Yezu ka surafana laban

Saan o saan, Yahutuw tun be Tɛmɛnkan seli kɛ Nisankalo tile 14nan loon na. O tun b’u hakili jigi ko Jehova y’u kisi ka bɔ jɔnya la Ezipiti ani ka taga n’u ye layidu jamana na. Saan 33 wagati la, Yezu n’a ka cidenw ye Tɛmɛnkan seli kɛ Zeruzalɛmu, sangaso dɔ kɔnɔ. Dumuni bannin kɔ, Yezu ko: ‘Aw cɛma, dɔ bena ne janfa.’ O kuma digira cidenw na. U ye Yezu ɲininga ko: ‘O tigi ye jɔn ye?’ Yezu ko: ‘ N’ bena burukun nin di min ma, o tigi lo.’ O kɔ, a ye burukun dɔ di Zuda Isikariyɔti ma. Zuda wulila yɔrɔnin kelen ka bɔ boon kɔnɔ.

Yezu ye delili kɛ, ka buru karikari ani k’u di ciden tɔɔw ma. A ko: ‘ A’ ye buru nin dumu. O ye n’ farikolo tagamasiɲɛ ye, n’ bena min di aw kosɔn.’ O kɔ, a ye diwɛn ta ka barika la Ala ye ani a y’o diwɛn di a ka cidenw ma. A ko: ‘ A’ ye diwɛn nin min. O ye ne joli tagamasiɲɛ ye, n’ bena min di walisa jurumuw ka se ka yafa. N’ be layidu ta aw ye ko aw bena kɛ masaw ye ne kɔrɔ sankolo la. A’ ye to k’o kɛ saan o saan walisa k’aw hakili jigi ne la.’ Fɔɔ bi, Yezu ka kalandenw be ɲɔgɔn lajɛn saan o saan Nisan kalo tile 14nan loon sufɛ. O lajɛn be weele ko Matigi ka surafana.

Dumuni bannin kɔ, sɔsɔli wulila cidenw cɛ. U tun b’a fɛ k’a lɔn u cɛma jɔn lo ye mɔgɔba ye. Nka Yezu y’a fɔ u ye ko: ‘Min b’a yɛrɛ jati mɔgɔ dennin ye (o kɔrɔ, min b’a jati ko a tɛ foyi ye), o tigi lo ye mɔgɔba ye aw cɛma.

‘Aw ye ne teriw ye. N’ Faa b’a fɛ n’ ka min fɔ aw ye, n’ y’o bɛɛ fɔ aw ye. Yanni dɔɔni, n’ bena taga n’ Faa fɛ sankolo la. Aw bena to yan. Mɔgɔw bena a ye ko aw be ɲɔgɔn kanu. U bena a lɔn o le fɛ ko aw ye n’ ka kalandenw ye. Aw ka kan ka ɲɔgɔn kanu i ko n’ ye aw kanu cogo min na.’

A laban, Yezu ye Jehova deli ko a k’a ka kalandenw bɛɛ latanga ani k’u dɛmɛ u ka jɛn ka baara kɛ ɲɔgɔn fɛ hɛɛrɛ la. A ye Jehova deli fana ko a tɔgɔ ka saniya. O kɔ, a n’a ka cidenw ye dɔnkili la ka Jehova tando, ani u wulila ka bɔ. U tun bena Yezu minɛ wagati min na, o tun man jan tugun.