Kunmabɔsara: An Faa ka nilifɛn “dafanin”

1. An bena duga jumanw lo sɔrɔ kunmabɔsara sababu fɛ?

MƆGƆ caaman bena dugaw sɔrɔ Yezu Krista ka kunmabɔsara barika la. O kunmabɔsara sababu la, tilenninya ka di adamaden minw ye, olu bɛɛ bena se ka kɛ Ala ka denbaya mɔgɔw ye. An bena se fana ka ɲɛnamaya kɛ fɔɔ abada ninsɔndiya la. Adamaden minw be mɛnni kɛ Ala fɛ, u bena siniɲasigi ɲuman sɔrɔ Yezu ka kunmabɔsara sababu fɛ. Nka, o dɔrɔn tɛ. Yezu ka saya kɛra sababu ye fana ka Jehova ka tilenninya lafasa. O koo ɲɛsinna sankolo ni dugukolo bɛɛ ma.—Eburuw 1:8, 9.

2. a) Yezu ye delili kɛ koo jumanw lo koo la minw kɔrɔtanin lo kosɔbɛ? (Jaa lajɛ, barokun daminɛ na.) b) An bena mun lo lajɛ barokun nin kɔnɔ?

² Saan fila sanni Yezu ka sa ani ka kunmabɔsara di, a y’a ka kalandenw degi delili kɛcogo la. A ko: “An Faa min be sankolo la, i tɔgɔ ka boɲa [wala ka saniya]. I ka masaya ka na. I sago ka kɛ dugukolo kan i ko a be kɛ sankolo la cogo min na.” (Mat. 6:9, 10). An b’a fɛ ka dɔ fara an ka waleɲumanlɔn kan kunmabɔsara koo la. O kama, an k’a lajɛ cogo min na o kunmabɔsara ɲɛsinna Ala tɔgɔ saniyanin, Ala ka Masaya ani Ala sago dafanin koo ma.

‘I TƆGƆ KA SANIYA’

3. Jehova tɔgɔ be mun lo yira? Sutana y’o tɔgɔ senuman nɔgɔ cogo di?

³ Yezu ye fɛɛn fɔlɔ min kofɔ a ka delili modɛli kɔnɔ, o ye ko Ala tɔgɔ ka saniya. Jehova tɔgɔ b’a yira ko a ka ɲumanya, a ka Masabaya ani a ka senumanya ɲɔgɔn tɛ yen. Yezu ye Jehova weele delili wɛrɛ kɔnɔ ko: “Fa senuma.” (Zan 17:11, ABM). Jehova ka sariyaw n’a ka kɛtaw bɛɛ ka senu sabu ale yɛrɛ ka senu. O n’a t’a bɛɛ, joo min be Jehova fɛ ka sariyaw sigi adamadenw ye, Sutana ye nanbarako kɛ k’o sɔsɔ Edɛn nankɔ kɔnɔ. A ye ngalon tigɛ k’a la Jehova kan. O cogo la a y’a tɔgɔ senuman nɔgɔ.—Zɛnɛzi 3:1-5.

4. Yezu y’a seko kɛ cogo di ka Jehova tɔgɔ saniya?

⁴ Nka Yezu do? Jehova tɔgɔ tun ka di ale ye kosɔbɛ (Zan 17:25, 26). A y’a seko kɛ ka Jehova tɔgɔ saniya (Zaburuw 40:9-11 kalan). Yezu ye ɲɛnamaya kɛ cogo dafanin na dugukolo kan. O cogo la, a y’a yira ko a bɛnnin lo Jehova ka sariyaw sigi a ka danfɛn hakilitigiw ye ani k’o sariyaw tilennin lo. Sutana y’a kɛ Yezu tɔɔrɔla kosɔbɛ fɔɔ ka taga se saya ma. O bɛɛ n’a ta, Yezu ye kantigiya kɛ a sankolola Faa ye cogo dafanin na. A ka kantigiya y’a yira ko mɔgɔ dafanin be se ka Ala ka sariya tilenninw labato bɛrɛbɛrɛ.

