Cikanw Kerecɛnw ka ɲɛnamaya n’u ka waajuli baara lajɛn kama
A kɔnɔnakow
I sɔbɛ don waajuli baara la 6-14
Kalan 11
Lakɔliden ka ɲi ka min kɛ 12
Kerecɛnw ka ɲɛnamaya 15-16
Ɲɛnamaya ani waajuli baara lajɛn kɔrɔsibaga 23
Videwow 27
1. Mɔgɔ minw bɛɛ be u niin don Ɲɛnamaya ani waajuli baara lajɛn porogramu na, sɛbɛ nin ka cikanw be se k’olu dɛmɛ. U be se k’a ɲini i fɛ ko i ka kalan wala lakɔli baara dɔ kɛ o lajɛn porogramu na. N’o lo, cikan minw be sɔrɔ Lajɛnsɛbɛ ani sɛbɛ nin kɔnɔ ka ɲɛsin o ma, o lajɛ koɲuman fɔlɔ ka sɔrɔ k’i yɛrɛ labɛn. An be weleweledalaw bɛɛ jija u k’u yɛrɛ di ka o lakɔli baaraw kɛ. Mɔgɔ minw be na lajɛnw na tuma bɛɛ, olu fana be se k’u niin don o lakɔli la n’u sɔnnin lo Bibulu ka kalanw ma ani n’u be ɲɛnamaya kɛ ka kɛɲɛ n’o ye. Ni dɔ b’a fɛ k’a niin don o lakɔli la k’a sɔrɔ a ma kɛ weleweledala ye fɔlɔ, Ɲɛnamaya ani waajuli baara lajɛn kɔrɔsibaga bena baro kɛ n’o tigi ye k’a filɛ ni a be saratiw dafa. O kɔ a b’a fɔ a ye ni a be se k’a tɔgɔ sɛbɛ. O baro bena kɛ a ka Bibulu kalanfa wala a bangebaga dɔ ɲɛ na min ye Jehova seere ye. Mɔgɔ ka kan ka saratiw minw dafa walisa k’a niin don o lakɔli la walima ka kɛ weleweledala ye o bɛɛ ye kelen ye.—od-F sap. 8 § 8.
DADONKUMAW
2. Miniti kelen. Lɔgɔkun o lɔgɔkun, dɔnkili ani delili fɔlɔ kɔ, Ɲɛnamaya ani waajuli baara lajɛn ɲɛminɛbaga bena lajɛn ka kalanw diya don mɔgɔw la. Miiriya minw bena kafodenw nafa bɛrɛbɛrɛ, a be sinsin olu lo kan.
NAFOLOFƐNW ALA KA KUMA KƆNƆ
3. Kalan: Miniti tan. Kalan barokun be sɔrɔ Lajɛnsɛbɛ kɔnɔ ani pilan dɔ, miiriya jɔnjɔn fila wala saba be min na. Diinan mɔgɔkɔrɔ wala kɔrɔsigi ciden setigi dɔ lo b’o kalan kɛ. Bibulu kalangwɛ porogramu na, n’an ye Bibulu ka kitabu dɔ daminɛ, videwo dɔ bena yira o lɔgɔkun na min be kuma o kitabu koo la. Kalankɛla be se k’a yira cogo min na a ka barokun n’o videwo be taga ɲɔgɔn fɛ. Nka, a ka ɲi k’a janto ka lajɛnsɛbɛ ka pilan ka miiriyaw bɛɛ walawala. Ka kɛɲɛ ni wagati latigɛnin ye, kalankɛla ka ɲi ka baara ɲuman kɛ ni jaaw ye minw be pilan ka miiriyaw bɔ kɛnɛ kan. A be se ka kunnafoni wɛrɛw fara a kan minw b’a dɛmɛ ka pilan ka miiriyaw walawala.
4. Nafolofɛnw ɲini Ala ka Kuma kɔnɔ: Miniti tan. Diinan mɔgɔkɔrɔ wala kɔrɔsigi ciden setigi dɔ lo b’o baro ɲɛminɛ. A man ɲi ka dadon kumaw ni kuncɛli kumaw labɛn o yɔrɔ kama. A b’a kɛ ɲiningali ni jaabiliw ye. A be ɲiningali fila kɛ jama ye minw be sɔrɔ Lajɛnsɛbɛ kɔnɔ. Vɛrise minw sɛbɛra, a be se k’a latigɛ k’u kalan wala k’u to yen. Jaabiliw janya man kan ka tɛmɛ sekɔndi 30 kan.
