KALANSEN 07

Jehova Ala be cogo di?

Édition imprimée

E ka miiri la, Jehova Ala be cogo di? Yala a be i n’a fɔ mɔgɔba dɔ, i be min bonya kosɔbɛ nka min yɔrɔ ka jan i la i ko lolo sankolo la wa? Wala ele fɛ, Ala be yen yɛrɛ yɛrɛ la ani a be ni jogo dɔw ye wa? Walima i b’a miiri ko fanga kabakoman dɔ lo i n’a fɔ sanfɔɲɔ fanga ɲɔgɔn wa? Jehova Ala be cogo di yɛrɛ yɛrɛ la? Bibulu b’a yira jogo minw be Jehova la. A b’a yira fana ko a b’a mako don i la.

1. Mun na an tɛ se ka Ala ye?

“Ala ye Nii [o kɔrɔ, hakili] le ye.” (Zan 4:24). Jehova Ala tɛ ni farisogo ye i n’a fɔ an adamadenw. A be sankolo la, a tɛ se ka ye ɲɛɛ na.

2. Jehova ka jogo dɔw ye jumanw ye?

An tɛ se ka Jehova Ala ye. Nka, n’an b’a ɲini k’a lɔn, a koo be diya an ye sabu mɔgɔ min lo, a jogow ka ɲi yɛrɛ le. Bibulu b’a fɔ ko: “Kotilennin le ka di Masaba [ Jehova] ye, a t’a ka mɔgɔtilenninw to ten.” (Zaburuw 37:28). Ka fara o kan, Jehova “ye ɲumanya ni makaritigi ye” sanko mɔgɔ tɔɔrɔninw ta fan fɛ (Zaki 5:11). Jehova “be dusukasibagaw gɛrɛfɛ. A be mɔgɔ jigitigɛninw kisi.” (Zaburuw 34:19). I b’a lɔn wa? An be min kɛ, o be se k’a dusu diya wala k’a dusu kasi. N’an y’a latigɛ ka koo jugu kɛ, o b’a dusu tiɲɛ (Zaburuw 78:40, 41). Nka, n’an be koo ɲuman kɛ, o b’a ninsɔndiya.—Talenw 27:11 kalan.

3. Jehova y’a yira cogo di ko a b’an kanu?

Jehova ka jogow bɛɛ la, kanuya lo ɲɔgɔn tɛ yen. Tiɲɛn na, “Ala ye kanuya de ye.” (1 Zan 4:8, Bible senuma). Jehova tɛmɛna Bibulu fɛ k’a yira an na ko a b’an kanu. Nka o dɔrɔn tɛ, a be tɛmɛ a ka danfɛnw fana fɛ k’a yira an na ko a b’an kanu (Kɛwaliw 14:17 kalan). Misali la, miiri k’a filɛ a y’an dan cogo min na. A ye see di an ma ka kulɛri cɛɲumaninw filɛ, ka miziki diimanw lamɛn ani ka dumuni diimanw diya lɔn. A b’a fɛ an ka ɲɛnamaya diyabɔ.

A ƝINI KA DƆ LƆN TUGUN

A filɛ Jehova be tɛmɛ fɛɛrɛ min fɛ ka koo kabakomanw kɛ. O kɔ, a filɛ Jehova b’a ka jogo kabakomanw yira cogo min na.

4. Hakili senu: O ye Ala ka baarakɛ fanga lo ye

Jaaw: Fɛɛn minw kɛra hakili senu barika la. Jaa fɔlɔ: Planɛtiw ani duniɲa. Jaa 2nan: Bibulu sɛbɛbaga dɔ be Ala ka kuma sɛbɛra kitabu melekenin dɔ kan.

Jehova be baara kɛ n’a ka hakili senu ye i ko an be baara kɛ n’an bolow ye cogo min na. Bibulu b’a yira ko hakili senu tɛ mɔgɔ ye. Nka Ala ka fanga lo, a be koow kɛ ni min ye. Luka 11:13 ani Kɛwaliw 2:17 kalan. O kɔ, a’ ye ɲiningali nunu kɛ ani ka baro kɛ u kan:

Minw be Ala deli ko a ka hakili senu di u ma, a be se k’o “di” u ma. O la, e ka miiri la, hakili senu ye mɔgɔ lo ye, wala Ala ka baarakɛ fanga lo? Mun na i ko ten?

Jehova be koo kabakomanw kɛ n’a ka hakili senu ye. Zaburuw 33:6 ani 2 Piyɛri 1:20, 21 kalan. O kɔ, a’ ye ɲiningali nin kɛ ani ka baro kɛ o kan:

Jehova ye baara kɛ n’a ka hakili senu ye ka mun ni mun lo kɛ?

5. Jehova be ni jogo ɲumanw ye minw b’a koo diya mɔgɔ ye

Kira Musa tun be Ala bato kantigiya la kabi saan caaman. O bɛɛ n’a ta, a mako tun b’a la k’a Danbaga lɔn ka ɲɛ. O kama, a y’a fɔ Ala ye ko: “Ne b’a ɲini i fɛ ko e k’i ka koo yira ne la. O la, ne bena i lɔn.” (Ɛkizɔdi 33:13). Jehova ye Musa jaabi cogo di? A y’a ka jogo dɔw yira a la. Ɛkizɔdi 34:4-6 kalan. O kɔ, a’ ye ɲiningali nunu kɛ ani ka baro kɛ u kan:

Jehova y’a ka jogo jumanw lo yira Musa la?
Jehova ka jogo juman lo koo ka di e ye ka tɛmɛ tɔɔw kan?

6. Jehova b’a janto mɔgɔw la

Yahutuw tun ye Ala ka jama ye ani u tun ye jɔɔnw ye Ezipiti jamana na. U ka tɔɔrɔkow ye mun lo kɛ Jehova la? I ka Bibulu yɛlɛ Ɛkizɔdi 3:1-10 yɔrɔ la ani o kalan lamɛn, wala o vɛrisew kalan Bibulu kɔnɔ. O kɔ, a’ ye ɲiningali nunu kɛ ani ka baro kɛ u kan:

KALAN LAMƐNTA: Jehova y’a janto u la u ka tɔɔrɔkow la (2:45)

Ni Jehova y’a ye ko mɔgɔw be tɔɔrɔla, o be mun lo kɛ a la?—Vɛrise 7 ni 8 lajɛ.
E ka miiri la, Ala b’a fɛ sɔbɛ la ka adamadenw dɛmɛ wa? See b’a ye k’o kɛ wa? Mun na i ko ten?

7. Jehova ka jogow be ye a ka danfɛnw na fana

Jaaw: Balɛni dɔ n’a deen, filɛru, ani kɔnɔdakalajan.

Jehova ye fɛɛn minw dan, u b’a ka jogow yira an na. A’ ye VIDEWO filɛ. O kɔ, Ɔrɔmukaw 1:20 kalan. Ani, a’ ye ɲiningali nin kɛ ani ka baro kɛ o kan: