Dususuman—Hakilitigiya lo

A TAGARA bɔ o muso ye siɲɛ wɛrɛ nka, a sɔngɔra Toni kan tugun. Toni ye mun lo kɛ do? A y’a fɔ ko: “O koo tun man nɔgɔ hali dɔɔni. A tun be sɔngɔra n’ kunna gwansan le.” Nka, Toni ye yafa deli tugun ani a y’a fɔ muso ye ko tɔɔrɔ min b’a kan, ale b’o faamu.

N’i tun be Toni nɔɔ na, i tun bena mun lo kɛ do? I tun bena a ɲini k’i dusu suman wa? Siga t’a la, a man nɔgɔ k’i dusu suman o koo ɲɔgɔnw na. N’an niin degunnin lo wala ni dɔ y’an darabɔ, a man nɔgɔ hali dɔɔni k’an ka koow kɛ ni dususuma ye.

Bibulu be kerecɛnw jija ko u ka kɛ mɔgɔ dusu sumaninw ye. A b’a fɔ fana ko dususuman ni hakilitigiya be taga ɲɔgɔn fɛ. Zaki y’a fɔ ko: “Jɔn ye hakilitigi ye aw cɛma? O tigi k’a yira a ka kɛwaliɲumanw fɛ a be minw kɛ ni yɛrɛmajigi [wala dususuman] ani hakilitigiya ye.” (Zaki 3:13). N’an ye mɔgɔ dusu sumanin ye, o b’a yira cogo di ko an ye hakilitigiya sɔrɔ ka bɔ Ala yɔrɔ? Mun lo be se k’an dɛmɛ ka kɛ n’o jogo ye?

NI DUSUSUMAN B’AN NA, O B’A YIRA KO AN YE HAKILITIGI YE

Dususuman be dimiya mala. “Jaabi ɲanaman be mɔgɔ dusu suma, kuma fariman be mɔgɔ dusu wili.”—Talenw 15:1.

N’i ye mɔgɔ jaabi k’a sɔrɔ i diminin lo, a be se ka koo tɔɔ bɛɛ juguya, a be i n’a fɔ i ye tulu bɔn tasuma kan (Talenw 26:21). Nka, n’i ye mɔgɔ jaabi ni dususuman ye, o ka teli ka koow nɔgɔya. Hali n’a tun diminin lo, o be se k’a dusu suman.

Toni y’o lo kɔrɔsi. Muso y’a ye ko Toni y’a dusu suman k’a jaabi minkɛ, a y’a daminɛ ka kasi. O muso y’a ɲɛfɔ ko gwɛlɛya minw b’ale n’a ka denbaya kan, o lo b’a hakili ɲagamina. Toni y’a dusu suman ka muso jaabi ani ka hɛɛrɛ ɲini minkɛ, a sera ka seereya kɛ koɲuman ani a ye Bibulu kalan daminɛ n’o muso ye.

N’an be koow kɛ ni dususuman ye, o be se k’an ninsɔndiya. “Mɔgɔ minw sabalinin lo [wala dusu sumanin lo], olu dagamunin lo, bari u bena dugukolo tigiya kɛ.”—Mat. 5:5.

Mɔgɔ minw dusu sumanin lo, mun na u dagamunin lo? Mɔgɔ caaman tun ka fari ka kɔrɔ, nka sisan, u ye ninsɔndiya sɔrɔ sabu u kɛra mɔgɔ dusu sumaninw ye. U ka ɲɛnamaya kɛcogo fisayara ani u b’a lɔn ko siniɲasigi hɛɛrɛman b’u kɔnɔna (Kɔlɔs. 3:12). Adolfo ye kafokulu kɔrɔsibaga ye Ɛsipaɲi jamana na. A y’a ɲɛfɔ ale ka ɲɛnamaya tun be cogo min na sanni a ka kɛ Jehova Seere ye.

Adolfo ko: “Kuun tun tɛ n’ ka ɲɛnamaya la. Ne tun ka teli ka dimi joona fɔɔ, n’ teri dɔw yɛrɛ tun be siran n’ ɲɛ n’ ka kuncɛbaya, ni n’ ka fariya kosɔn. A laban, kojuguba dɔ ye n’ sɔrɔ. Kɛlɛ dɔ la, u ye n’ sɔgɔ ni muru ye siɲɛ 6. N’ joli bɔnna fɔɔ n’ tun be ɲini ka sa.”

Nka sisan, Adolfo ka kumaw n’a ka ɲɛyirali ɲuman fɛ, a be mɔgɔw kalan u ka kɛ mɔgɔ dusu sumaninw ye. A koo ka di mɔgɔ caaman ye a ka jogo ɲumanw kosɔn. A ko a ye yɛlɛmani minw kɛ a ka ɲɛnamaya kɔnɔ, o y’a ninsɔndiya kosɔbɛ. A be Jehova waleɲuman lɔn sabu a y’ale dɛmɛ ka kɛ mɔgɔ dusu sumanin ye.

N’an dusu sumanin lo, o be Jehova ninsɔndiya. “N deen, kɛ hakilitigi ye, o bena ne nisɔndiya. O la, ne bena se ka n dɔgɔyabaga jaabi.”—Talenw 27:11.

Sutana ye Jehova juguw bɛɛ la belebeleba lo ye. Tiɲɛn na, Sutana be tugu le ka Jehova darabɔ. O kama, hali ni Ala dimina joo b’a fɛ. Nka, Bibulu b’a fɔ ko Jehova “te dimi joona.” (Ɛkiz. 34:6). Ala tɛ dimi joona ani a dusu sumanin lo. N’an b’an jija k’a ladegi, o ye hakilitigiyako lo ye ani o ka di Jehova ye kosɔbɛ.—Efɛz. 5:1.

Fariyakow ka ca duniɲa nin kɔnɔ. An be se ka mɔgɔw kunbɛn minw ye “tɔgɔ ɲininaw, kuncɛbaaw, Ala tɔgɔ tiɲɛbaaw, . . . tɔgɔ tiɲɛbaaw, yɛrɛminɛbaliw, farinmaw” ye (2 Tim. 3:2, 3, ABM). Nka, o man ɲi ka kerecɛnw bali ka kɛ ni dususuman ye. Ala ka Kuma b’an hakili jigi ko: ‘Hakilitigiya min be [bɔ] Ala fɛ, o be mɔgɔ kɛ . . . hɛrɛmɔgɔ ye, . . . min ka koo ka di.’ (Zaki 3:17). Hakilitigiya min be bɔ Ala fɛ, an b’a yira ko an be n’o ye, n’an be hɛɛrɛ ɲini ani n’an tɛ ja kelen kan. Ni dɔ y’an darabɔ, o hakilitigiya lo bena an lasun k’a tigi jaabi ni dususuma ye. An bena an magwɛrɛ Jehova la fana sabu o jogo be bɔ ale lo yɔrɔ ani daan tɛ a ka hakilitigiya la.