I ka kɛ hɔɔrɔn ye koo bɛɛ la

1, 2. N’an b’an jija ka kɛ mɔgɔ hɔɔrɔnw ye, o be mun kɛ Jehova la?

LOON dɔ, cɛdennin dɔ bɔra lakɔliso la ani a tun be tagara soo. A ye pɔrtimɔnɛ dɔ tɔmɔ ani wari tun fanin b’a kɔnɔ. A bena mun lo kɛ? A tun be se k’o ta k’a mara a kun. Nka, sanni a k’o kɛ, a y’o pɔrtimɔnɛ segi a tigi ma. O cɛdennin bamuso y’o koo mɛn tuma min na, a ninsɔn diyara a deen kɔrɔ.

² Bangebagaw fanba ninsɔn ka di n’u deenw ye mɔgɔ hɔɔrɔnw ye. An sankolola Faa Jehova ye “Ala tiɲɛtigi ye.” N’an ye mɔgɔ hɔɔrɔnw ye, o b’a ninsɔn diya (Zaburuw 31:6). An b’a fɛ k’an koo diya a ye ani ka banba an “tagamacogo ka ɲa tuma bɛɛ.” (Eburuw 13:18). A be se ka gwɛlɛya an ma ka kɛ mɔgɔ hɔɔrɔnw ye. An ka koo naani lajɛ o koo la ani an k’a filɛ nafa min b’a la ka kɛ mɔgɔ hɔɔrɔnw ye.

I KƆNƆ GWƐ I YƐRƐ YE

3-5. a) An be se k’an yɛrɛ nigɛ cogo di? b) Mun lo bena an dɛmɛ ka gwɛ an yɛrɛ ye?

³ Walisa k’i kɔnɔ gwɛ tɔɔw ye, fɔɔ i k’i kɔnɔ gwɛ i yɛrɛ ye fɔlɔ. O man nɔgɔ tuma bɛɛ. Saan kɛmɛkulu fɔlɔ la, Lawodise kerecɛnw tun b’a miiri ko u koo ka di Ala ye, nka u tun b’u yɛrɛ nigɛra le (Yirali 3:17). An ye mɔgɔ sifa min ye tigitigi, an fana be se k’an yɛrɛ nigɛ o koo la.

⁴ Kalanden Zaki y’a fɔ ko: “Ni min y’a miiri ko ale be Alasira tagama k’a sɔrɔ a t’a kumacogo kɔlɔsi, o tigi b’a yɛrɛ nigɛ, kuun te o tigi ka Alasira koo la.” (Zaki 1:26). N’an be kumajugu fɔ, ka mɔgɔw lɔgɔbɔ, ka ngalon tigɛ, ani k’a miiri ko Ala tɛna o jati sabu an be koo ɲuman dɔw kɛ, an b’an yɛrɛ lafilila le. Mun lo be se k’an dɛmɛ an kana an yɛrɛ nigɛ?

⁵ N’an b’an yɛrɛ filɛ dugalen na, an b’an sawura lo ye. N’an be Bibulu kalan, an ye mɔgɔ min ye tigitigi, an be se k’o ye. Bibulu be se k’an dɛmɛ k’an ka jogo ɲumanw n’an ka fiyɛnw lɔn. A b’an dɛmɛ k’a lɔn an ka kan ka yɛlɛmani minw kɛ an miiricogo, an ka kɛwalew n’an kumacogo la (Zaki 1:23-25 kalan). N’an b’a miiri ko fiɲɛ si t’an na, an tɛna se k’o yɛlɛmaniw kɛ. O kama, an k’a to Bibulu k’an dɛmɛ k’a lɔn an ye mɔgɔ min ye tigitigi (Dusukasidɔnkili 3:40; Aze 1:5). Delili fana b’an dɛmɛ k’a lɔn an ye mɔgɔ min ye tigitigi. An be se ka Jehova deli a k’an sɛgɛsɛgɛ ani a k’an dɛmɛ k’an ka fiɲɛw lɔn walisa k’u kɛlɛ (Zaburuw 139:23, 24). An k’a to an hakili la ko “mɔgɔjugu koo ka go Masaba ye. Nga a be mɔgɔɲumanw kɛ a teriw ye.”—Talenw 3:32.

