Kerecɛn diinan jɛnsɛnna jamana caaman na

Yezu tun ye cii di a ka kalandenw ma ko u ka kibaro diiman jɛnsɛn dugukolo bɛɛ kan. Cidenw y’o cikan labato. Saan 47 wagati la, balima minw be Antiyɔsi, olu ye Pol ni Barnabasi ci ka taga waajuli kɛ dugu dɔw la. O waajulikɛla fila tun kisɛyanin lo. U ye waajuli kɛ Azi mara tileben fan fɛ yɔrɔ bɛɛ la, i n’a fɔ: Lisitre, Dɛribe ani Ikoniyɔmu.

Pol ni Barnabasi tun be bɛɛ waaju: nafolotigiw, fantanw, kanbelew ni sunguruw ani mɔgɔkɔrɔbaw. Mɔgɔ caaman sɔnna kibaro diiman na Yezu koo la. Tuma min na Pol ni Barnabasi tun be Sipɔrɔ jamana ka gofɛrɛnɛrɛ Serijusi Pɔlusi waajura, subagacɛ dɔ y’a ɲini k’u bali. Pol y’a fɔ a ye ko: ‘Jehova bena i ɲangi.’ O subagacɛ ɲɛɛw fiyenna yɔrɔnin kelen. Gofɛrɛnɛrɛ Pɔlusi y’o ye minkɛ, a limaniyara.

Pol ni Barnabasi ye waajuli kɛ yɔrɔ bɛɛ: soo ni soow, lɔgɔfiyɛw la, siradaw la ani batosow kɔnɔ. U ye murukucɛ dɔ kɛnɛya Lisitre. Mɔgɔ minw y’o kabako ye, olu y’a miiri ko Pol ni Barnabasi tun ye alaw ye ani u y’a ɲini k’u bato. Nka, Pol ni Barnabasi y’u bali k’o kɛ. U y’a fɔ u ye ko: ‘ A’ ye Ala dɔrɔn lo bato! An ye adamaden gwansanw lo ye.’ O kɔ, Yahutu dɔw nana ani u y’a kɛ jama wulila Pol kama. Jama ye Pol bon ni kabakuruw ye k’a kooro ka taga a fili dugu kɔfɛ ani u y’a to yen sabu u tun b’a miiri ko a sara. Nka Pol tun ma sa! Balimaw teliyara ka na a dɛmɛ ani k’a minɛ ka don n’a ye dugu kɔnɔ. Kɔfɛ, Pol kɔsegira ka taga Antiyɔsi.

Saan 49, Pol tagara waajuli kɛ dugu dɔw la a siɲɛ filanan na. A kɔsegira ka taga bɔ balimaw ye Azi mara tileben fan fɛ fɔlɔ. O kɔ, a tagara yɔrɔjan, fɔɔ Erɔpu jamana na ka taga waajuli kɛ. A tagara Atɛni, Efɛzi, Filipi, Tesaloniki ani dugu wɛrɛw la. Silasi, Luka ani Timote tagara Pol kɔ a ka voyazi la. Timote tun ye kanbele ye o wagati la. U ye baara kɛ ɲɔgɔn fɛ ka kafow juu sigi ani ka balimaw ka limaniya barika bonya. Pol ye saan kelen ni tilan kɛ Korɛnti dugu la walisa ka balimaw jija. A ye waajuli kɛ, ka mɔgɔw kalan ani ka lɛtɛrɛw sɛbɛ kafo caaman ma. Walisa k’a daradumuni sɔrɔ, a tun be fanibuguw lo dilan. Kɔfɛ, Pol kɔsegira ka taga Antiyɔsi.

O kɔ, saan 52, Pol tagara a ka voyazi sabanan na. A kɔnna ka taga Azi mara tileben fan fɛ. A tagara fɔɔ Filipi jamana saheli fan fɛ ka sɔrɔ ka taga Korɛnti dugu la. Pol ye saan caaman kɛ Efɛzi: a ye mɔgɔw kalan, ka dɔw kɛnɛya ani ka kafo dɛmɛ. A tun be forobakalanw kɛ loon o loon lakɔliso dɔ la. Mɔgɔ caaman y’a lamɛn ani u y’u sɔɔn yɛlɛma. Waajuli kɛnin kɔ jamana caaman na, Pol tagara Zeruzalɛmu.