“Ne bɛ ne yɛrɛ kɛ fɛn bɛɛ ye bɛɛ kosɔn”

N’ TUN ye n’ mako don Bibulu ka kalanw na ka ban. U tun ye sɛbɛ dɔw di n’ bamuso ma minw basiginin lo Bibulu kan. U kɔnɔkow tun ka di n’ ye sanko jaa minw b’u kɔnɔ. N’ bamuso tun be koo minw kalanna, n’ facɛ tun tɛ sɔn a k’u fɔ n’ ye. Nka ne tun b’a fɛ k’u lɔn ani n’ tun be n’ bamuso ɲininga u la. O kama, a tun be bibulukalan kɛ ni ne ye ni n’ facɛ bɔra. O lo y’a to n’ fana y’a latigɛ ka n’ yɛrɛkun di Jehova ma. Saan 1943, n’ ye batɛmu ta Blackpool, Angletɛri jamana na. N’ sii tun ye saan 10 ye.

N’ Y’A DAMINƐ KA BAARA KƐ JEHOVA YE

Kabi o tuma, ne ni n’ bamuso tun be waajuli kɛ ɲɔgɔn fɛ tuma o tuma. An tun be tɛmɛ turnediskiw lo fɛ walisa ka Bibulu ka kibaro lase mɔgɔw ma. U tun ka bon ani u gwiliya tun sera kilo 4 ni tilan ma. Miiri k’a filɛ, ne denmisɛntɔ be dɛmɛdɛmɛna n’u dɔ ye n’ bolo!

Tuma min na ne ye saan 14 sɔrɔ, n’ tun b’a fɛ ka kɛ piyɔniye ye. N’ bamuso ko n’ ka ɲi k’o fɔ balimaw dɛmɛbaga ye fɔlɔ (bi, o be weele kafokulu kɔrɔsibaga). Ale ko n’ ka bololabaara dɔ degi walisa ka se ka n’ mako wasa piyɔniye baara la. N’ y’o lo kɛ. N’ ye baara kɛ saan 2. O kɔ, n’ kumana ni kafokulu kɔrɔsibaga wɛrɛ ye piyɔniye baara koo la. A ko: “I be se k’a daminɛ!”

Ne ni n’ bamuso tun be luwanse lo kɔnɔ. Saan 1949, awirilikalo la, an y’an ka minan dɔw feere ani ka dɔw di mɔgɔw ma. O kɔ, an tagara Middleton, Manchester dugu gɛrɛfɛ ani an ye piyɔniye baara daminɛ yen. Kalo 4 o kɔ, n’ ye balimacɛ dɔ sugandi walisa an ka piyɔniye baara kɛ ɲɔgɔn fɛ. Betɛli y’an ci ka taga kafo kura dɔ kɔnɔ, Irlam dugu la. N’ bamuso ni balimamuso dɔ tun be piyɔniye baara kɛra ɲɔgɔn fɛ kafo wɛrɛ kɔnɔ.

Ne sii tun ye saan 17 dɔrɔn ye, nka u y’a ɲini ne ni n’ tɔɲɔgɔn fɛ ko an ka lajɛnw ɲɛminɛ. Mun na do? Sabu balimacɛ setigiw tun ma ca o kafo kura kɔnɔ. Kɔfɛ, u ko n’ ka taga Buxton kafo kɔnɔ. Weleweledalaw tun ma ca yen ani u mako tun be dɛmɛ na. Ne ye nɛɛma baara minw sɔrɔ n’ kanbele tuma na, ne fɛ, o tun ye fɔrɔmasɔn ye kunkanbaara wɛrɛw kama.

Saan 1951 na, n’ ye sɛbɛ dɔ dafa Gilead ka lakɔli kama. Nka, saan 1952, desanburu la, u ye n’ weele sɔrɔdasiya la. N’ y’a ɲini faamanw fɛ ko u kana n’ niin don sɔrɔdasiya la sabu n’ tun be kudayi cidenyabaara la. Nka, kititigɛso ma sɔn. U ko n’ ka ɲi ka kalo 6 kɛ kaso la. Ka n’ to kaso la, n’ ye lɛtɛrɛ dɔ sɔrɔ ko n’ ka na Gilead ka lakɔli 22nan na. Saan 1953 zuwekalo la, n’ donna bato dɔ kɔnɔ ka taga Niyɔriki. O bato tun be weele ko Georgic.

N’ senin kɔ, n’ sera ka taga saan 1953 ka lajɛnba la min kuun tun ko: La société du monde nouveau. O kɔ, n’ ye tɛrɛn ta ka taga South Lansing, Niyɔriki dugu la. Gilead lakɔli tun be o yɔrɔ le la. N’ bɔra tɛrɛn na ka don mobili dɔ la walisa ka taga South Lansing. Komi n’ bɔtɔ tun lo kaso la, wari bɛrɛ tun tɛ n’ fɛ ka taransipɔri sara. N’ y’a dɔndɔ mobilikɔnɔmɔgɔ dɔ lo fɛ.

