I yɛrɛ majigi hali ni kɔrɔbɔli b’i kan

1-3. Kira min bɔra Zuda, a ma mun lo kɛ? Ani mun lo sɔrɔla o la? ( Jaa lajɛ, barokun daminɛ na.)

ZEROBOWAMU ka masaya tuma na Israɛl kun na, a murutira Jehova ma. O kama, Jehova ye kira dɔ ci ka bɔ Zuda walisa a ka taga ale ka kitikow fɔ a ye. O kira tun majiginin lo. A ye Jehova ka cira fɔ masacɛ ye ni kantigiya ye. Masacɛ dimina a kɔrɔ kosɔbɛ. Nka, Jehova y’a ka kira tanga.—1 Mas. 13:1-10.

² Jehova tun y’a fɔ a ka kira ye ka gwɛlɛya ko: ‘Kana dumuni kɛ, kana jii yɛrɛ min yen, . . . i nana ni sira min ye, kana segi n’o sira kelen ye.’ O kira tagatɔ soo, a ye cɛkɔrɔba dɔ kunbɛn min tun bɔra Betɛli gɛrɛfɛ. O cɛkɔrɔba y’a fɔ Jehova ka kira ye ko ale fana ye Jehova ka kira dɔ ye ani a y’o kanbele lafili. Kanbele ma Jehova ka cikan labato minkɛ, o ma diya Jehova ye. O kama a kɔsegitɔ, jara dɔ y’a faga sira kan.—1 Mas. 13:11-24.

³ O kira min tun majiginin lo, mun na a ye kuncɛbaya kɛ k’a to o cɛkɔrɔba y’a lafili? Bibulu t’o fɔ an ye. N’a sɔrɔ a ɲinɛna pewu ko a tun ka ɲi ka ‘tugu a ka Ala kɔ ni yɛrɛmajigi ye.’ (Mise 6:8 kalan). Bibulu kɔnɔ, ka tugu Jehova kɔ, o kɔrɔ ko k’i jigi la a kan, k’a ka Masabaya lafasa ani k’a ka sariyaw labato. Jehova ye Sebagayabɛɛtigi ye ani a b’an kanu. O kama, mɔgɔ majiginin b’a lɔn ko a ka ɲi k’a Faa Jehova deli tuma bɛɛ. Kira tun be se ka Jehova ɲininga n’a ka cikanw yɛlɛmana. Nka, a m’o kɛ. Tuma dɔw la, an fana ka ɲi ka desizɔnba dɔw ta. Nka, n’a sɔrɔ an t’a lɔn an ka ɲi ka min kɛ tigitigi. N’an b’an majigi ka Jehova deli a k’an dɛmɛ, o b’an tanga desizɔn juguw ma.

4. An bena mun lo lajɛ barokun nin na?

⁴ Barokun tɛmɛnin na, an y’a ye mun na a kɔrɔtanin lo kerecɛnw k’u majigi ani o kɔrɔ ye min ye. Mun lo be se k’an ka majigilenya kɔrɔbɔ? An be se ka to ka koow kɛ ni majigilenya ye cogo di hali n’an niin degunnin lo? Walisa k’o ɲiningaliw jaabi, an bena koo saba lajɛ minw ka teli ka mɔgɔ ka majigilenya kɔrɔbɔ. An bena a ye fana an be se ka koow kɛ ni hakilitigiya ye cogo min na o koo kelen kelen bɛɛ la.—Talenw 11:2.

N’AN KA KOOW COGOYA YƐLƐMANA

5, 6. Barizilayi y’a yira cogo di ko a majiginin lo?

⁵ N’an ka koow cogoya wala an ka kunkanbaara yɛlɛmana, o be se k’an ka majigilenya kɔrɔbɔ. Barizilayi tun be ni saan 80 ye tuma min na Dawuda ko a ka na to n’ale ye masaso kɔnɔ. O tun ye nɛɛmaba lo ye Barizilayi fɛ. N’a tun sɔnna, ale ni masacɛ Dawuda tun bena u ka teriya diyabɔ. Nka, Barizilayi ma sɔn. A y’a fɔ Dawuda ye ko komi ale kɔrɔla, a t’a fɛ ka kɛ doni ye a kun. O kama, a y’a ɲini Dawuda fɛ ko Kimuyamu ka taga ale nɔɔ na. N’a sɔrɔ Barizilayi ka deen dɔ tun lo.—2 Sam. 19:31-37.