5. Bibulu kalangwɛ: Miniti naani. Balimacɛ dɔ lo b’o kalangwɛ kɛ. Vɛrise minw kofɔra lakɔliden ye, a b’olu lo kalan ani a tɛ kuma wɛrɛ fɔ k’o kalangwɛ dadon wala k’a kuncɛ. Lajɛn ɲɛminɛbaga bena a ɲini ka lakɔlidenw dɛmɛ walisa kalangwɛ kɛtɔ, u ka kalan ka miiriyaw faamu. A bena u dɛmɛ fana u ka se ka sinsin kumaden jɔnjɔnw kan, kuma ka nɔgɔya u daa, u k’u kumakan yɛlɛmayɛlɛma, ka kuma ka lɔ cogo bɛnnin na, ani ka kalan kɛ u yɛrɛ kumacogo la. Bibulu kalangwɛ yɔrɔ dɔw man jan, nka dɔw ka jan. O la, ni Ɲɛnamaya ani waajuli baara lajɛn kɔrɔsibaga b’o kalangwɛ dira lakɔlidenw ma, a ka ɲi k’a janto u ka setigiya koo la.
I SƆBƐ DON WAAJULI BAARA LA
6. Miniti tan ni duuru. O tilanyɔrɔ kuun ye ka sababu di bɛɛ ma u k’u yɛrɛ degi waajuli kɛcogo la. A kuun ye fana ka bɛɛ dɛmɛ u ka se kumaɲɔgɔnya kɛcogo la ani k’u ka waajuli kɛcogo ni mɔgɔw kalancogo fisaya. N’o ka kan, diinan mɔgɔkɔrɔw be se ka lakɔlidenw ka kalan dɔw kɛ. Kalanden kelen kelen bɛɛ ka kalan ditɔ, a ka ɲi ka ladili tigitigi dɔ sira tagama min be sɔrɔ kitabunin Mɔgɔw kalancogo kɔnɔ wala kitabunin nin kɔnɔ: Mɔgɔw kanu Mɔgɔw kanu. O ladili be sɔrɔ kalansen min na, o nimɔrɔ sɛbɛra Lajɛnsɛbɛ kɔnɔ kalanden ka kalan kofɔra yɔrɔ min na. A be sɔrɔ tagamasiɲɛ nunu kɔnɔ: ( ). Bɛɛ ka ɲi ka baara kɛ ka kɛɲɛ n’o ladiliw ye. “I sɔbɛ don waajuli baara la”: O tilanyɔrɔ ka kalan dɔw bena kɛ baro ye. Diinan mɔgɔkɔrɔ wala kɔrɔsigi ciden setigi dɔ lo bena o baro ɲɛminɛ.—Walisa k’a lɔn o baro be ɲɛminɛ cogo min na, dakun 15nan lajɛ.
7. Baro daminɛtɔ ni mɔgɔw ye: Balimacɛ wala balimamuso dɔ be se k’o kalan kɛ. Ni balimamuso lo, a barokɛɲɔgɔn bena kɛ balimamuso dɔ wala a somɔgɔ dɔ ye. Ni balimacɛ lo, a barokɛɲɔgɔn bena kɛ balimacɛ wɛrɛ wala a somɔgɔ dɔ ye. Kalanden n’a barokɛɲɔgɔn be se ka sigi wala ka lɔ.—N’i be kunnafoni wɛrɛw fɛ o kalan koo la, wala waajuli be se ka kɛ koo minw sen fɛ, dakun 12 ani 13nan lajɛ.
8. Viziti kura: Balimacɛ wala balimamuso dɔ be se k’o kalan kɛ. Ni balimamuso lo, a barokɛɲɔgɔn bena kɛ balimamuso dɔ ye. Ni balimacɛ lo, a barokɛɲɔgɔn bena kɛ balimacɛ wɛrɛ ye (km-F 5/97 ɲɛɛ 2). Kalanden n’a barokɛɲɔgɔn be se ka sigi wala ka lɔ. O kalan ye kuun ye k’a yira an be se ka min fɔ n’an be viziti kura dɔ kɛra.—N’i be kunnafoni wɛrɛw fɛ o kalan koo la, wala waajuli be se ka kɛ koo minw sen fɛ, dakun 12 ani 13nan lajɛ.
