Yezu be ciden 12 sugandi

Yezu ye waajuli kɛ saan kelen ni kalo wɔɔrɔ ɲɔgɔn. O kɔ, a ka kan ka kooba dɔ latigɛ: a bena jɔn ni jɔn lo sugandi ka baara kɛ n’ale ye? A bena fɔrɔmasɔn di jɔn ni jɔn lo ma walisa u ka se ka kerecɛn kafo ɲɛminɛ? Walisa ka se k’o koow latigɛ, Yezu mako tun b’a la Jehova k’a ɲɛminɛ. O kama, a tagara kulu dɔ kan walisa ka kɛ a kelen, ani a ye delili kɛ suu kuru bɛɛ la. Sɔgɔma, a y’a ka kalanden dɔw weele k’u lajɛn ani a y’a ka ciden 12 sugandi. U cɛma, i hakili be jɔn ni jɔn lo tɔgɔ la? U tɔgɔw filɛ: Piyɛri, Andere, Zaki, Zan, Filipu, Baritelemi, Toma, Matiyo, Alife dencɛ Zaki, Tade, Simɔn ani Zuda Isikariyɔti.

O mɔgɔ 12 tun bena tugu Yezu kɔ a ka tagamaw na. Yezu y’u degi waajulibaara la. O kɔ, a y’u ci ka taga o baara kɛ u yɛrɛma. Jehova ye see di u ma ka jinaw gwɛn ka bɔ mɔgɔw la ani ka banabagatɔw kɛnɛya.

Yezu tun lanin b’o mɔgɔ 12 nunu na ani a y’u weele ko a teriw. Fariziɲɛw tun b’a miiri ko Yezu ka cidenw ma kalan ani ko mɔgɔ gwansanw lo. Nka Yezu tun y’u kalan u ka baara la. U tun bena kɛ ni Yezu ye a ka wagati gwɛlɛw n’a ka wagati diimanw na, i n’a fɔ tuma min na a tun be saya daa fɛ ani a kununi kɔ ka bɔ saya la. I ko Yezu, u fanba tun be bɔ Galile mara la. U dɔw tun furunin lo.

Cidenw tun ye mɔgɔ dafabaliw ye, u tun be fili. Tuma dɔw la, u tun tɛ miiri ka sɔrɔ ka kuma ani u tun be koo dɔw latigɛ minw man ɲi. Tuma dɔw la, u tun tɛ muɲu. Sɔsɔli yɛrɛ donna u ni ɲɔgɔn cɛ lɔyɔrɔba koo la. Nka u tun ye mɔgɔ ɲumanw ye minw tun be Jehova kanu. Yezu taganin kɔ, olu lo tun bena kɛ kerecɛn kafo mɔgɔ fɔlɔw ye ani o kafo ka baara tun bena la olu lo kun na.