Yezu be kɔsegi sankolo la

Yezu n’a ka kalandenw ye ɲɔgɔn sɔrɔ Galile. A ye cikan kɔrɔtaninba nin di u ma ko: ‘Aw ye taga siyaw bɛɛ la mɔgɔw kɛ ne ka kalandenw ye. Ne ye aw kalan fɛɛn minw bɛɛ la, aw y’u kalan o la ani k’u batize.’ O kɔ, a ye layidu ta u ye ko: ‘Aw kana ɲinɛ ko ne be n’aw ye tuma bɛɛ.’

Tile 40 Yezu suu kununin kɔ, a y’a yɛrɛ yira a ka kalanden caamanba la Galile ani Zeruzalɛmu. A y’u kalan koo kɔrɔtaninw na ani a ye kabako caaman kɛ. O kɔ, Yezu n’a ka cidenw ye ɲɔgɔn sɔrɔ a siɲɛ laban na oliviyeyirikulu kan. A y’a fɔ u ye ko: ‘Aw kana bɔ Zeruzalɛmu. Faa ye layidu ta aw ye fɛɛn min kosɔn, aw ye to k’o kɔnɔ.’

A ka cidenw m’a faamu a b’a fɛ ka min fɔ. U y’a ɲininga ko: ‘I bena kɛ Masacɛ ye Israɛl kun na sisan wa?’ A y’u jaabi ko: ‘Jehova m’a latigɛ ko ne ka kɛ masacɛ ye sisan. Yanni dɔɔni, aw bena fanga sɔrɔ ka bɔ hakili senu fɛ ani aw bena kɛ ne seerew ye. A’ ye taga waajuli kɛ Zeruzalɛmu, Zuda, Samari ani fɔɔ ka taga se dugukolo daan bɛɛ ma.’

O kɔ, Yezu yɛlɛla sankolo la ani sankaba dɔ y’a datugu. A ka kalandenw tora ka sankolo filɛ, nka a tun tagara.

Kalandenw bɔra oliviyeyirikulu kan ka taga Zeruzalɛmu. U tun be to ka ɲɔgɔn lajɛn sanbon dɔ kɔnɔ walisa ka delili kɛ. U tun be kɔnɔni kɛra Yezu ka cikan wɛrɛw di u ma.