9. Bibulukalan: Balimacɛ wala balimamuso dɔ be se k’o kalan kɛ. Ni balimamuso lo, a barokɛɲɔgɔn bena kɛ balimamuso dɔ ye. Ni balimacɛ lo, a barokɛɲɔgɔn bena kɛ balimacɛ wɛrɛ ye (km 5/97 ɲɛɛ 2). Kalanden n’a barokɛɲɔgɔn be se ka sigi wala ka lɔ. Bibulukalan dɔ lo min daminɛna ka ban ani kalanden b’o kɛ miniti damanin kɔnɔ. Kuun t’a la kalanden ka dadon kumaw wala kuncɛli kumaw labɛn n’o ma ɲini a fɛ. Dakun minw ɲɛsinna kalan ma kalanden be se k’u bɛɛ kalan ni kaanba ye nka waajibi tɛ a k’o kɛ.
10. I ka lannakow ɲɛfɔ: N’a fɔra ko kalan lo, balimacɛ lo ka ɲi k’o kɛ. Nka ni ɲɛyirali lo, balimamuso wala balimacɛ dɔ be se k’o kɛ. Ni balimamuso lo, a barokɛɲɔgɔn bena kɛ balimamuso dɔ wala a somɔgɔ dɔ ye. Ni balimacɛ lo, a barokɛɲɔgɔn bena kɛ balimacɛ wɛrɛ wala a somɔgɔ dɔ ye. Gafe min kofɔra, kalanden ka ɲi ka basigi o kan ka barokun ka ɲiningali jaabi ka gwɛ ani a ka ɲi k’o kɛ nɛmɛnɛmɛ. N’a b’a fɛ, a be se ka kuma o gafe koo la a ka kalan na.
11. Kalan: Balimacɛ dɔ lo b’o kalan kɛ forobakalan kɛcogo la ka ɲɛsin kafodenw ma. Tuma dɔw la, kalanden ka ɲi k’a ka kalan basigi gafe nin ka “kunnafoni wɛrɛw 1” lo kan: Mɔgɔw kanu. N’o lo, vɛrise min(w) kofɔra yen, kalanden ka ɲi k’a yira baara be se ka kɛ n’o ye cogo min na waajuli la. Misali la, a be se ka vɛrise dɔ kɔrɔ ɲɛfɔ, a be se k’a fɔ baara be se ka kɛ n’o vɛrise ye tuma min na ani hakilijagabɔ be se ka kɛ n’a ye cogo min na. Ni kalan basiginin lo kitabunin Mɔgɔw kanu ka kalansen dɔ lo kan, kalanden bena a yira an be se k’o sira tagama cogo min na waajuli la. Misali la, mɔgɔ min ka ɲɛyirali kofɔra kalansen yɔrɔ fɔlɔ la, a be se k’o kofɔ. Wala n’a bɛnnin lo, vɛrise wɛrɛ minw kofɔra kalansen kɔnɔ, a be se k’u dɔ kalan ani k’a ɲɛfɔ koɲuman.
12. Lakɔliden ka ɲi ka min kɛ: Cikan minw dira dakun nin na ani dakun nɔfɛta la, u ɲɛsinna lakɔlidenw ka kalan nunu lo ma: “Baro daminɛtɔ ni mɔgɔw ye” ani “Viziti kura.” Fɔɔ ni cikan wɛrɛw dira, n’o tɛ, lakɔliden ka laɲinita ye ka Bibulu ka kalan nɔgɔman dɔ kofɔ min bena diya a lamɛnbaga ye, ani ka viziti kura juu sigi. Kafo ka kiinmɔgɔw b’u mako don koo minw na, lakɔliden ka ɲi ka barokun dɔ sugandi ka kɛɲɛ n’o ye. O barokun ka ɲi ka diya kiinmɔgɔw ye. N’a b’a fɛ, a be se k’a latigɛ ka gafe wala videwo dɔ yira a tigi la min ye an ka kalankɛminanw dɔ ye. Lakɔliden man ɲi ka baro daminɛcogo dɔ degi a kunfɛ. Nka, a ka ɲi k’a yɛrɛ degi baro daminɛcogow la, a kɛtɔ k’a mako don mɔgɔw la ani ka kuma a yɛrɛ kumacogo la.
