Zonatan: mɔgɔ jagwɛlɛ ani mɔgɔ kantigiman

Zonatan tun ye masacɛ Sayuli ka dencɛ fɔlɔ ye. Kɛlɛden tun lo min jaa ka gwɛlɛ. Dawuda y’a fɔ ko Zonatan ka teli ka tɛmɛ bɔɔn kan ani ko fanga b’a la ka tɛmɛ jara kan. Loon dɔ la, Zonatan ye Filisitikaw ka sɔrɔdasi 20 ye kulu kan. A y’a fɔ a ka kɛlɛkɛminanw tabaga ye ko: ‘An bena taga u kɛlɛ, nka fɔɔ Jehova ka tagamasiɲɛ dɔ yira an na fɔlɔ. Ni Filisitikaw y’a fɔ ko an ka na, o la an bena a lɔn ko an ka ɲi ka taga u kama.’ Filisitikaw pɛrɛnna ko: ‘Aw ka na!’ O mɔgɔ fila tagara u kama kulu kan k’u kɛlɛ ani ka se u kɔrɔ.

Komi Zonatan tun ye Sayuli dencɛ fɔlɔ ye, ale lo tun ka kan ka kɛ masacɛ ye a facɛ kɔ. Nka Zonatan tun b’a lɔn ko Jehova ye Dawuda lo sugandi a ka kɛ Israɛldenw ka masacɛ ye. O n’a ta bɛɛ, a ma ɲangoya kɛ. Zonatan ni Dawuda nana kɛ teri sɔbɛw ye. U ye layidu ta ɲɔgɔn ye k’u bena ɲɔgɔn latanga ani ka ɲɔgɔn dɛmɛ. Zonatan y’a ka forokiya, a ka murujan, a ka kala n’a ka cɛsirilan di Dawuda ma walisa k’a yira ko u kɛra terimanw ye.

Tuma min na Dawuda tun be bolila Sayuli ɲɛ, Zonatan tagara a fɛ k’a fɔ a ye ko: ‘Kana i fari faga, i jaa gwɛlɛya. Jehova ye ele lo sugandi walisa i ka kɛ masacɛ ye. Ne facɛ yɛrɛ b’o kala ma.’ Yala i t’a fɛ ka Zonatan ɲɔgɔn sɔrɔ teri ye wa?

Siɲɛ caaman na, Zonatan y’a niin bila farati la walisa k’a tericɛ dɛmɛ. A tun b’a lɔn ko masacɛ Sayuli b’a fɛ ka Dawuda faga. O kama, a y’a fɔ a facɛ Sayuli ye ko: ‘N’i ye Dawuda faga, o bena kɛ i fɛ jurumu ye. A ma koo jugu foyi kɛ.’ Sayuli dimina Zonatan kɔrɔ. Saan damanin o kɔ, Sayuli ni Zonatan sara kɛlɛ la.

Zonatan sanin kɔ, Dawuda ye Zonatan dencɛ Mefibosɛti yɔrɔ ɲini. Dawuda ye Mefibosɛti ye tuma min na, a y’a fɔ a ye ko: ‘I facɛ tun ye ne teri sɔbɛ ye. O kama, ne bena i ladon i sii tɔɔ bɛɛ la. I bena sigi ne fɛ masaso la ani i bena dumuni kɛ ne ka tabali kan.’ Dawuda ma ɲinɛ a tericɛ Zonatan kɔ abada.