko Jehova, i ka Ala be kɛlɛ kɛ aw ye. Sabari, kana an faga.’ Zozuwe sɔnna k’u to niin na.

A ma mɛɛn, Kanaan masacɛ duuru n’u ka sɔrɔdasiw y’a ɲini ka Gabawɔnkaw kɛlɛ. Zozuwe n’a ka sɔrɔdasiw ye suu kuru bɛɛ kɛ tagama na walisa ka taga u dɛmɛ. U ye kɛlɛ daminɛ o dugusagwɛ sɔgɔmada joona. Kanankaw y’a daminɛ ka boli faan bɛɛ. Nka u tun mana boli ka taga yɔrɔ o yɔrɔ, Jehova tun be sanbɛrɛw jigi u kan. O kɔ, Zozuwe ye Jehova deli a k’a to tile ka lɔ yɔrɔ kelen. Mun na a ye Jehova deli a k’o kɛ k’a sɔrɔ tile tun ma deli ka lɔ ka ye? A y’o kɛ sabu a jigi tun lanin be Jehova kan. Tile ma ben o loon kuru bɛɛ la fɔɔ Israɛldenw ye see sɔrɔ Kanaan masacɛw n’u ka sɔrɔdasiw kan.