13. Waajuli be se ka kɛ koo minw sen fɛ: Lajɛnsɛbɛ kɔnɔ, a yirala waajuli be se ka kɛ koo minw sen fɛ. Lakɔliden ka ɲi k’a janto o la ani kiinmɔgɔw ka koow cogoya la fana. Misali la:
(1) Soo ni soo: O ɲɛsinna waajuli baara ma, an be min kɛ soo ni soo, a ka kɛ soo ni soo yɛrɛ yɛrɛ la, telefɔni wala lɛtɛrɛw sababu fɛ. Wala ka taga bɔ mɔgɔ dɔ ye an tun ye min sɔrɔ waajuli kɛtɔ soo ni soo.
(2) Waajuli, sababu dɔ sen fɛ: A kuun ye k’a yira cogo min na an be se ka tɛmɛ sababuw bɛɛ fɛ ka baro gwansan dɔ yɛlɛma k’a kɛ seereya ye. Misali la, an be se ka Bibulu ka miiriya dɔ kofɔ mɔgɔ dɔ ye bisi kɔnɔ wala a ɲɔgɔnna dɔ kɔnɔ, an ka baarakɛyɔrɔ la, lakɔliso, an ka kiin kɔnɔ, wala an ka loon o loon baaraw sen fɛ.
(3) Waajuli, jamayɔrɔ la: O ɲɛsinna waajuli ma an be min kɛ ni waajulikɛ wotoro ye, siradaw la, mɔgɔw ka baarakɛyɔrɔw la, zaridɛnbaw la, ani yɔrɔ wɛrɛw la jama be yɔrɔ min na.
14. Baara kɛ ni videwow ni gafew ye: Ka kɛɲɛ ni koow cogoya ye, kalanden be se k’a latigɛ ka gafe dɔ wala videwo dɔ lo yira a lamɛnbaga la. Ni kalanden y’a latigɛ ka videwo dɔ lo yira wala n’a ɲinina a fɛ a k’o lo kɛ, a ka ɲi ka videwo kofɔ ani ka baro kɛ a kan, nka a kana o videwo yira yɛrɛ yɛrɛ la.
KERECƐNW KA ƝƐNAMAYA
15. Dɔnkili lanin kɔ, miniti 15 kɔnɔ, kalan kelen wala fila bena kɛ. O kalan(w) kuun ye ka jama dɛmɛ u ka se ka Ala ka Kuma sira tagama. Fɔɔ n’a fɔra cogo wɛrɛ la, o kalanw be se ka kalifa diinan mɔgɔkɔrɔw wala kɔrɔsigi cidenw ma minw be saratiw dafa. Nka ni “kafo ka makow” lo, diinan mɔgɔkɔrɔ dɔ lo ka ɲi k’o kɛ. N’a fɔra ko baro lo, kalan ɲɛminɛbaga ka kalan kuru bɛɛ la, a be se ka ɲiningali wɛrɛw kɛ ka fara minw be Lajɛnsɛbɛ kan. A ka dadon kumaw man kan ka janya. O la, a bena wagati sɔrɔ ka kalan ka miiriya jɔnjɔnw bɔ kɛnɛ kan ani jama bena se k’a daa don baro la bɛrɛbɛrɛ. N’i ka ɲi ka mɔgɔ dɔ ɲininga a ka fɛtaw la, n’o be se ka kɛ, a ka fisa o tigi ka na tintin kan sanni ka to a ka sigiyɔrɔ la walisa ka kuma.