JAMANA WƐRƐ KƆNƆ

Gilead ka lakɔli ye fɔrɔmasɔn ɲuman di an ma walisa an ka “kɛ fɛn bɛɛ ye bɛɛ kosɔn” misɔndenya baara la (1 Kor. 9:22, ABM). U y’an 3 ci ka taga Filipine jamana na: Ne, Paul Bruun ani Raymond Leach. An ye kɔnɔni kɛ kalo caaman ka sɔrɔ ka an ka vizaw sɔrɔ. O kɔ, an ye bato ta ka tile 47 kɛ kɔgɔji kan. An tɛmɛna Rottɛrdam, Mediterane kɔgɔji kan, Kanal de Suwɛzi, Ɛndi kɔgɔji, Malɛzi, ani Hɔn Kɔng. An sera Manila saan 1954, novanburu tile 19 na.

An tun ka kan ka yɛlɛmaniw kɛ walisa ka deli o jamana n’a ka mɔgɔw la ani k’u ka kaan degi. A daminɛ na, an saba bɛɛ tun be kafo kelen kɔnɔ Quezon dugu la. Mɔgɔ caaman tun be angilikan fɔ yen. O lo kama, kalo wɔɔrɔ tɛmɛnin kɔ, an tun tɛ bɛrɛ lɔn Tagalogkan na. U nana an bila yɔrɔ min na kɔfɛ, o y’an dɛmɛ k’o kaan degi ka ɲɛ.

Saan 1955 la, ne ni balimacɛ Leach bɔra loon dɔ waajuli la ka na lɛtɛrɛ caaman sɔrɔ soo. A tun fɔra ko an bena kɛ kafokulu kɔrɔsibagaw ye. Ne tun be ni saan 22 dɔrɔn ye, nka o cii ye sababu di ne ma ka “kɛ fɛn bɛɛ ye bɛɛ kosɔn” cogo wɛrɛw la.

Ne kɛra kafokulu kɔrɔsibaga ye tuma min na, ne ye n’ ka forobakalan fɔlɔ kɛ dugu dennin dɔ kɔnɔ, magazɛn dɔ ɲɛfɛ kɛnɛ ma. A ma mɛɛn, n’ y’a faamu k’o wagati la, Filipinekaw tun be deli ka forobakalanw kɛ forobayɔrɔ la. N’ tun be taga bɔ kafo caaman ye kafokulu kɔnɔ. N’ tun be forobakalanw kɛ gwataw jukɔrɔ jamayɔrɔw la, lɔgɔfiyɛw la, meriw ɲɛfɛ, baskɛti tɛrɛnw kan, zaradɛnw na ani tuma caaman na siradaw la. San Pablo dugu la, sanji ye n’ bali loon dɔ ka forobakalan kɛ lɔgɔfiyɛ la. N’ y’a fɔ diinan mɔgɔkɔrɔw ye k’o kalan bena kɛ Masaya Boon kɔnɔ. Nka u ko n’a kɛra yen, an tɛ se k’a fɔ ko forobakalan lo sabu a ma kɛ forobayɔrɔ la.

N’ tun be to ka si balimaw ka soo le. Boon babaw tun tɛ, nka u tun saniyanin lo tuma bɛɛ. Tuma dɔw la, n’ tun be la dɛbɛ lo kan plansiw kan. Ɲɛgɛnw tun tɛ mɔgɔ sutara. O kama, n’ y’a daminɛ ka ko cogo nɔgɔman na. N’ tun be don mobiliw lo kɔnɔ ka taga dugu la. N’ tun be don bato lo kɔnɔ ka taga guun wɛrɛ kan. N’ ka cidenyabaara bɛɛ la, n’ ma mobili san.

Komi n’ tun be waajuli kɛ ani n’ tun be taga bɔ kafow ye, o ye n’ dɛmɛ ka Tagalogkan degi. Ne m’o kaan degi lakɔli dɔ sen fɛ. Nka, n’ y’a degi n’ kɛtɔ ka balimaw lamɛn waajuli la ani lajɛnw na. A tun ka di balimaw ye ka n’ dɛmɛ k’o kaan degi. A tun ka di ne fana ye k’a ye ko u tun be muɲu n’ kɔrɔ ani k’u kɔnɔ gwɛ ka kuma n’ fɛ.