⁶ Majigilenya y’a to Barizilayi ye desizɔn ɲuman ta. A ma kɛ komi a tun be siranna kunkanbaara lo ɲɛ wala ko a tun t’a fɛ k’a yɛrɛ sɛgɛn le. A sɔnna a ma ko a ka koow cogoya yɛlɛmana ani ko a tɛ se ka koo dɔw kɛ tugun. A tun t’a fɛ ka tɛmɛ a seko daan kan (Galatikaw 6:4, 5 kalan). N’an ɲɛnako fɔlɔ ye ka lɔyɔrɔba sɔrɔ, o bena a to an bena kuncɛbaya kɛ ani k’an yɛrɛ sanga ni tɔɔw ye. O laban ye jigitigɛ lo ye (Gal. 5:26). Nka, majigilenya bena an lasun ka jɛn ka baara kɛ n’an balimaw ye walisa ka nɔɔrɔ la Jehova kan ani ka tɔɔw dɛmɛ.—1 Kor. 10:31.

7, 8. Majigilenya be se k’an dɛmɛ cogo di an kana an jigi la an yɛrɛ kan?

⁷ Ni kunkanbaara dira an ma, dɔ ka teli ka fara an ka kuntigiya kan. O be se k’an ka majigilenya kɔrɔbɔ. Neemi y’a mɛn ko Israɛldenw be tɔɔrɔla Zeruzalɛmu. O kama, a ye Jehova deli n’a dusu bɛɛ ye (Neemi 1:4, 11). Jehova ye Neemi duga sabu masacɛ Aritasɛrisɛsi y’a kɛ o yɔrɔ mara ka gofɛrɛnɛrɛ ye. Nka, Neemi ka lɔyɔrɔba, a ka nafolo ani a ka kuntigiya bɛɛ n’a ta, a m’a bolo la a yɛrɛ ka hakilitigiya wala a ka setigiya kan. A tora ka tugu Ala kɔ. A tun be to ka Jehova ka Kuma kalan walisa k’a lɔn a ka ɲi ka min kɛ (Neemi 8:1, 8, 9). Neemi m’a ka fanga digi tɔɔw kan. Nka, a y’a yɛrɛ saraka u nafa kosɔn.—Neemi 5:14-19.

⁸ Dɔ be se ka fara an ka kunkanbaara kan wala yɛlɛmani be se ka don an ka baara la. N’o kɛra, Neemi ka ɲɛyirali b’a yira cogo min na majigilenya be se k’an dɛmɛ an kana an jigi la an yɛrɛ kan. Ni diinan mɔgɔkɔrɔ dɔ b’a jigi la a yɛrɛ kan, o be se k’a to a yɛrɛ tɛ Jehova deli fɔlɔ ka sɔrɔ ka kafo ka koow ɲɛnabɔ. Mɔgɔ dɔw yɛrɛ be desizɔn ta, o kɔ u be Jehova deli a k’u duga. Nka, yala o ye majigilenya lo ye wa? Mɔgɔ majiginin b’a lɔn a lɔyɔrɔ ye min ye Ala ka jɛnkulu kɔnɔ. A t’a jigi la a yɛrɛ ka setigiya kan sabu o lo kɔrɔtanin tɛ. Ɲɛyirali fɛ, koo dɔ wala gwɛlɛya dɔ be se k’an sɔrɔ siɲɛ caaman. An ka ɲi ka kɔrɔsili kɛ an kana an jigi la an yɛrɛ kan walisa k’o ɲɛnabɔ (Talenw 3:5, 6 kalan). Komi an ye Ala sagokɛlaw ye, an ka ɲi k’an jija k’an ka kunkanbaara dafa denbaya kɔnɔ ani kafo kɔnɔ. Ka lɔyɔrɔba sɔrɔ wala ka ɲɛmɔgɔya kɛ, o lo man kan ka kɛ an ɲɛnako fɔlɔ ye.—1 Tim. 3:15.

N’U Y’AN KƆRƆFƆ WALA N’U Y’AN TANDO

9, 10. N’u bagara an ma k’an kɔrɔfɔ, majigilenya be se k’an dɛmɛ cogo di k’o muɲu?

