Jehova muɲuna Zonasi kɔrɔ

Asiri jamana na, Ninivu dugu mɔgɔw tun ye kojugukɛlaw ye. Jehova y’a fɔ a ka kira Zonasi ye ko a ka taga Ninivu k’a fɔ mɔgɔw ye ko u ka yɛlɛmani don u ka kɛwalew la. Nka Zonasi bolila o cii ɲɛ ka taga yɔrɔ wɛrɛ. A donna kurun dɔ kɔnɔ ka taga Tarisisi.

Ka kurun to kɔgɔji kan, fɔɲɔba dɔ wulila ani kurun bolilaw siranna kosɔbɛ. U ye u ka alaw deli ani u ko: ‘Mun na nin koo be kɛra an na?’ Zonasi labanna k’a fɔ u ye ko: ‘Ne le kosɔn. Jehova ko n’ ka fɛɛn min kɛ, ne be bolila o le ɲɛ. A’ ye n’ fili jii kɔnɔ, o la fɔɲɔba nin bena lɔ.’ Kurun bolilaw tun t’a fɛ ka Zonasi fili jii kɔnɔ, nka Zonasi y’u waajibiya. U y’a fili jii kɔnɔ tuma min na, fɔɲɔba lɔra.

Zonasi y’a miiri ko ale bena sa. A jigitɔ fɔɔ jii jukɔrɔ, a tora ka Jehova deli. Jehova ye jɛgɛba dɔ ci. O jɛgɛ ye Zonasi kunu, nka a m’a faga. Zonasi tora jɛgɛba kɔnɔ ka Jehova deli ko: ‘Ne be n’ daa di i ma ko n’ bena mɛnni kɛ i fɛ tuma bɛɛ.’ Jehova ye Zonasi mara niin na jɛgɛ kɔnɔ fɔɔ tile saba. O kɔ, a y’a kɛ jɛgɛ ye Zonasi fɔɔnɔ dugukolo janin kan.

Jehova ye Zonasi kisi minkɛ, yala o kɔrɔ ko a daa bɔra Ninivu tagako la wa? Ayi. Jehova y’a fɔ Zonasi ye tugun ko a ka taga Ninivu. Sisan kɔni, Zonasi sɔnna. A tagara kuma o mɔgɔ juguw fɛ ko: ‘Ninivu dugu bena halaki yanni tile 40.’ O kɔ, kabako dɔ kɛra: Ninivukaw ye mɛnni kɛ a fɛ ani u ye yɛlɛmani don u ka kɛwalew la. Ninivu masacɛ y’a fɔ a ka dugumɔgɔw ye ko: ‘ A’ ye nimisa ani a’ ye kasi ka Ala deli. N’a sɔrɔ o bena kɛ sababu ye a b’an kisi.’ Jehova y’a ye ko Ninivukaw nimisara minkɛ, a ma sɔn ka Ninivu halaki.

Ninivu dugu ma halaki minkɛ, o ye Zonasi dimi. Miiri dɔɔni koo nin na: Jehova muɲuna Zonasi kɔrɔ ani a makarila a la, nka Zonasi ma makari Ninivukaw la. A bɔra dugu kɔnɔ ka taga sigi galamansun dɔ suman jukɔrɔ n’a be ŋunuŋunu. Kɔfɛ, o yiri fagara. O koo ye Zonasi dimi. O kama, Jehova y’a fɔ a ye ko: ‘Yiri nin koo ka gwɛlɛ i ma ka tɛmɛ Ninivukaw kan. Ne makarila u la ani u kisira.’ O kɔrɔ ko di? Ninivukaw koo ka gwɛlɛ Jehova ma ka tɛmɛ yiri kan.