Masaya tilanna fila

Solomani ye wagati min bɛɛ kɛ Jehova batoli la, hɛɛrɛ tun be Israɛl jamana na. Nka a ye lonanmuso caaman furu ani o musow tun be joow bato. Dɔɔni dɔɔni, Solomani sɔɔn yɛlɛmana ani a y’a daminɛ fana ka joow bato. Jehova dimina. A y’a fɔ Solomani ye ko: ‘Ne bena Israɛl bɔsi i kɔmɔgɔw la k’a tilan fila. N’ bena a tilanyɔrɔba di i ka jɔɔn dɔ ma. I kɔmɔgɔw bena masaya kɛ a tilanyɔrɔ fitinin dɔrɔn lo kan.’

Jehova tilara k’a ka desizɔn gwɛya cogo wɛrɛ la. Ka Solomani ka jɔɔn Zerobowamu to dugutaga la, a ye kira Aya kunbɛn sira kan. Aya y’a yɛrɛ ka forokiya faran tilanyɔrɔ 12 ani k’a fɔ Zerobowamu ye ko: ‘Jehova bena Israɛl masaya bɔsi Solomani kɔmɔgɔw la k’a tilan fila. Forokiya nin tilanyɔrɔ tan minɛ sabu i bena kɛ masa ye Israɛl siya tan kun na.’ Masacɛ Solomani y’o mɛn ani a tun b’a fɛ ka Zerobowamu faga! O kama, Zerobowamu bolila ka taga Ezipiti. Kɔfɛ, Solomani sara ani a dencɛ Orobowamu kɛra masa ye. Zerobowamu y’a jati ko farati t’a la ka kɔsegi Israɛl.

Israɛl cɛkɔrɔbaw y’a fɔ Orobowamu ye ko: ‘N’i ye jama minɛ ka ɲɛ, u bena kantigiya kɛ i ye.’ Nka kanbele dɔw tun ye Orobowamu teriw ye. U y’a fɔ a ye ko: ‘I ka kan ka fariya jama ma! U bila baara gwɛlɛ na kosɔbɛ!’ Orobowamu ye mɛnni kɛ a filankuruw fɛ. A fariyara jama ma, jama murutira a bolo. U ye Zerobowamu kɛ masa ye Israɛl siya tan kun na. O nana kɛ Israɛl ka masaya ye. Israɛl siya fila tɔɔ nana kɛ Zuda ka masaya ye, ani o yɔrɔ mɔgɔw tora kantigiya la Orobowamu ye. Israɛl siya 12 nunu faranna sisan.

Zerobowamu tun t’a fɛ a ka jama ka taga batoli kɛ Zeruzalɛmu, Orobowamu ka mara kɔnɔ. I b’a lɔn fɛɛn min kama wa? A tun be siranna u kana na bɔ ale kɔ ani ka taga kɛ Zerobowamu fɛ. O kama, a ye sanu misiden fila dilan ani k’a fɔ a ka jama ye ko: ‘Zeruzalɛmu yɔrɔ ka jan kojugu. Aw be se ka Jehova bato yan.’ Jama y’a daminɛ k’o sanu misidenw bato ani u ɲinɛna Jehova kɔ tugun.