5. An be se ka mun lo kɛ walisa ka Ala tɔgɔ saniya?

⁵ An be se k’a yira cogo di ko Jehova tɔgɔ ka di an ye? An b’o yira an ka kɛwalew fɛ. Jehova b’a ɲini an fɛ an ka kɛ mɔgɔ senumanw ye (1 Piyɛri 1:15, 16 kalan). O kɔrɔ ko, an ka ɲi ka Jehova kelenpe lo bato ani ka mɛnni kɛ a fɛ n’an dusu bɛɛ ye. Jehova ka sariyakolow n’a ka sariyaw tilennin lo. Hali ni kɔrɔbɔli b’an kan, an ka banba ka koow kɛ ka kɛɲɛ ni Jehova ka sariyaw ye. An ka kɛwale ɲumanw fɛ, an b’a to an ka yeelen be bɔ. O cogo la, an be bonya la Jehova tɔgɔ kan (Mat. 5:14-16). Komi an ye mɔgɔ senumanw ye, an k’a yira an ka ɲɛnamaya kɛcogo fɛ ko Jehova ka sariyaw ka ɲi ani ko Sutana ye ngalontigɛla ye. An bɛɛ be fili. O kama, n’an ye jurumu kɛ, an ka nimisa sɔbɛ la ani kɛwale minw be Jehova tɔgɔ nɔgɔ, an k’an mabɔ u la.—Zab. 79:9.

6. Hali n’an dafanin tɛ, mun na Jehova be se k’an jati mɔgɔ tilenninw?

⁶ Minw limaniyanin lo, Jehova b’olu ka jurumuw yafa Yezu ka saraka sababu fɛ. Minw b’u yɛrɛkun di Jehova ma, a be sɔn u ka kɛ ale batobagaw ye. Jehova be kerecɛn mɔlenw jati mɔgɔ tilenninw ye ani k’u kɛ a deenw ye. A be “saga dɔ wɛrɛw” jati fana mɔgɔ tilenninw ye ani k’u kɛ a teriw ye (Zan 10:16; Ɔrɔm. 5:1, 2; Zaki 2:21-25). Sisan yɛrɛ, Jehova be se k’an jati mɔgɔ tilenninw ye kunmabɔsara sababu fɛ ani an be se k’a tɔgɔ saniya.

“I KA MASAYA KA NA”

7. Kunmabɔsara sababu fɛ, Ala ka Masaya bena duga jumanw lo lase adamadenw ma?

⁷ Yezu ka delili modɛli kɔnɔ, a y’a fɔ fana ko: “I ka masaya ka na.” Kunmabɔsara ɲɛsinna Ala ka Masaya koo ma cogo di? Kunmabɔsara sababu fɛ, mɔgɔ 144000 bena kɛ masacɛw ni sarakalasebagaw ye sankolo la ni Krista ye (Yir. 5:9, 10; 14:1). Yezu n’a ka marakɛɲɔgɔnw lo be Ala ka Masaya kɔnɔ. Saan waa kelen kɔnɔ, u bena kunmabɔsara nafa lase adamadenw ma minw be mɛnni kɛ Ala fɛ. Dugukolo bena kɛ alijɛnɛ ye ani adamaden kantigiw bɛɛ bena kɛ mɔgɔ dafaninw ye. Jehova sagokɛla minw be sankolo la ani minw be dugukolo kan, u bɛɛ bena jɛn ka kɛ denbaya kelen ye (Yir. 5:13; 20:6). Yezu bena Sutana kungolo ɲɔɲɔ ani k’a ka murutili nɔfɛkow bɛɛ ban pewu dugukolo kan.—Zɛnɛzi 3:15.

8. a) Yezu y’a ka kalandenw dɛmɛ cogo di k’a faamu ko Ala ka Masaya kɔrɔtanin lo kosɔbɛ? b) An b’a yira cogo di ko an be dɛmɛ don Ala ka Masaya koow la?

