I hakili b’a la wa?

Kɔrɔsili Sangaso minw bɔra kɔsa la, i y’u kalan koɲuman wa? N’i y’u kalan, a filɛ n’i be se ka ɲiningali nunu jaabi:

Ni balimacɛw, i n’a fɔ kafokulu kɔrɔsibagaw ani diinan mɔgɔkɔrɔw ye cikanw sɔrɔ ka bɔ Ala ka ɔriganisasiyɔn fɛ, u ka ɲi ka mun lo kɛ?

U ka ɲi ka sɔn u ma joona joona. U ka ɲi k’u yɛrɛ ɲininga ko: “Ne be n’ balimaw sabati Alako ta fan fɛ wa? Ne be cikan minw sɔrɔ, ne be sɔn u ma joona joona ani k’u sira tagama wa?”—w16.11, ɲɛɛ 11.

Tuma juman lo kerecɛn sɔbɛw tagara jɔnya la Babilonɛ?

O kɛra dɔɔni Yezu ka cidenw sanin kɔ. O wagati la, legilizi kuntigiw jɛnkulu dɔ y’a daminɛ ka bɔ kɛnɛ kan. Legilizi ni gofɛrɛnɛman ye kerecɛn murutininw dɛmɛ ani u y’a ɲini ka kerecɛn mɔlenw bali ka waajuli kɛ. O kerecɛnw y’a daminɛ k’u mabɔ Babilonɛba la, saan caaman ka kɔn 1914 ɲɛ.—w16.11, ɲɛɛ 23-25.

Lefèvre d’Étaples ye baara min kɛ, mun na o tun ye kooba ye?

Saan 1520 wagatiw la, Lefèvre d’Étaples ye Bibulu bayɛlɛma Faransɛkan na walisa mɔgɔ gwansanw ka se k’a kalan. A ye ɲɛfɔli minw kɛ vɛrisew kan, o ye nɔɔ to Martin Luther, William Tyndale, ani John Calvin kan.—wp16.6-F ɲɛɛ 10-12.

Faranfasi juman be yen ‘farisogo koow miirili’ ani ‘niin senu koo miirili’ cɛ? (Ɔrɔm. 8:6)

Mɔgɔ min be ‘farisogo koow miiri,’ ale be tugu a ka nege juguw lo kɔ, a b’a diyanyekow lo kɛ. A be kuma u koo la tuma bɛɛ ani a b’a ɲini k’o koow nege don mɔgɔw la. O tigi laban ye saya lo ye. Mɔgɔ min be ‘niin senu koo miiri,’ ale ɲɛnako fɔlɔ ye Alakow lo ye ani a ka miiriyaw bɛnnin lo Ala taw ma. O kerecɛn b’a to hakili senu lo k’a ɲɛminɛ ani a bena ɲɛnamaya ni hɛɛrɛ sɔrɔ.—w16.12, ɲɛɛ 15-17.

Mɔgɔ be se k’a ka haminankow nɔgɔya cogo ɲuman jumanw na?

Koo minw kɔrɔtanin lo, o kɛ i ɲɛnako fɔlɔ ye. Koow kɛ ka dama kɛɲɛ, wagati kunmabɔ ka lafiɲɛ loon o loon, Jehova ka danfɛnw diyabɔ, yɛlɛko koo dɔw kɛ tuma dɔw la, spɔr kɛ tuma o tuma ani sinɔgɔ ka ɲɛ.—w16.12, ɲɛɛ 22-23.

“Ala ye [Enɔki] ta ka bɔ diɲɛ na, waasa a kana sa.” (Eburuw 11:5). Cogo di do?

A be komi Ala y’a to Enɔki sara dɔɔni dɔɔni walisa a kana saya dimi lɔn. A yɛrɛ ma bɔ a kala ma ko ale be sara.—wp17.1-F, ɲɛɛ 12-13.

Mun na a kɔrɔtanin lo an k’an yɛrɛ majigi?

Mɔgɔ min majiginin lo, o tigi t’a yɛrɛ jati k’a dama tɛmɛ ani a b’a seko daan lɔn. A b’a lɔn fana ko a ka kɛtaw be nɔɔ to mɔgɔ wɛrɛw kan ani a t’a yɛrɛ fisaya ni tɔɔw ye.—w17.01, ɲɛɛ 18.

Mun lo b’a yira ko Ala ye koow ɲɛnabɔla jɛnkulu ɲɛminɛ saan kɛmɛkulu fɔlɔ la i ko a be Koow Ɲɛnabɔla Jɛnkulu ɲɛminɛna cogo min na bi?

Hakili senu y’u dɛmɛ ka Ala ka Kuma faamu ka ɲɛ. Mɛlɛkɛw y’u dɛmɛ fana ka waajuli baara ɲɛminɛ. U tun be basigi Ala ka Kuma lo kan ka koow latigɛ. O kelen lo fana bi.—w17.02, ɲɛɛ 26-28.

Mun lo kama an be kunmabɔsara jati fɛɛn nafamanba ye?

Kuun naani kama: A dibaga, a dira kuun min kama, saraka juman lo kɛra walisa ka se k’a sara ani a be makoya sɔbɛ min dafa. An ka ɲi ka miiri o koow kan.—wp17.2-F, ɲɛɛ 4-5.

Kerecɛn ye koo minw latigɛ, a be se ka yɛlɛmani don u la wa?

An ye min latigɛ, an ka ɲi k’o kɛ. Nka tuma dɔw la, a ka ɲi an ka yɛlɛmani don a la. Ninivukaw nimisara minkɛ, Jehova tun ye min latigɛ u koo la, a y’o yɛlɛma. Tuma dɔw la, an ka ɲi k’an ka koo latigɛninw yɛlɛma. N’a sɔrɔ koow cogoya yɛlɛmana.—w17.03, ɲɛɛ 16-17.

Ka mɔgɔ tɔgɔ jugu fɔ, mun na faratiba b’o la?

O kuma be se ka jɛnsɛn ani ka koo tɔɔ juguya. Joo b’an fɛ wo, joo t’an fɛ wo, n’an be mɔgɔ tɔgɔ jugu fɔ o tɛna koow fisaya.—w17.04, ɲɛɛ 21.