I tun b’a lɔn wa?

Jagokɛla minw tun be bɛgɛnw feere Alabatosoba kɔnɔ Zeruzalɛmu, yala a tun bɛnnin lo u ka weele “soonw” wa?

MATIYO ka kibaro diiman kɔnɔ, a fɔra ko: “Yezu donna Alabatosoba kɔnɔ waati min na, a ye feerekɛlaw, ni sannikɛlaw gwɛn ka bɔ yen, ka warifalenbagaw ka tabaliw ni tubani feerebagaw ka sigilanw ɲɔti k’u benben duguma. O kɔ, a y’a fɔ u ye ko a fɔra Ala ka kuma na ko: ‘Ne ka soo bena kɛ daalilikɛyɔrɔ ye. Nga aw kɔni y’a kɛ soonw ka yɔrɔ ye.’”—Mat. 21:12, 13.

Yahutuw ka tarikikow b’a yira k’o feerekɛlaw tun be ben sannikɛlaw kan sabu u tun be fɛɛnw sɔgɔ gwɛlɛya kojugu. Ɲɛyirali fɛ, Yahutuw ka kitabu kɔrɔ dɔ b’a fɔ ko wagati dɔ la saan kɛmɛkulu fɔlɔ la, tuganin fila sɔngɔ tun ye sanu deniye kelen ye. O tun ye baarakɛla dɔ ka tile 25 sara ye. Fantanw tun be se ka saraka bɔ ni tuganinw wala jɛnɛtubaw ye. Nka, u sɔngɔ tun gwɛlɛyara fɔɔ fantanw tun tɛ se k’u san (Lev. 1:14; 5:7; 12:6-8). O koo tun ye Yahutuw ka karamɔgɔba Gamaliyɛli kɔnɔ gwan kosɔbɛ. O la, Yahutuw tun be to ka saraka minw bɔ, a ye dɔ bɔ u la. O kama, tuganin fila sɔngɔ jigira ka kɛ sanu deniye kelen tilanyɔrɔ kɛmɛ ye.

O sen fɛ, an b’a faamu ko joo tun be Yezu fɛ k’o feerekɛlaw weele ko “soonw” sabu u tun ye wasabaliw ye ani u tun be ben mɔgɔw kan.