16. Kafo ka Bibulu kalan: Miniti 30. O kalan ka ɲi ka kalifa diinan mɔgɔkɔrɔw ma minw be saratiw dafa (kafo minw na diinan mɔgɔkɔrɔw man ca, o be se ka kalifa kɔrɔsigi cidenw dɔw ma minw be saratiw dafa k’o kalan ɲɛminɛ). Diinan mɔgɔkɔrɔw jɛnkulu ben’a filɛ balimacɛ minw be saratiw dafa walisa ka kafo ka Bibulu kalan ɲɛminɛ. Balima minw sugandira o kama, u ka ɲi ka se ka kalan ɲɛminɛ ka ɲɛ ani ka tila wagati latigɛnin na. U ka ɲi fana ka se ka vɛrise jɔnjɔnw bɔ kɛnɛ kan ani ka tɔɔw dɛmɛ u ka kalan ka miiriya jɔnjɔnw faamu. Cikan minw dira walisa ka se ka baro ɲɛminɛ lajɛnw na, o balimaw be se k’o cikanw lajɛ tugun (w23.04 p. 24, koorilen ɲɛɛ 24nan kan). Ni kalan ka miiriya jɔnjɔnw bɔra kɛnɛ kan ka ban, kuun t’a la ka taga ɲɛ ni kalan ye. N’a be se ka kɛ, kalan ɲɛminɛbaga ani dakunw kalanbaga wɛrɛ lo bena sugandi lɔgɔkun o lɔgɔkun. Ni lajɛn ɲɛminɛbaga y’a fɔ ko kafo ka Bibulu kalan ka lasurunya, o kalan ɲɛminɛbaga ben’a latigɛ a ben’a ka kalan lasurunya cogo min na. A be se k’a latigɛ ka dakun dɔw ka kalan to yen.
KUNCƐLI KUMAW
17. Miniti saba. Ɲɛnamaya ani waajuli baara lajɛn ɲɛminɛbaga bena segi lajɛn ka hakilinata nafamanba dɔw kan. A ka ɲi ka lɔgɔkun nata ka kalanw kofɔ dɔɔni. Ni wagati bele be yen, lajɛn ɲɛminɛbaga be se ka lɔgɔkun nata ka kalandenw tɔgɔ fɔ fana. Fɔɔ n’a fɔra cogo wɛrɛ la, ni kunnafoni wala bataki dɔ ka ɲi ka kalan kafo ye, lajɛn ɲɛminɛbaga bena o kɛ a ka kuncɛli kumaw tuma na le. Kunnafoni minw ɲɛsinna waajuli baara porogramu ma wala Masaya Boon saniyali porogramu koo ma, u man kan ka kalan tintin kan. Nka, u ka ɲi ka nɔrɔ tablo kan le. Ni lajɛn ɲɛminɛbaga tɛna se ka kunnafoniw ani batakiw bɛɛ kalan ka ban a ka kuncɛli kumaw na, a ka ɲi k’a ɲini kalankɛlaw fɛ u k’u ka kalan lasurunya n’o be se ka kɛ. (Dakun 16 ani 19nan lajɛ.) Dɔnkili bena la ani delili bena kɛ walisa ka lajɛn kuncɛ.
TANDOLI KUMAW ANI LADILIW
18. Lakɔliden kelen kelen bɛɛ ka kalan kɔ, lajɛn ɲɛminɛbaga ben’a tando. Ka fara o kan, a ɲinina lakɔliden fɛ a ka ladili min sira tagama, lajɛn ɲɛminɛbaga bena ladiliw di a ma ka kɛɲɛ n’o ye. A ka ɲi k’o bɛɛ kɛ miniti kelen ɲɔgɔn kɔnɔ. Ni lajɛn ɲɛminɛbaga be lakɔliden dɔ ka kalan dadonna, lakɔliden ka ɲi ka ladili min sira tagama, lajɛn ɲɛminɛbaga man kan k’o fɔ. Nka ni lakɔliden tilara a ka kalan na, lajɛn ɲɛminɛbaga be se k’o fɔ ani ka tandoli kuma bɛnnin fɔ lakɔliden ye. O kɔ, lajɛn ɲɛminɛbaga ben’a yira cogo min na lakɔliden ye o ladili sira tagama. Ka fara o kan, a ka ɲi k’a yira ni ɲumanya ye cogo min na kalanden be se k’a ka baara fisaya ani mun na a ka ɲi k’o kɛ. Lajɛn ɲɛminɛbaga be se k’a latigɛ ka lakɔliden ka kalan miiriya wɛrɛw kofɔ minw bena lakɔliden yɛrɛ wala jama nafa. Lajɛn bannin kɔ wala wagati wɛrɛ la, a be se ka kalanden ye dan na ani ka basigi gafe nunu dɔ kan ka ladili nafamanw di a ma: Mɔgɔw kanu, Mɔgɔw kalancogo wala gafe École du ministère. Lakɔliden tun ka ɲi ka ladili min sira tagama, lajɛn ɲɛminɛbaga ka ladiliw bena ɲɛsin o lo ma wala koo wɛrɛ ma min be sɔrɔ o gafew kɔnɔ. (N’i be kunnafoni wɛrɛw fɛ Ɲɛnamaya ni waajuli baara lajɛn ɲɛminɛbaga ani ladili dibaga kankɔrɔsigi ka kunkanbaaraw koo la, dakun 19, 24, ani 25nan lajɛ.)
