Masacɛ Dawuda ka jurumu

Sayuli sanin kɔ, Dawuda kɛra masa ye. A tun be ni saan 30 lo ye. Saan damanin a siginin kɔ masaya la, a ye kojuguba dɔ kɛ. Loon dɔ sufɛ, a tora sanbon kan ka muso cɛɲumanin dɔ ye. U y’a fɔ Dawuda ye ko a tɔgɔ ko Batiseba ani ko a furunin lo sɔrɔdasi dɔ ma min tɔgɔ ko Uri. Dawuda y’a to u ye Batiseba weele ka na a ka masaso kɔnɔ. A lara n’a ye. O muso ye kɔnɔ ta. Dawuda ye min kɛ, a y’a ɲini k’o dogo. A y’a fɔ a ka kɛlɛdenw kuntigi ye ko u ka Uri bila kɛlɛ fariman yɔrɔ la ani ka boli k’a to yen. Uri sara kɛlɛ la. O kɔ, Dawuda ye Batiseba furu.

Dawuda ye koo jugu minw bɛɛ kɛ, Jehova y’u ye. A tun bena mun lo kɛ? Jehova ye kira Natan ci Dawuda fɛ. Natan ko: ‘Nafolotigi dɔ tun be ni saga caaman ye. Nka, fantan dɔ tun be ni sagaden kelen dɔrɔn lo ye min koo tun ka di a ye kosɔbɛ. Nafolotigi ye fantan ka sagaden kelenpe nin bɔsi a la.’ Dawuda dimina k’a fɔ ko: ‘O cɛɛ ka kan ka faga!’ Natan y’a fɔ Dawuda ye ko: ‘O Nafolotigi ye ele lo ye!’ Dawuda dusu tiɲɛna. A y’a fɔ Natan ye ko: ‘Ne ye Jehova hakɛ ta.’ O jurumu nana ni gwɛlɛya caaman ye Dawuda n’a somɔgɔw kan. Jehova y’a ɲangi, nka a y’a to niin na sabu a kɔnɔ tun gwɛnin lo ani a tun majiginin lo.

Dawuda tun b’a fɛ ka batoso lɔ Jehova ye, nka Jehova y’a dencɛ Solomani lo sugandi a k’o lɔ. Dawuda y’a daminɛ ka minanw labɛn Solomani ye. A ko: ‘Jehova batoso ka kan ka kɛ boon cɛɲumanba ye. Solomani bele ye kanbele ye. Nka ne bena minanw labɛn a ye walisa k’a dɛmɛ.’ Dawuda ye wari caaman bɔ a yɛrɛ kun k’a di o baara kosɔn. A ye baarakɛla ŋanaw lo ɲini. A ye sanu ni warigwɛ lajɛn ani a y’a to u nana ni sedere yiriw ye ka bɔ Tiri ni Sidɔn jamana na. Wagati dɔɔni sanni Dawuda ka sa, a ye batoso pilanw di Solomani ma. A ko: ‘Jehova ko ne ka o koow sɛbɛ i ye. Jehova bena i dɛmɛ. Kana siran. I jaa gwɛlɛya ka baara kɛ.’