KA KƐ MƆGƆ HƆƆRƆN YE DENBAYA KƆNƆ

6. Mun na furucɛ n’a muso ka ɲi ka gwɛ ɲɔgɔn ye?

⁶ A kɔrɔtanin lo kosɔbɛ ka kɛ mɔgɔ hɔɔrɔn ye denbaya kɔnɔ. Ni furucɛ n’a muso gwɛnin lo ɲɔgɔn ye, u b’a ye k’u latanganin lo ani k’u be se k’u jigi la ɲɔgɔn kan. Nanbara kɛcogo ka ca furu kɔnɔ. Furuɲɔgɔn dɔ be se k’a daminɛ ka ɲɛbɔ mɔgɔ wɛrɛ fɛ, ka porno filɛ wala a be se k’a daminɛ ka jarabiko kɛ ni mɔgɔ dɔ ye dogo dogo la. A kɔrɔsi Zaburu sɛbɛbaga dɔ ye min fɔ. A ko: “Ne te sigi ni namaramɔgɔw ye, n fana te to ni filankafɔw ye.” (Zaburuw 26:4). Ni kakalaya miiriya b’i kɔnɔ, o b’a yira ko i gwɛnin tɛ i furuɲɔgɔn ye. O bena i ka furu nagasi.

7, 8. I be se ka tɛmɛ Bibulu fɛ cogo di k’i deenw dɛmɛ u k’a faamu ko a kɔrɔtanin lo ka kɛ mɔgɔ hɔɔrɔn ye?

⁷ Denmisɛnw fana ka ɲi k’a lɔn ko a kɔrɔtanin lo ka kɛ mɔgɔ hɔɔrɔn ye. Bibulu be se ka bangebagaw dɛmɛ k’u kalan o la. Bibulu be mɔgɔ dɔw kofɔ minw tun tɛ mɔgɔ hɔɔrɔnw ye. Ɲɛyirali fɛ, Akan ye sonyali kɛ. Geyazi ye ngalon tigɛ ka wari sɔrɔ. Zuda ye wari sonya ani kɔfɛ, a ye Yezu janfa warigwɛ 30 kosɔn.—Zozuwe 6:17-19; 7:11-25; 2 Masacɛw 5:14-16, 20-27; Matiyo 26:14, 15; Zan 12:6.

⁸ Bibulu be kuma fana mɔgɔ caaman koo la minw tun ye hɔɔrɔnw ye. Ɲɛyirali fɛ, Yakuba y’a fɔ a deenw ye k’u ye wari min ye u ka bɔrɔw kɔnɔ, u k’o segi a tigi ma. Zɛfite n’a denmuso tun y’u daa di Ala ma koo min na, u y’o dafa. Ani, Yezu y’a yira ko a ye mɔgɔ hɔɔrɔn ye gwɛlɛyaw bɛɛ n’a ta (Zɛnɛzi 43:12; Kiritigɛlaw 11:30-40; Zan 18:3-11). O ɲɛyiraliw be se ka denmisɛnw dɛmɛ u k’a faamu ko a kɔrɔtanin lo ka kɛ mɔgɔ hɔɔrɔn ye.

9. Ni bangebagaw ye mɔgɔ hɔɔrɔnw ye, o bena u deenw dɛmɛ cogo di?

⁹ Bangebagaw be se ka kalan sɔrɔ Bibulu ka sariyakolo nin na min kɔrɔtanin lo: “Ayiwa, e min be mɔgɔ wɛrɛw kalan, e t’i yɛrɛ kalan! E b’a fɔ k’u kana soɲali kɛ, e do b’a kɛra.” (Ɔrɔmukaw 2:21). Ni bangebagaw be koo dɔ fɔ ani olu yɛrɛ t’o kɛ, u deenw b’o kɔrɔsi. N’an b’a fɔ an deenw ye k’u ka kɛ mɔgɔ hɔɔrɔnw ye k’a sɔrɔ anw yɛrɛ tɛ mɔgɔ hɔɔrɔnw ye, u tɛna foyi lo faamu. Ni denmisɛnw b’a kɔrɔsi k’u bangebagaw be ngalon tigɛ hali koo fitininw na, olu fana bena o ɲɔgɔn lo kɛ (Luka 16:10 kalan). Nka, ni denmisɛnw ɲɛɛ b’a la k’u bangebagaw ye mɔgɔ hɔɔrɔnw ye, o be se k’u dɛmɛ. O be se k’a to olu fana be kɛ mɔgɔ hɔɔrɔnw ye n’u nana kɛ bangebagaw ye.—Talenw 22:6; Efɛzikaw 6:4.

