Samarika muso, kɔlɔnda la

Tɛmɛnkan seli kɔ, Yezu n’a ka kalandenw ye Galile sira minɛ. U ye Samari mara cɛtigɛ. Yezu lɔra kɔlɔn dɔ daa la, min be weele ko Yakuba ka kɔlɔn, Sikari dugu gɛrɛfɛ. K’a to lafiɲɛ na o yɔrɔ la, a ka kalandenw tagara dumuni san dugu kɔnɔ.

Muso dɔ nana jii bɔ o kɔlɔn na. Yezu y’a fɔ a ye ko: “ N’ sɔn jii la n’ b’a min.” A ko: ‘Mun na i be kumana ne fɛ? Ne ye Samarika muso ye. Yahutuw tɛ kuma ni Samarikaw ye.’ Yezu y’a fɔ a ye ko: ‘ N’i tun b’a lɔn ne ye mɔgɔ min ye, ele le tun bena jii deli ne fɛ ani n’ tun bena ɲɛnamaya jii di i ma.’ Muso y’a ɲininga ko: ‘I b’a fɛ ka mun lo fɔ? Minan yɛrɛ t’i fɛ ka jii bɔ.’ Yezu ko: ‘Mɔgɔ o mɔgɔ be ne ka jii min, minnɔgɔ tɛna o tigi minɛ tugun abada.’ Muso ko: “Matigi, o jii nin di ne ma.”

O tuma na, Yezu y’a fɔ a ye ko: ‘Taga i cɛɛ weele ka na.’ Muso ko: ‘Cɛɛ tɛ n’ fɛ.’ Yezu ko: ‘Tiɲɛn b’i fɛ. I tun ye furu kɛ fɔɔ siɲɛ duuru. Sisan i be cɛɛ min fɛ, furu t’aw cɛ.’ Muso ko: ‘ N’ y’a lɔn, i ye kira lo ye. Ne ka mɔgɔw lanin b’a la ko an be se ka Ala bato kulu nin kan. Nka Yahutuw ko an be se ka Ala bato Zeruzalɛmu dɔrɔn. N’ lanin b’a la ko Masiya be na. Ale lo bena a yira an na an ka ɲi ka Ala bato cogo min na.’ O tuma na, Yezu ye fɛɛn dɔ fɔ a ye, a tun ma deli ka min fɔ mɔgɔ si ye: ‘Ne lo ye Masiya ye.’

Muso teliyara ka taga a ka dugu la k’a fɔ dugumɔgɔw ye ko: ‘A be komi n’ ye Masiya ye. A be n’ ka koow bɛɛ lɔn. A’ ye na a filɛ!’ U tugura a kɔ ka taga kɔlɔnda la ani ka kalan lamɛn Yezu fɛ.

Samarikaw y’a ɲini Yezu fɛ a ka to u ka dugu la. Yezu ye tile fila kɛ u fɛ k’u kalan. Mɔgɔ caaman lara a la. U y’a fɔ Samarika muso ye ko: ‘Komi an sera ka cɛɛ nin lamɛn, an b’a lɔn sisan ko ale lo ye duniɲa kisibaga ye tiɲɛn na.’