⁸ Tuma min na Yezu tun be dugukolo kan, a y’a ka kalandenw dɛmɛ k’a faamu ko Ala ka Masaya kɔrɔtanin lo kosɔbɛ. A batizenin kɔ dɔrɔn, Yezu y’a daminɛ ka “Ala ka masaya kibaru diman fɔ” yɔrɔ bɛɛ (Luka 4:43). Yezu ye kuma laban dɔw fɔ a ka kalandenw ye ka sɔrɔ ka kɔsegi sankolo la. A ko a ka kalandenw ka kɛ ale seerew ye “diɲɛ faan bɛɛ la.” (Kɛw. 1:6-8). Masaya kibaro diiman be fɔra duniɲa kuru bɛɛ kɔnɔ. O sababu fɛ, mɔgɔ bɛɛ bena a lɔn kunmabɔsara ye min ye. U bena se ka kɛ Ala ka Masaya ka marakɔnɔmɔgɔw ye fana. Bi, n’an be kerecɛn mɔlenw dɛmɛ ka Masaya kibaro diiman waaju duniɲa kuru bɛɛ kɔnɔ, an b’a yira ko an be dɛmɛ don Ala ka Masaya koow la.—Mat. 24:14; 25:40.

“I SAGO KA KƐ”

9. Mun na an be se ka la a la ko Jehova bena a sago dafa adamadenw koo la?

⁹ Yezu y’a fɔ ko: “I sago ka kɛ.” O kɔrɔ ko di do? O kɔrɔ ko Jehova lo ye danbaga ye ani ni Jehova y’a daa di koo dɔ la, a be komi o koo dafara ka ban (Ezayi 55:11). A tɛna a to Sutana ka murutiliko k’a bali k’a sagonata dafa adamadenw koo la. Jehova tun b’a fɛ Adama ni Awa ka deen dafaninw sɔrɔ ka dugukolo bɛɛ fa (Zɛnɛzi 1:28). N’u tun ma deenw sɔrɔ ka sɔrɔ ka sa, Ala sagonata tun ye min ye adamadenw koo la, o tun tɛna dafa. O kama, hali k’a sɔrɔ Adama ni Awa ye jurumu kɛ, Jehova y’a to u ye deenw sɔrɔ. Kunmabɔsara sababu fɛ, mɔgɔ limaniyaninw bɛɛ bena sababu sɔrɔ ka kɛ mɔgɔ dafaninw ye. U bena ɲɛnamaya kɛ fana fɔɔ abada. Jehova be mɔgɔw kanu. O kama, minw be mɛnni kɛ a fɛ, a sago ye ko olu ka ɲɛnamaya kɛ i ko a tun b’a fɛ cogo min na.

10. Mɔgɔ minw sara, kunmabɔsara bena olu nafa cogo di?

¹⁰ Mɔgɔ miliyɔn caaman sara ani u ma sababu sɔrɔ ka Jehova lɔn ani k’a bato. Olu ka koo bena kɛ cogo di do? Kunmabɔsara sababu fɛ, u bena kunu ka bɔ saya la. An sankolola Faa kanutigi bena u lakunu, ka sababu di u ma u k’a sagonata lɔn ani ka ɲɛnamaya banbali sɔrɔ (Kɛw. 24:15). Jehova b’a fɛ mɔgɔw ka to niin na, a t’a fɛ u ka sa. Jehova lo ye niin dibaga ye. O la, mɔgɔ minw bena kunu ka bɔ saya la, a bena kɛ olu Faa ye (Zab. 36:10). O kama, Yezu ka delili modɛli kɔnɔ, a y’a fɔ ko: “An Faa min be sankolo la.” (Mat. 6:9). Yezu lo bena suuw kunu. Jehova lo y’o kunkanbaaraba kalifa a ma (Zan 6:40, 44). Yezu ko: “Ne le be suuw kunun, ne be nii di.” Alijɛnɛ kɔnɔ, a bena o kunkanbaara dafa.—Zan 11:25.