WAGATI LATIGƐNIN
19. Kalan si man kan ka tɛmɛ wagati latigɛnin na, hali lajɛn ɲɛminɛbaga ka ladiliw yɛrɛ. Lajɛnsɛbɛ b’a yira wagati min latigɛra kalan kelen kelen bɛɛ kama. Ni lakɔliden ye Lajɛnsɛbɛ ka hakilinataw walawala ka ban, kuun t’a la a ka miiriya wɛrɛw fara a kan walisa ka wagati tɔɔ dafa. Ni kalankɛla dɔ wala lakɔliden dɔ ka kalan tɛmɛna wagati latigɛnin kan, lajɛn ɲɛminɛbaga wala ladili dibaga kankɔrɔsigi bena a tigi ye dan na walisa k’a ladi (dakun 24 ani 25nan lajɛ.) Lajɛn kuru bɛɛ ka ɲi ka mɛɛn lɛri 1 ni miniti 45 (dɔnkili ni delili ka wagati niin b’o la).
NI KAFOKULU KƆRƆSIBAGA NANA BƆ KAFO YE
20. Ni kafokulu kɔrɔsibaga nana bɔ aw ye, lajɛn bena kɛ i ko a fɔra Lajɛnsɛbɛ la cogo min na, nka yɛlɛmani nunu dɔrɔn lo ka ɲi ka kɛ: Kafokulu kɔrɔsibaga bena miniti 30 kalan kɛ kafo ka Bibulu kalan nɔɔ na. Ka kɔn o kalan ɲɛ, lajɛn ɲɛminɛbaga bena kalan tɛmɛninw ka miiriya jɔnjɔnw bɔ kɛnɛ kan, a bena lɔgɔkun nata ka kalanw kofɔ dɔɔni, ni kunnafoni wala bataki dɔw be yen, a bena u kalan. O kɔ, a bena kafokulu kɔrɔsibaga ka kalan dadon. Kafokulu kɔrɔsibaga lo bena dɔnkili dɔ sugandi walisa ka lajɛn kuncɛ n’o ye a ka kalan bannin kɔ. O kɔ, a be se k’a ɲini balimacɛ dɔ fɛ a ka lajɛn kuncɛ ni delili ye. O lɔgɔkun na, lakɔlidenw tɛna tilan klasi fila. Ni jɛnkulu dɔ be yen min b’a ka lajɛnw kɛ kaan wɛrɛ la, o jɛnkulu be se k’a ka lajɛnw kɛ dan na, nka u ka ɲi ka na fara kafomɔgɔ tɔɔw kan ka kafokulu kɔrɔsibaga ka kalan lamɛn.
TILE SABA LAJƐNBA WALA TILE KELEN LAJƐNBA LƆGƆKUN
21. Tile saba lajɛnba wala tile kelen lajɛnba bena kɛ lɔgɔkun min na, kafo tɛna a ka lajɛn kɛ. A’ ye kafomɔgɔw hakili jigi ko u ka ɲi k’o lɔgɔkun ka kalanw lajɛ u kelen na wala n’u ka denbaya ye.
