Zedeyɔn ye see sɔrɔ Madiyankaw kan

Wagati dɔ nana se, Israɛldenw ye Jehova to yen tugun ka ngalon alaw bato. Saan wolonfila kɔnɔ, Madiyankaw ye Israɛldenw ka bɛgɛnw soɲɛ ani k’u ka sɛnɛfɛnw halaki. Walisa k’u yɛrɛ tanga Madiyankaw ma, Israɛldenw tun be dogo kuluwow kɔnɔ ani kuluw kan. U ye Jehova deli a k’u kisi. O kama, Jehova ye mɛlɛkɛ dɔ ci kanbele dɔ fɛ min tɔgɔ ko Zedeyɔn. Mɛlɛkɛ y’a fɔ Zedeyɔn ye ko: ‘Jehova ye ele lo sugandi ka kɛ kɛlɛkɛla barikaman ye.’ Zedeyɔn y’a ɲininga ko: ‘Ne be se ka Israɛldenw kisi cogo di? Ne do tɛ foyi ye.’

Zedeyɔn tun bena a lɔn cogo di ko Jehova lo y’ale sugandi? A ye lɛnifani dɔ bila duguma k’a fɔ Jehova ye ko: ‘Sɔgɔma ni ngomiji ye lɛnifani nin ɲigi, nka dugukolo janin lo, ne bena a lɔn ko i b’a fɛ ne ka Israɛldenw kisi.’ O dugusagwɛ sɔgɔma, lɛnifani ɲigira kosɔbɛ nka dugukolo tun janin lo! Nka, Zedeyɔn ye Jehova deli k’o dugusagwɛ sɔgɔma, a k’a kɛ lɛnifani ka ja nka dugukolo ka ɲigi. O fana kɛra minkɛ, Zedeyɔn lara a la ko Jehova lo ye ale sugandi. A y’a ka sɔrɔdasiw lajɛn walisa ka Madiyankaw kɛlɛ.

Jehova y’a fɔ Zedeyɔn ye ko: ‘Ne bena a to Israɛldenw ka see sɔrɔ. Nka, komi i ka sɔrɔdasiw ka ca kojugu, aw bena a miiri ko aw ka fanga lo y’a to aw sera aw juguw kɔrɔ. Mɔgɔ o mɔgɔ be siran, a fɔ a tigi ye a ka kɔsegi soo.’ O kama, sɔrɔdasi 22 000 kɔsegira ani 10 000 tora. O kɔ, Jehova ko: ‘Sɔrɔdasiw bele ka ca kojugu. Taga n’u ye kɔda la ani a fɔ u ye k’u ka jii min. Minw be jii min ka to k’u jugu kɔrɔsi, olu dɔrɔn sugandi.’ Mɔgɔ 300 dɔrɔn lo tun be kɔrɔsili kɛra n’u be jii minna. Jehova y’a fɔ k’o mɔgɔ damanin dɔrɔn lo bena see sɔrɔ Madiyankaw ka sɔrɔdasi 135 000 kan.

O loon sufɛ, Jehova y’a fɔ Zedeyɔn ye ko: ‘Wagati sera sisan ka Madiyankaw kɛlɛ!’ Zedeyɔn ye buru fiyɛtaw ni dagaw di a ka sɔrɔdasiw ma ani kala mananinw tun be o dagabaw kɔnɔ. A y’a fɔ u ye ko: ‘Aw ka ne filɛ, ni ne ye min kɛ, aw fana k’o ɲɔgɔn kɛ.’ Zedeyɔn y’a ka buru fiyɛ, k’a ka daga ci, k’a ka kala mananin kɔrɔta ani ka kule ko: ‘Jehova ka murujan ani Zedeyɔn ta!’ A ka sɔrɔdasi 300 nunu bɛɛ y’o ɲɔgɔn kɛ. Madiyankaw jaa tigɛra, u y’a daminɛ ka boli faan bɛɛ la. Komi u hakili ɲagamina, u y’a daminɛ ka ɲɔgɔn kɛlɛ. Jehova ye Israɛldenw dɛmɛ tugun ka see sɔrɔ u juguw kan.