⁹ N’u bagara an ma k’an kɔrɔfɔ, o ka teli k’an kɔnɔ gwan. Anɛ tun be to ka kasi sabu a sinamuso Penina tun b’a darabɔ tuma bɛɛ. Anɛ koo tun ka di a cɛɛ ye kosɔbɛ, nka a tun tɛ se ka deen sɔrɔ. Loon dɔ, k’a to delili la Ala ka fanibugu kɔnɔ, sarakalasebaga kuntigi Eli bagara a ma ko a ye dɔlɔ min ka su. O tun be se ka Anɛ dusu gwan. Nka, a ye Eli jaabi ni dususuman ye. Kɔfɛ, a ye delili dɔ kɛ min b’a yira ko a limaniyanin lo kosɔbɛ. O delili be sɔrɔ Bibulu kɔnɔ. A ye Jehova tando ani k’a waleɲuman lɔn a ka ɲumanya kosɔn.—1 Sam. 1:5-7, 12-16; 2:1-10.

¹⁰ Majigilenya be se k’an dɛmɛ fana ka “see kojugu kɔrɔ koɲuman barika la.” (Ɔrɔm. 12:21). Koo juguw ka ca Sutana ka duniɲa nin kɔnɔ. O kama, n’u ye tilenbaliyakow kɛ an na, o ma ɲi ka bari an na. Tiɲɛn lo k’o be se k’a to an be dimi, nka an ka banba walisa o kana an kɔnɔ gwan (Zab. 37:1). Ni bɛnbaliyako dɔ be an n’an balima dɔ cɛ, o koo be mɔgɔ tɔɔrɔ yɛrɛ le. O koo ɲɔgɔn na, mɔgɔ majiginin bena Yezu ladegi. Bibulu b’a fɔ ko: “U tun y’a nɛni tuma min na, a ma sɔn k’u nɛni. . . . Nga, a y’a ta to Ala ma dɔrɔn, ale min be kiti tigɛ ka tilen.” (1 Piyɛri 2:23). Yezu tun b’a lɔn ko Jehova lo be mɔgɔ mɔnɛ bɔ (Ɔrɔm. 12:19). Bibulu b’a fɔ kerecɛnw ye fana k’u ka u yɛrɛ majigi ani k’u kana “juguya sara ni juguya ye.”—1 Piyɛri 3:8, 9.

11, 12. a) N’u b’an nɛgɛ wala n’u b’an tando kojugu, majigilenya be se k’an dɛmɛ cogo di? b) An be se k’a yira cogo di an ka sawura n’an ka kɛwalew fɛ ko an majiginin lo?

¹¹ N’u b’an nɛgɛ wala n’u b’an tando kojugu, o fana be se k’an ka majigilenya kɔrɔbɔ. An ka Ɛsitɛri ka ɲɛyirali lajɛ. A ye koow kɛ cogo ɲuman na tuma min na a ka koow cogoya barila ka yɛlɛma. A tun cɛ ka ɲi yɛrɛ le. Saan kuru bɛɛ kɔnɔ, u tun be to ka tulu kasadiman sɔngɔ gwɛlɛ mɔ a la walisa a fari ka nugu. U tun ye sunguru caaman minɛ ka bɔ Pɛrɛsiw ka mara yɔrɔw bɛɛ la ka na n’u ye Suzi dugu la. U tun be sanga ni ɲɔgɔn ye walisa k’u koo diya masacɛ ye. Loon o loon, Ɛsitɛri n’o sunguruw tun be ɲɔgɔn fɛ. Nka, a tora ka bonya la mɔgɔw kan ani a hakili siginin tun lo. Hali tuma min na masacɛ y’a sugandi k’a kɛ a muso ye, a ma kuncɛbaya kɛ wala ka waso.—Ɛsit. 2:9, 12, 15, 17.

