Zɛfite ka dajuru

Israɛldenw ye Jehova to yen ka ngalon alaw bato. Tuma min na Amoniw nana u kɛlɛ, o ngalon alaw m’u dɛmɛ hali dɔɔni. Israɛldenw tɔɔrɔla Amoniw bolo saan caaman kɔnɔ. A laban, u y’a fɔ Jehova ye ko: ‘An y’i hakɛ ta. Sabari, an kisi an juguw bolo.’ Israɛldenw y’u ka joow halaki ani u y’a daminɛ ka Jehova bato tugun. Jehova tun t’a fɛ k’u ye u be tɔɔrɔla.

Walisa ka Amoniw kɛlɛ, u ye kɛlɛkɛla dɔ sugandi a ka jama ɲɛminɛ. A tɔgɔ ko Zɛfite. Zɛfite y’a fɔ Jehova ye ko: ‘Ne be dajuru ta i ye ko n’i y’an dɛmɛ ka see sɔrɔ, ne kɔsegitɔ soo, mɔgɔ fɔlɔ min bena bɔ ka na n’ kunbɛn, o tigi bena kɛ ele ta ye.’ Jehova ye Zɛfite ka delili jaabi ani a y’a dɛmɛ ka see sɔrɔ kɛlɛ la.

Zɛfite kɔsegitɔ soo, mɔgɔ fɔlɔ min nana a kunbɛn, o kɛra a denmuso ye. Ale kelenpe lo tun y’a ka deen ye. A tun be dundunw fɔra ka to ka dɔɔn kɛ. Zɛfite tun bena mun lo kɛ do? A hakili jigira a ka dajuru la ani a y’a fɔ ko: ‘Eeh, ne denmuso, i ye ne dusu kasi! Ne ye dajuru ta Jehova ye. Walisa k’o dafa, ne ka kan k’i bila ka taga baara kɛ fanibugu kɔnɔ Silo.’ Nka a denmuso y’a fɔ a ye ko: ‘Baba, n’i ye i daa di Jehova ma, i ka ɲi k’o koo kɛ. Ne be min ɲini i fɛ, i k’a to ne ka taga kalo fila kɛ ni n’ terimusow ye kuluw kan. O kɔ, ne be sɔrɔ ka taga Silo.’ Zɛfite denmuso ye baara kɛ ni kantigiya ye fanibugu kɔnɔ a sii tɔɔ bɛɛ la. Saan o saan, a teriw tun be taga bɔ a ye Silo.