KA KƐ MƆGƆ HƆƆRƆN YE KAFO KƆNƆ

10. An be se k’a yira cogo di ko an ye mɔgɔ hɔɔrɔnw ye n’an be kumana n’an kerecɛnɲɔgɔnw ye?

¹⁰ An ka ɲi ka gwɛ an kerecɛnɲɔgɔnw ye. Baro gwansan dɔ be se ka bari ka yɛlɛma ka kɛ kɔrɔfɔli wala nafigiya yɛrɛ ye. N’an ye kuma dɔ mɛn ani an b’o fɔ mɔgɔ wɛrɛ ye k’a sɔrɔ an m’a lɔn ni tiɲɛn lo, n’a sɔrɔ a bena kɛ ko an be ngalon lo jɛnsɛnna. O kama, a ka fisa an ka se an daa kɔrɔ (Talenw 10:19). Ka kɛ mɔgɔ hɔɔrɔn ye, o kɔrɔ tɛ ko min b’an kɔnɔ, an be min lɔn ani an ye min mɛn an ka ɲi k’o bɛɛ fɔ. An b’a fɛ ka min fɔ, hali ni tiɲɛnko lo, n’a sɔrɔ o t’an ka sira la wala kuun t’a la ani a bɛnnin tɛ an k’o fɔ (1 Tesalonikaw 4:11). Dɔw be kuma jugu fɔ ani u b’a ɲini ka joo di u yɛrɛ ma u kɛtɔ k’a fɔ ko: “N’ ye gwɛ lo fɔ.” Nka, an minw ye Jehova sagokɛlaw ye, an b’a fɛ an ka kumaw fɔcogo ka ɲɛ ani a ka diya tuma bɛɛ.—Kɔlɔsikaw 4:6 kalan.

11, 12. a) Ni mɔgɔ dɔ ye jurumu kɛ ani a ma gwɛ o koo la, mun na o be se ka koow tɔɔ juguya? b) An ka ɲi k’an yɛrɛ ɲininga mun ni mun lo la? c) An be se ka tiɲɛn fɔ Jehova ka ɔriganisasiyɔn ye koo jumanw na?

¹¹ Jehova ye diinan mɔgɔkɔrɔw sigi baara min na, o ye ka kafodenw dɛmɛ. A ka nɔgɔ u fɛ k’an dɛmɛ n’an be gwɛ u ye. Mun na do? N’i man kɛnɛ ani i b’a fɛ dɔgɔtɔrɔ dɔ k’i dɛmɛ, i bena bana tagamasiɲɛ dɔw dogo a la wa? N’i y’o kɛ, dɔgɔtɔrɔ bena se k’i dɛmɛ cogo di? O cogo kelen na, n’an ye jurumuba dɔ kɛ, an man ɲi ka ngalon tigɛ o koo la. Nka, an ka ɲi k’an kɔnɔ gwɛ k’o fɔ diinan mɔgɔkɔrɔw ye (Zaburuw 12:3; Kɛwaliw 5:1-11). Sisan, miiri k’a filɛ: N’i y’a ye ko i teri dɔ ye jurumuba dɔ kɛ, i bena mun lo kɛ do? (Levitiki 5:1). Yala i ben’a fɔ ko: “Ni n’ teri lo tiɲɛn na, n’ tɛna o koo fɔ mɔgɔ si ye.” Wala i bena a to i hakili la ko diinan mɔgɔkɔrɔw lo be se k’a dɛmɛ ka teriya kɛ ni Jehova ye kokura wa?—Eburuw 13:17; Zaki 5:14, 15.