11. Ala sago ye mun lo ye “jamaba” koo la?

¹¹ Jehova tɛ ɲumanya kɛ mɔgɔ damanin dɔrɔn ye. O kama Yezu y’a fɔ ko: “Mɔgɔ o mɔgɔ be Ala sago kɛ, o tigi ye ne dɔgɔcɛ, walima ne dɔgɔmuso, walima ne baa ye.” (Mariki 3:35). Ala sago ye ko “jamaba” ka bɔ jamanaw, siyaw, ani kaanw bɛɛ la ka kɛ ale batobagaw ye. Mɔgɔ minw limaniyanin lo Krista ka kunmabɔsara la ani u be Ala sago kɛ, olu fana bena a fɔ ni kaanba ye ko: “An ka Ala min be masasigilan kan, anw kisira ale ni Sagaden sababu la.”—Yir. 7:9, 10.

12. Jehova sagonata ye min ye adamadenw koo la, Yezu ka delili modɛli b’o yira cogo di?

¹² Adamaden minw be mɛnni kɛ Ala fɛ, Yezu ka delili modɛli b’a yira Jehova sagonata ye min ye olu koo la. Ka kɛɲɛ n’o delili ye, an b’a fɛ k’an seko bɛɛ kɛ ka Jehova tɔgɔ saniya, o kɔrɔ, ka bonya la a kan (Ezayi 8:13). Yezu yɛrɛ tɔgɔ kɔrɔ ko: “Jehova ye kisili ye.” An be kisili min sɔrɔ kunmabɔsara sababu fɛ, o be bonya ni nɔɔrɔ la Jehova tɔgɔ kan. Ala ka Masaya bena kunmabɔsara nafaw lase adamadenw ma minw be mɛnni kɛ Ala fɛ. Yezu ka delili modɛli b’an hakili sigi ko foyi tɛ se ka Jehova bali k’a sagonata dafa.—Zab. 135:6; Ezayi 46:9, 10.

I KA WALEƝUMANLƆN YIRA KUNMABƆSARA KOO LA

13. An be mun lo yira an ka batɛmu fɛ?

¹³ An b’a yira cogo di ko an be Jehova waleɲuman lɔn kunmabɔsara koo la? An b’an yɛrɛkun di Jehova ma ani ka batize sabu an limaniyanin lo kunmabɔsara koo la. An ka batɛmu b’a yira ko “an ye [Jehova] ta ye.” (Ɔrɔm. 14:8). N’an batizera, an be Jehova deli a ka dusukun ɲuman di an ma (1 Piyɛri 3:21). Jehova b’an ka delili jaabi cogo di do? A b’an saniya Yezu ka joli barika la. Jehova y’a daa di koo minw bɛɛ la, an lanin b’a la kosɔbɛ ko a bena o di an ma.—Ɔrɔm. 8:32.

14. Mun na a ɲinina an fɛ ko an k’an mɔgɔɲɔgɔnw kanu?

¹⁴ Cogo wɛrɛ juman na an be se k’a yira ko an be Jehova waleɲuman lɔn kunmabɔsara koo la? Jehova b’a ka koow bɛɛ kɛ ni kanuya ye. A b’a fɛ a batobagaw bɛɛ ka koow kɛ o cogo la fana (1 Zan 4:8-11). N’an b’an mɔgɔɲɔgɔnw kanu, an b’a yira ko an b’a fɛ ka kɛ an “sankolo la Faa deenw ye.” (Mat. 5:43-48). Cikan fila kɔrɔtanin lo ka tɛmɛ tɔɔw bɛɛ kan. A fɔlɔ, an ka ɲi ka Jehova kanu ani a filanan, an k’an mɔgɔɲɔgɔnw kanu (Mat. 22:37-40). Cogo juman na an b’a yira ko an b’an mɔgɔɲɔgɔnw kanu? An b’o yira, n’an be Masaya kibaro diiman fɔ u ye. N’an b’an mɔgɔɲɔgɔnw kanu, an be Ala ka nɔɔrɔ yira. Bibulu b’a fɔ ko an k’an mɔgɔɲɔgɔnw kanu ani ko an k’an balimaw yɛrɛ lo kanu kosɔbɛ. N’an b’o cikan labato, an bena Ala kanu cogo “dafanin” na.—1 Zan 4:12, 20.