Wagati dɔ nana se, kunkanbaara kuraw ye n’ lasun ka yɛlɛmani wɛrɛw kɛ. Saan 1956 la, balimacɛ Nathan Knorr nana bɔ an ye. A ko n’ ka jama koo ɲɛnabɔ lajɛnba dɔ la min tun labɛnna jamana kuru bɛɛ kama. Balimaw ye n’ dɛmɛ o koo la sabu n’ tun t’a lɔn o be kɛ cogo min na. Saan kelen yɛrɛ ma se, an y’o lajɛnba ɲɔgɔn kɛ tugun. Balimacɛ Frederick Franz lo tun bɔra an ka sigiyɔrɔsoba la ka na bɔ an ye. Ne tun y’o lajɛnba kɔrɔsibaga ye. O sen fɛ, balimacɛ Franz ye dugumɔgɔw ka fani dɔ don ka forobakalan dɔ kɛ. O fani be weele ko barong Tagalog. O ye balimaw dusu diya kosɔbɛ. Ne y’a faamu ko n’ ka ɲi ka sɔn ka koow kɛ i n’a fɔ balimaw.

N’ tun ka ɲi ka yɛlɛmani wɛrɛw kɛ tugun tuma min na n’ kɛra distriki kɔrɔsibaga ye. O wagati la, an tun be videwo nin yira mɔgɔw la: Le bonheur de la société du Monde Nouveau. Tuma caaman, o tun be kɛ kɛnɛma jamayɔrɔ la. Tuma dɔw la, ninmanfɛn misɛnw tun b’an tɔɔrɔ. U tun be na yeelen lo kosɔn ani u tun be don projɛktɛri kɔnɔ k’a fa. O kɔ, a tun man nɔgɔ hali dɔɔni ka projɛktɛri jɔsi! A tun man nɔgɔ fana k’o videwow labɛn. Nka, a tun be ne ninsɔndiya k’a ye ko a tun ka di mɔgɔw ye k’a faamu ko Jehova ka jɛnkulu be duniɲa kuru bɛɛ lo kɔnɔ.

Dugu dɔw la, mɔnpɛricɛw ye faamanw lasun k’u kana a to an ka lajɛnbaw kɛ. Ni lajɛnba tun be kɛra u ka legiliziw gɛrɛfɛ, u tun be to k’u ka legilizi nɛgɛ gosi walisa ka mɔgɔw bali ka lamɛnni kɛ. O bɛɛ n’a ta, waajuli baara tun be tagara ɲɛ. Bi, Jehova Seerew ka ca o duguw la.

KUNKANBAARA MINW Y’A TO NE YE YƐLƐMANI WƐRƐW KƐ

Saan 1959 la, n’ ye lɛtɛrɛ dɔ sɔrɔ. A tun fɔra a kɔnɔ ko n’ ka na baara kɛ Betɛli la. O kɛra sababu ye ne ye koo caaman wɛrɛw lɔn. Kɔfɛ, u ko n’ ka kɛ zone kɔrɔsibaga ye. N’ tun be taga bɔ balimaw ye jamana dɔw la. Ne ye balimamuso Janet Dumond kunbɛn o tagama dɔ sen fɛ. Ale tun ye misɔnden ye Tayilandi jamana na. An ye lɛtɛrɛw ci ɲɔgɔn ma wagati dɔ la, ani a laban, n’ y’a furu. A saan 51 ye nin ye an be Jehova ka baara kɛra ni ninsɔndiya ye!

Ne ninsɔndiyara ka taga bɔ balimaw ye jamana 33 kɔnɔ. A man nɔgɔ ka baara kɛ ni mɔgɔw ye minw bɔyɔrɔ tɛ kelen ye. Nka, n’ be Jehova waleɲuman lɔn sabu n’ ye kunkanbaara minw sɔrɔ n’ kanbele tuma na, u ye ne dɛmɛ. Ka taga bɔ balimaw ye jamana wɛrɛw la, o ye n’ dɛmɛ n’ kana dan n’ ka koow filɛcogo dɔrɔn ma. N’ y’a faamu fana ko Jehova be mɔgɔ sifa bɛɛ kanu.—Kɛw. 10:34, 35.

YƐLƐMANI WƐRƐW

Ne ninsɔndiyara kosɔbɛ ka baara kɛ ni balimaw ye Filipine! Ne ye n’ ka cidenyabaara daminɛ tuma min na yen, balimaw hakɛ tun ye min ye, o ɲɔgɔn 10 lo be yen bi. Ne ni Janet bele be baara kɛra Filipine ka Betɛli la, Quezon dugu la. N’ ye saan 60 ni kɔ kɛ o jamana na, nka n’ bele ka ɲi ka yɛlɛmani wɛrɛw kɛ ka kɛɲɛ ni Jehova sago ye. Yɛlɛmani minw kɛra kɔsa la, o b’a yira ko n’an be baara kɛra Ala ye wala an balimaw ye, an man kan ka ja kelen kan.

An tun mana a faamu Jehova sago ye min ye, an tun b’an seko kɛ ka sɔn o ma. O ɲɛnamaya kɛcogo y’an wasa yɛrɛ le! An y’an jija fana ka yɛlɛmaniw kɛ ani k’an balimaw mako ɲɛ koɲuman. Tiɲɛn na, k’an to sii la, an bena banba ka “kɛ fɛn bɛɛ ye bɛɛ kosɔn.”