¹² Majigilenya b’a to fana an be fani don, k’an kuun dilan cogo bɛnnin na ani ka bonya la an ni mɔgɔ tɔɔw kan. N’an be kuncɛbaya kɛ wala n’an be waso, o lo tɛna a to an koo be diya mɔgɔw ye. Nka, n’an b’a yira ko an ye mɔgɔ ye min ‘hakili siginin lo, min ka koo ka nɔgɔ,’ o lo bena a to an koo be diya mɔgɔw ye (1 Piyɛri 3:3, 4 kalan; Zer. 9:22, 23). N’an b’a miiri ko an ka fisa ni tɔɔw ye, o bena ye an ka kɛwalew la. Ɲɛyirali fɛ, an be se k’a to mɔgɔw k’a miiri ko an ka fisa n’u ye, an ka kɛtaw, an ka lɔnniya wala an ka lɔnbagaw kosɔn. An be se fana ka koow ɲɛfɔ cogo dɔ la walisa mɔgɔw k’a miiri ko an kelen lo ye baara dɔ kɛ, k’a sɔrɔ an kelen tɛ. Yezu ye ɲɛyirali ɲuman di an ma fana o koo la. A ye kuma minw fɔ, u fanba tun bɔra Heburukan sɛbɛninw kɔnɔ le. A y’o kɛ walisa mɔgɔw k’a lɔn ko ale ka lɔnniya wala a ka hakilitigiya tɛ, nka Jehova ka miiriyaw lo. O ye majigilenya ye dɛ!—Zan 8:28.

N’AN T’A LƆN MIN BENA KƐ

13, 14. N’an majiginin lo, o be se k’an dɛmɛ cogo di ka desizɔn ɲumanw ta?

¹³ An ka majigilenya be se ka kɔrɔbɔ fana n’an ka ɲi ka desizɔnw ta. Ɲɛyirali fɛ, tuma min na ciden Pol tun be Sezare, kira Agabusi y’a fɔ a ye ko n’a tagara Zeruzalɛmu, u bena a minɛ yen. N’a sɔrɔ u yɛrɛ bena a faga. Komi balimaw tun be siranna u kana Pol faga, u y’a deli ko a kana taga yen. Nka, Pol m’a to u k’a bali ka taga. A jigi tun lanin t’a yɛrɛ kan. A m’a to fana siranya k’a fari faga. Nka, a y’a jigi bɛɛ la Jehova lo kan. A tun mana kɛ min o min ye, a tun labɛnnin lo k’a ka kunkanbaara dafa. Balimaw bɔra o kala ma minkɛ, u ma Pol bali tugun ka taga. Olu fana tun majiginin lo.—Kɛw. 21:10-14.

¹⁴ Hali n’an t’a lɔn ka ɲɛ koow bena kɛ cogo min na tigitigi, n’an majiginin lo, o be se k’an dɛmɛ ka desizɔn ɲumanw ta. Ɲɛyirali fɛ, n’an b’a fɛ ka kudayi cidenya baara daminɛ, an be se k’an yɛrɛ ɲininga ko: Mun lo bena kɛ n’an banana? An bangebaga minw kɔrɔla, n’olu mako b’an ka dɛmɛ na do? Jɔn lo bena a janto an na n’an kɔrɔla? Hali n’an ye delili kɛ wala ka sɛgɛsɛgɛri kɛ cogo o cogo, an tɛ se k’o ɲiningaliw ka jaabiliw bɛɛ sɔrɔ (Waaj. 8:16, 17). N’an jigi lanin be Jehova kan, o bena an dɛmɛ ka sɔn a ma ko an tɛ se ka koo bɛɛ lɔn. An ka ɲi ka sɛgɛsɛgɛri kɛ, ka ladiliw ɲini mɔgɔ wɛrɛw fɛ ani ka Jehova deli a k’an ɲɛminɛ. O kɔ, Ala ka hakili senu y’an dɛmɛ ka min faamu, an k’o kɛ (Waajulikɛla 11:4-6 kalan). O la, an be sababu di Jehova ma a k’an duga. A be se k’an dɛmɛ fana an k’an ka laɲinitaw yɛlɛma.—Talenw 16:3, 9.

I KA MAJIGILENYA BARIKA BONYA

15. N’an be miiri Jehova koo la, o b’an dɛmɛ cogo di an majiginin ka to?

¹⁵ Majigilenya nafa ka bon. N’o lo, an be se k’an ka majigilenya barika bonya cogo di? An ka koo naani lajɛ. A fɔlɔ, an ka miiri koɲuman Jehova ka jogo kabakomanw ani a ka Masabaya koo la. O la, an ka majigilenya barika bena bonya ani an bena bonya la Jehova kan (Ezayi 8:13). An k’a to an hakili la ko an tɛ tugura mɛlɛkɛ wala mɔgɔ lo kɔ. Nka, an be tugura Sebagayabɛɛtigi Ala lo kɔ. N’an b’o kala ma, o bena an lasun an k’an “yɛrɛ majigi Setigi Ala ye.”—1 Piyɛri 5:6.