HAKILIJIGI LAJƐN LƆGƆKUN
22. Ni Hakilijigi lajɛn loon bɛnna loon dɔ ma min tɛ wikɛni ye, ɲɛnamaya ni waajuli baara lajɛn tɛ kɛ o lɔgɔkun na.
ƝƐNAMAYA ANI WAAJULI BAARA LAJƐN KƆRƆSIBAGA
23. Diinan mɔgɔkɔrɔw jɛnkulu ka ɲi ka diinan mɔgɔkɔrɔ kelen sugandi ka kɛ Ɲɛnamaya ani waajuli baara lajɛn kɔrɔsibaga ye. O balimacɛ ka kunkanbaara lo k’a janto ko Ɲɛnamaya ni waajuli baara lajɛn be labɛn ka ɲɛ ani a be kɛ ka kɛɲɛ ni cikanw ye minw be sɔrɔ sɛbɛ nin kɔnɔ. A ben’a jija ka kumaɲɔgɔnya ɲuman kɛ ni ladili dibaga kankɔrɔsigi ye. Ni Lajɛnsɛbɛ bɔra dɔrɔn, a bena kalo fila ka porogramu labɛn. O kɔrɔ, a ka ɲi ka lakɔlidenw ka baaraw kalifa u ma ani ka kalan tɔɔw kalifa balimaw ma. A bena lajɛn ɲɛminɛli kalifa balimaw ma, diinan mɔgɔkɔrɔw jɛnkulu ye minw sugandi (dakun 3-16 ani 24nan lajɛ.) Ni Ɲɛnamaya ani waajuli baara lajɛn kɔrɔsibaga be lakɔli baara kalifara lakɔlidenw ma, a ka ɲi k’a janto koo nunu na: u sanda, u ka lɔnniya ani kalanden be ni setigiya min ye ka kalan walawala cogo nɔgɔman na. N’a be kalan tɔɔw kalifara balimaw ma, a ka ɲi fana ka koow kɛ ni hakilitigiya ye. A ka ɲi ka kɔn ka sara lakɔlidenw ni kalankɛlaw la lɔgɔkun saba wala lɔgɔkun saba ni kɔ ka kɔn u ka kalan kɛlon ɲɛ. A ka ɲi ka sɛbɛ nin dafa k’a di lakɔlidenw ma walisa k’u lalɔnniya u ka kalanw koo la: Devoir d’élève à la réunion Vie chrétienne et ministère (S-89). Ɲɛnamaya ani waajuli baara lajɛn kɔrɔsibaga ben’a janto lajɛn kuru bɛɛ ka porogramu ka kɛ tablo kan. Diinan mɔgɔkɔrɔw jɛnkulu be se ka diinan mɔgɔkɔrɔ wɛrɛ wala kɔrɔsigi ciden dɔ sugandi walisa a ka ɲɛnamaya ani waajuli baara lajɛn kɔrɔsibaga dɛmɛ. Nka, kalan tɔɔ minw tɛ lakɔlidenw ka baara ye, diinan mɔgɔkɔrɔw dɔrɔn lo be se k’o kalifa balimaw ma.
ƝƐNAMAYA ANI WAAJULI BAARA LAJƐN ƝƐMINƐBAGA
24. Lɔgɔkun bɛɛ, diinan mɔgɔkɔrɔ dɔ lo bena sugandi ka kɛ Ɲɛnamaya ani waajuli baara lajɛn ɲɛminɛbaga ye (kafo minw na diinan mɔgɔkɔrɔw man ca, kɔrɔsigi ciden minw be saratiw dafa, u be se k’u dɔw sugandi). Ale lo ka ɲi ka dadonkumaw ni kuncɛli kumaw labɛn. Sanni dɔ k’a ka kalan daminɛ, lajɛn ɲɛminɛbaga ka ɲi ka kuma damanin fɔ k’a ka kalan dadon. Ni diinan mɔgɔkɔrɔw man ca kafo kɔnɔ, lajɛn ɲɛminɛbaga yɛrɛ be se ka kalan dɔw kɛ, i n’a fɔ kalan minw na videwo dɔrɔn lo be yira. Ni dɔ y’a ka kalan kɛ ka ban, lajɛn ɲɛminɛbaga bena kuma minw fɔ, u man kan ka janya. Diinan mɔgɔkɔrɔw jɛnkulu lo ben’a filɛ diinan mɔgɔkɔrɔ minw be saratiw dafa ka kɛ Ɲɛnamaya ani waajuli baara lajɛn ɲɛminɛbaga ye. Diinan mɔgɔkɔrɔ minw sugandira o kama, u ka ɲi ka lajɛn ɲɛminɛ ka di ɲɔgɔn ma. Ɲɛnamaya ani waajuli baara lajɛ kɔrɔsibaga be se ka kɛ lajɛn ɲɛminɛbaga ye siɲɛ caaman ka tɛmɛ diinan mɔgɔkɔrɔ tɔɔw kan, n’o bɛnnin lo aw ka koow cogoya ma. Ni diinan mɔgɔkɔrɔ dɔ be se ka kafo ka Bibulu kalan kɛ, n’a sɔrɔ a be se ka kɛ lajɛn ɲɛminɛbaga ye fana. Aw k’a to aw hakili la ko lajɛn ɲɛminɛbaga ka ɲi ka kafo jija ani ka kalandenw ladi ni kanuya ye, n’o ka kan. Lajɛn ɲɛminɛbaga ka ɲi k’a janto fana lajɛn ka ban lɛri la (dakun 17 ani 19nan lajɛ). Ni plasi be yen tintin kan, lajɛn ɲɛminɛbaga be se k’a kɛ u be mikro dɔ bila sen kan a yɛrɛ ye walisa a ka se ka kalankɛla kelen kelen bɛɛ dadon k’a to o kalankɛla be gwɛrɛla mikro la. Ni lajɛn ɲɛminɛbaga b’a fɛ fana, a be se ka sigi tabali dɔ la Bibulu kalangwɛ tuma na ani lajɛn tilanyɔrɔ nin tuma na: I sɔbɛ don waajuli baara. O be se k’a kɛ aw tɛ wagati tiɲɛ.
LADILI DIBAGA KANKƆRƆSIGI
25. N’a be se ka kɛ, a ka fisa ka diinan mɔgɔkɔrɔ dɔ sugandi min ye kalankɛla ŋana ye ka kɛ ladili dibaga kankɔrɔsigi ye. A ka kunkanbaara ye ka diinan mɔgɔkɔrɔw ani kɔrɔsigi cidenw ladi ni kalan dɔ kalifara u ma, a mana kɛ Ɲɛnamaya ani waajuli baara lajɛn tuma na, a mana kɛ forobakalan ye, Kɔrɔsili Sangaso kalan ɲɛminɛli wala dakunw kalangwɛ ye. Nka, a ka ɲi k’u ye dan na walisa k’u ladi (dakun 19nan lajɛ). Ni kafo kɔnɔ diinan mɔgɔkɔrɔ caaman be yen minw ye kalankɛla ŋanaw ye, saan o saan mɔgɔ kelen bena sugandi u cɛma ka kɛ ladili dibaga kankɔrɔsigi ye. Waajibi tɛ ladili dibaga kankɔrɔsigi ka ladili di kalankɛlaw ma tuma bɛɛ.
KLASI WƐRƐW
26. Ni lakɔlidenw ka ca kafo kɔnɔ, aw be se klasi wɛrɛw kɛ. Klasi kelen kelen bɛɛ bena kalifa ladili dibaga dɔ ma min be saratiw dafa. A ka fisa o ka kɛ diinan mɔgɔkɔrɔ dɔ ye. O be se ka kalifa fana kɔrɔsigi ciden dɔ ma min be saratiw dafa. Diinan mɔgɔkɔrɔw jɛnkulu lo ben’a latigɛ o kunkanbaara bena kalifa balima minw ma ani fana n’o balimaw bena o kɛ ka di ɲɔgɔn ma. Cikan minw kofɔra dakun 18nan na, ladili dibaga ka ɲi ka tugu u kɔ. Lakɔliden minw be klasi wɛrɛw la, lajɛn ɲɛminɛbaga ben’a ɲini u fɛ u ka taga u kalanw kɛ Masaya Boon ka boon wɛrɛw kɔnɔ kalan nin bannin kɔ: “Nafolofɛnw ɲini Ala ka Kuma kɔnɔ.” U bena segi ka na ni kalandenw tilara u ka kalanw na.
VIDEWOW
27. O lajɛn tuma na, videwo tigitigi dɔw bena yira. O videwow bena sɔrɔ apilikasɔn JW Library® kɔnɔ ani aw bena se k’u filɛ ni aparɛyi sifa caaman ye.
© 2023 Watch Tower Bible and Tract Society of Pennsylvania
S-38-JL 11/23