¹² An ka ɲi ka tiɲɛn fɔ Jehova ka ɔriganisasiyɔn ye fana n’an be rapɔɔri dɔw sɛbɛra, i n’a fɔ an ka waajuli baara rapɔɔri. N’an be sɛbɛ dɔ dafara ka kɛ piyɔniye ye wala ka cidenya baara dɔ kɛ, an ka tiɲɛn fɔ.—Talenw 6:16-19 kalan.

13. N’i be baara kɛ n’i kerecɛnɲɔgɔn ye, i be se k’a yira cogo di ko i ye mɔgɔ hɔɔrɔn ye?

¹³ Kerecɛnw man kan k’u ka baarakow ɲagami ni Alakow ye. An man kan ka jagoko kɛ n’an be Masaya Boon na wala waajuli la. An man kan k’an balimaw nanbara fana jagokow la. N’i ye Jehova Seere dɔw ta baara la, u sara wagati latigɛnin na. Aw bɛnna sara min na, o di u ma. Baaradenw ka kan ni min ye sariya ɲɛɛ kɔrɔ, o kɛ u ye, i n’a fɔ, k’u tɔgɔ sɛbɛ lakɛsi la wala k’u sara hali n’u be kɔnze la (1 Timote 5:18; Zaki 5:1-4). N’i be baara kɛ i kerecɛnɲɔgɔn dɔ fɛ, kana a miiri ko a ka ɲi k’i fisaya ni baaraden tɔɔw ye (Efɛzikaw 6:5-8). Aw bɛnna a la ko i bena baara min kɛ ani ko i bena lɛri daa min kɛ baara la, i janto k’o kɛ.—2 Tesalonikaw 3:10.

14. Kerecɛnw ka ɲi ka mun lo kɛ fɔlɔ ka sɔrɔ ka jagoko dɔ daminɛ ɲɔgɔn fɛ?

¹⁴ N’a sɔrɔ ele ni balima dɔ y’a latigɛ ka baara dɔ kɛ ɲɔgɔn fɛ. O be se k’a to aw be wari fara ɲɔgɔn kan wala ka juru ta. Bibulu ka sariyakolo nin be se k’aw dɛmɛ kosɔbɛ o koo la: aw ka koo bɛɛ sɛbɛ ka bila! Tuma min na kira Zeremi ye dugukolo dɔ san, a y’o koo sɛbɛ k’a kopi fila kɛ. Seerew y’u bolonɔ la o sɛbɛ fila kan ani Zeremi y’u mara yɔrɔ dɔ la (Zeremi 32:9-12; Zɛnɛzi 23:16-20 fana lajɛ). Dɔw b’a miiri ko u bɛnna min na n’u balima ye, n’u y’o sɛbɛ ka bila, a be i n’a fɔ u lanin tɛ u balima la. Nka tiɲɛn na, n’o sɛbɛra ka bila, o b’u tanga sɔsɔli, jigitigɛ ani bɛnbaliya ma. Hali n’i be jagoko dɔ kɛra n’i kerecɛnɲɔgɔn ye, a to i hakili la ko kafo ka hɛɛrɛko kɔrɔtanin lo ka tɛmɛ jagoko kan.—1 Korɛntikaw 6:1-8; Kunnafoni wɛrɛw lajɛ, a 30nan.

KA KƐ MƆGƆ HƆƆRƆN YE DUNIƝA KA KOOW LA

15. Ka nanbara kɛ jagokow la, Jehova be mun lo miiri o koo la?

¹⁵ An ka ɲi ka mɔgɔw bɛɛ minɛ ni hɔɔrɔnya ye, hali minw yɛrɛ tɛ Jehova Seerew ye. A kɔrɔtanin lo Jehova fɛ an ka kɛ mɔgɔ hɔɔrɔnw ye. “Sumanikɛminan namarata koo ka go Masaba ye. Nga min ka ɲi, o koo ka d’a ye.” (Talenw 11:1; 20:10, 23). Bibulu sɛbɛwagati la, feereli ni sanni tun be kɛ ni sumanikɛlan ye. Nka, feerelikɛla dɔw tun be mɔgɔw nanbara: u tun bɛnna min na ni sannikɛla ye, u tun ka teli ka dɔ bɔ o hakɛ la, wala ka dɔ fara o sɔngɔ kan. Bi fana, mɔgɔw be nanbara kɛ jagokow la. O nanbarakow ka gwo Jehova ye i n’a fɔ u tun ka gwo a ye cogo min na galen.