16. N’an be miiri Jehova ka kanuya koo la, o b’an dɛmɛ cogo di k’an majigi kosɔbɛ?

¹⁶ A filanan, an ka majigilenya barika bena bonya n’an be miiri Jehova ka kanuya koo la. Ciden Pol y’a sɛbɛ ko an farikolo yɔrɔ minw tɛ foyi ye an ɲɛɛ na, Jehova b’olu “jati kosɔbɛ.” (1 Kor. 12:23, 24). O cogo kelen na, nafa b’an kelen kelen bɛɛ la Jehova ɲɛɛ kɔrɔ. A t’an suman ni ɲɔgɔn ye. Hali n’an filila, a bele b’an kanu. An latanganin lo sabu an b’a lɔn ko Jehova b’an kanu.

17. N’an be tɔɔw ka jogo ɲumanw filɛ, o b’an nafa cogo di?

¹⁷ A sabanan, an ka tɔɔw ka jogo ɲumanw lo filɛ i ko Jehova b’a kɛ cogo min na. N’an b’o kɛ, an be ni lɔyɔrɔ min ye Jehova ka jɛnkulu kɔnɔ, o bena an wasa kosɔbɛ. An bena an majigi ka ladiliw ɲini tɔɔw fɛ ani k’u sira tagama. An tɛna a ɲini k’an yɛrɛ yira, wala k’a fɔ tɔɔw ye tuma bɛɛ u ka ɲi ka min kɛ (Talenw 13:10). An bena ninsɔndiya ni tɔɔw ye, n’u ye nɛɛma baaraw sɔrɔ. An “balima minnu” be duniɲa kuru bɛɛ kɔnɔ, n’an y’a ye Jehova b’u dugara cogo min na, an bena a tando fana.—1 Piyɛri 5:9, ABM.

18. An be se k’an dusukun kolo cogo di walisa ka koow kɛ cogo bɛnnin na?

¹⁸ A naaninan, an k’an dusukun kolo ka kɛɲɛ ni Bibulu ka sariyakolow ye. O la, an bena koow kɛ cogo bɛnnin na ani an bena bonya la tɔɔw kan kosɔbɛ. N’an b’an majigi ka koow jati i ko Jehova b’u jati cogo min na, an bena hakili sɔrɔ ka koow kɛ. An ka to ka Bibulu sɛgɛsɛgɛ, ka delili kɛ ani an ye min faamu, an k’o sira tagama. O la, an bena se k’an dusukun kolo dɔɔni dɔɔni (1 Tim. 1:5). An k’a ɲini fana ka tɔɔw ka koow bila an taw ɲɛ. N’an y’an seko kɛ, Jehova ko a bena an ka fɔrɔmasɔn dafa. A bena an dɛmɛ ka kɛ ni majigilenya ye ani a ka jogo wɛrɛw ye.—1 Piyɛri 5:10.

19. Mun lo bena an dɛmɛ an majiginin ka to fɔɔ abada?

¹⁹ Kira min bɔra Zuda, jɛnɲɔgɔnya ɲuman tun b’ale ni Jehova cɛ. Nka, kuncɛbayako kelen dɔrɔn y’a to a bɔnɛna o la ani ka bɔnɛ a niin fana na. Nka, an be se k’an yɛrɛ majigi hali ni kɔrɔbɔli b’an kan. Jehova sagokɛla kantigimanw ka koow b’o lo yira. N’an tora ka tugu Jehova kɔ wagatijan kɔnɔ, dɔ bena fara an ka majigilenya kan (Talenw 8:13). An ka lɔyɔrɔ mana kɛ min o min ye, an ka tugu Jehova kɔ sabu o ye nɛɛmaba ye min ɲɔgɔn tɛ yen. O nɛɛma jati fɛɛn nafamanba ye. To k’i seko bɛɛ kɛ ka tugu Jehova kɔ ni majigilenya ye fɔɔ abada.