U ye Yezu minɛ

Yezu n’a ka cidenw ye Sedirɔn kɔkɛnɛ tigɛ ka taga Oliviyeyirikulu kan. Dugu tun tilara fɔɔ ka janfa ani kalo tun gwɛnin lo parapara. U sera Zɛtisemane nankɔ la tuma min na, Yezu y’a fɔ u ye ko: “Aw ye to yan yɔrɔ la, aw kana sinɔgɔ.” O kɔ, Yezu tagara ɲɛfɛ dɔɔni k’a kunbiri gwan duguma. A dusu kasininba ye Jehova deli ko: “E sago ka kɛ.” O kɔ, Jehova ye mɛlɛkɛ dɔ ci ka na Yezu jija. Tuma min na Yezu kɔsegira a ka cidenw ma, a y’a ye k’u be sinɔgɔra. A ko: ‘Aw ye wuli sinɔgɔ la! Sinɔgɔ wagati tɛ! N’ ka ɲi ka don n’ juguw bolo tuma min na, o tuma sera.’

O kuma fɔnin kɔ dɔrɔn, Zuda sera u fɛ. Jamaba tun b’a kɔ, murujanw ni berew tun b’u bolo. A tun b’a lɔn ko a bena Yezu sɔrɔ o nankɔ la sabu u tun ka teli ka taga yen. Zuda tun kɔnna k’a fɔ sɔrɔdasiw ye ko a bena u dɛmɛ k’a lɔn min ye Yezu ye. A sinna Yezu ma ani a ko: “I ni suu, karamɔgɔ.” O kɔ, a y’a bolo meleke Yezu kaan na. Yezu ko: ‘Zuda, i be n’ janfa o cogo le la wa?’

Yezu gwɛrɛla jama na ani a y’u ɲininga ko: “Aw be jɔn lo yɔrɔ ɲinina?” U ko: “Nazarɛtika Yezu lo.” A y’u jaabi ko: “Ne lo.” O yɔrɔnin bɛɛ, u girinna ka taga kɔfɛ ani u benna duguma. Yezu y’u ɲininga tugun ko: “Aw be jɔn lo yɔrɔ ɲinina?” U y’a fɔ tugun ko: “Nazarɛtika Yezu lo.” Yezu y’u jaabi ko: ‘ N’ y’a fɔ aw ye ko ne lo. Aw ye n’ ka kalandenw to u ka taga.’

Tuma min na Piyɛri y’a faamu fɛɛn min be kɛra, a ye murujan ta ka Malikusi tulo tigɛ. O Malikusi tun ye sarakalasebagaw kuntigiba ka jɔɔn lo ye. Nka Yezu magara o cɛɛ tulo la k’a kɛnɛya. O kɔ, a y’a fɔ Piyɛri ye ko: ‘I ka murujan don a foroko la. N’i be kɛlɛ kɛ ni murujan ye, murujan lo bena kɛ k’i faga.’ Sɔrɔdasiw ye Yezu minɛ k’a bolow siri. Cidenw bolila. O kɔ, jama tagara ni Yezu ye sarakalasebagaw kuntigiba Anɛ fɛ. Anɛ ye ɲiningaliw kɛ Yezu ye. O kɔ, a y’a bila ka taga sarakalasebagaw kuntigiba Kayifu ka soo. Nka mun lo ye cidenw sɔrɔ?