16, 17. An ka ɲi ka ban nanbarako jumanw lo la?

¹⁶ A be se ka gwɛlɛya an kelen kelen bɛɛ ma ka kɛ mɔgɔ hɔɔrɔn ye koo dɔw la i n’a fɔ: n’an be baara ɲinina, n’an be gofɛrɛnɛman ka sɛbɛ dɔ dafara, wala n’an be ɛkizamɛn kɛra lakɔliso la. Mɔgɔ caaman b’a miiri ko ka ngalon tigɛ, ka koow lakali k’a dama tɛmɛ wala ka mɔgɔw jaabi cogo dɔ la walisa k’u lafili, o tɛ koo jugu ye. O tɛ bari an na sabu Bibulu kɔnna k’a fɔ ko laban loonw na, mɔgɔw bena “kɛ sɔnjuguw ye, wari koo bena diya u ye kosɔbɛ, . . . koɲuman tena diya u ye.”—2 Timote 3:1-5.

¹⁷ Tuma dɔw la, an be se k’a miiri ko mɔgɔ minw be nanbarakow kɛ, olu lo be sanga sɔrɔ bi (Zaburuw 73:1-8). Kerecɛn dɔ ka baara be se ka tiɲɛ, u be se k’a nanbara k’a ka wari ta wala k’a tɔɔrɔ baarakɛyɔrɔ la sabu a ye mɔgɔ hɔɔrɔn ye. Ka kɛ mɔgɔ hɔɔrɔn ye, o man nɔgɔ nka nafa b’o la. Mun na do?

NAFA MIN B’A LA KA KƐ MƆGƆ HƆƆRƆN YE

18. Nafaba juman lo b’a la ka kɛ mɔgɔ hɔɔrɔn ye?

¹⁸ Mɔgɔ hɔɔrɔnw, tiɲɛnfɔlaw ani lannamɔgɔw sɔrɔ man di bi. Nka ni mɔgɔw b’a lɔn ko an y’o ɲɔgɔnna mɔgɔ ye, o ye kunkɔrɔta yɛrɛ lo ye. Sababu dira an kelen kelen bɛɛ ma ka kɛ o ɲɔgɔnna mɔgɔ ye (Mise 7:2). Tiɲɛn lo ko mɔgɔ dɔw be se k’i lɔgɔbɔ ani k’a fɔ ko faa lo b’i la sabu i ye mɔgɔ hɔɔrɔn ye. Nka, i ka hɔɔrɔnya bena diya dɔw ye ani u bena la i la. Duniɲa kuru bɛɛ kɔnɔ, mɔgɔw b’a lɔn ko Jehova Seerew ye mɔgɔ hɔɔrɔnw ye. Patɔrɔn dɔw fɛ, a ka fisa ka Jehova Seerew lo ta baara la sabu u b’a lɔn k’u tɛna u nanbara. Tuma dɔw la, u be dɔw gwɛn baara la u ka nanbara kosɔn. Nka, u ka teli ka Jehova Seerew to yen sabu olu ye mɔgɔ hɔɔrɔnw ye.

19. N’i ye mɔgɔ hɔɔrɔn ye, jɛnɲɔgɔnya min be ele ni Jehova cɛ, o bena kɛ cogo di?

¹⁹ N’i ye mɔgɔ hɔɔrɔn ye koo bɛɛ la, i dusukun tɛna i kɛlɛ ani i hakili bena sigi. I ko ciden Pol, i bena se k’a fɔ ko: “Anw kɔni lanin b’a la ko an kɔnɔ gwɛnin lo.” (Eburuw 13:18). Min yɛrɛ kɔrɔtanin lo, o ye ko i be jijali min bɛɛ kɛra ka kɛ mɔgɔ hɔɔrɔn ye koo bɛɛ la, i Faa kanulen Jehova b’o kɔrɔsi ani o ka di a ye.—Zaburuw 15:1, 2; Talenw 22:1 kalan.