KUNMABƆSARA BARIKA LA, AN ‘BENA LAFIYA SƆRƆ’

15. a) Jehova b’an duga cogo di bi? b) An be duga jumanw lo makɔnɔna?

¹⁵ N’an limaniyanin lo kunmabɔsara koo la, o be kɛ sababu ye Ala b’an ka jurumuw bɛɛ yafa. Ala ka Kuma b’an hakili sigi ko Ala bena an ka “hakɛw yafa [wala k’u jɔsi ka bɔ yen].” (Kɛwaliw 3:19-21 kalan). An y’a ye dakun tɛmɛninw na ko kunmabɔsara sababu fɛ, Jehova be kerecɛn mɔlenw jati a deenw ye (Ɔrɔm. 8:15-17). Minw be “saga dɔ wɛrɛw” cɛma, an be se k’a fɔ ko Jehova ye seereyasɛbɛ dɔ kɛ u tɔgɔla k’a yira ko a bena u fana kɛ a deenw ye. U bena kɛ mɔgɔ dafaninw ye. O kɔ, kɔrɔbɔli laban dɔ bena kɛ. N’u ye kantigiya kɛ Jehova ye, u bena kɛ a ka deen kanulenw ye dugukolo kan (Ɔrɔm. 8:20, 21; Yir. 20:7-9). Jehova deenw koo ka gwɛlɛ a ma kosɔbɛ ani a bena u kanu fɔɔ abada. O kama, kunmabɔsara nafa fana bena mɛɛn fɔɔ abada (Eburuw 9:12). Foyi tɛna bɔ a nafa la. Mɔgɔ si wala fɛɛn si tɛ se k’a bɔsi an na fana.

16. An hɔɔrɔnyara cogo di kunmabɔsara sababu fɛ?

¹⁶ Minw be nimisa sɔbɛ la, a laban olu bena kɛ Jehova ka denbayamɔgɔw ye. Sutana tɛ se ka foyi kɛ k’u bali o la. Yezu nana dugukolo kan ka sa “siɲɛ kelenpe.” O cogo la, kunmabɔsara dira kudayi kama (Eburuw 9:24-26). Adama ka jurumu kosɔn, saya jalaki tun b’an kan. Nka, kunmabɔsara sababu fɛ o jalaki bɔra an kan. Duniɲa nin be Sutana fanga kɔrɔ. Nka, Yezu ka saraka barika la, an t’o duniɲa ka jɔɔn ye tugun ani an tɛ siran saya ɲɛ tugun.—Eburuw 2:14, 15.

17. An bena duga jumanw lo sɔrɔ Jehova ka kanuya kosɔn?

¹⁷ An lanin b’a la ko Ala ka layiduw bɛɛ bena dafa. Jehova ye sariya minw sigi duniɲa kɔnɔ, u tɛ yɛlɛma abada. Jehova fana tɛ yɛlɛma ani a tɛna an jigi tigɛ fewu (Mal. 3:6). Jehova ye niin di an ma. Nka, o dɔrɔn tɛ. A b’an kanu fana. “Ala b’an kanu cogo min na, anw kɔni b’o lɔn, ani anw lara o la. N’i ko Ala, i ko kanuya.” (1 Zan 4:16). Dugukolo kuru bɛɛ bena kɛ alijɛnɛ cɛɲumanba ye. Mɔgɔ bɛɛ bena kɛ ni Ala ka kanuya ɲɔgɔn ye dugukolo kan. O la, an ka fara mɛlɛkɛ kantigiw kan k’a fɔ ko: “Tanuli, nɔɔrɔ, ani hakilitigiya, o y’an ka Ala ta ye. Barika ka la a ye. Boɲa ni setigiya ani fangatigiya y’a ta ye tuma bɛɛ la. Amiina!”—Yir. 7:12.