Arimateka Yusufu y’a yira ko ale ye Yezu ka kalanden ye

ARIMATEKA YUSUFU tun ma la a la ko a tun be se ka jagwɛlɛya sɔrɔ ka kuma Ɔrɔmu ka gofɛrɛnɛrɛ Pɔnsi Pilati fɛ. Pitali tun tɛ mɛnni kɛ mɔgɔ fɛ fewu. Nka, walisa Yezu ka sutarali ɲuman sɔrɔ, fɔɔ dɔ tun k’a suu deli Pilati fɛ. Koow ma gwɛlɛya Yusufu fɛ i ko a tun b’a miirila cogo min na. Pilati ye sɔrɔdasi kuntigi ɲininga walisa k’a lɔn ni Yezu sara. O kɔ, a ye sira di Yusufu ma ko a ka taga Yezu suu ta. Yusufu dusu kasinin teliyara ka taga Yezu fagayɔrɔ la.—Mariki 15:42-45.

• Arimateka Yusufu tun ye jɔn lo ye?

• Jɛnɲɔgɔnya juman lo tun be ale ni Yezu cɛ?

• Mun na i ka ɲi k’i mako don a ka koo la?

YAHUTUW KA KITITIGƐLA DƆ TUN LO

Mariki ye kibaro diiman dɔ sɛbɛ hakili senu sababu fɛ. A fɔra yen ko Yusufu ye ‘mɔgɔba ye zuwifuw ka kititigɛlaw cɛma.’ Olu lo tun be kiti tigɛ Yahutuw ka kititigɛsoba kɔnɔ ani olu fana lo tun be Yahutuw ka politikikow kun na (Mariki 15:1, 43). O la, Yusufu tun ye jama kuntigi dɔ ye. O lo kama, a tun be se ka sira sɔrɔ ka kuma Ɔrɔmukaw ka gofɛrɛnɛrɛ fɛ. A tɛ bari an na k’a ye ko Yusufu tun ye nafolotigi ye fana.—Mat. 27:57.

Yezu koo tun man di Yahutuw ka kititigɛlaw fanba ye. Olu lo tun ye nanbarako kɛ walisa Yezu ka faga. Nka, Yusufu kɔni, “mɔgɔɲuman tun lo, a tun te sɔn ka mɔgɔ tɔɲɔ.” (Luka 23:50). A tun tɛ komi o kititigɛlaw fanba. A tun ye hɔɔrɔn ye ani a sɔɔn tun ka ɲi. A tun b’a seko kɛ fana ka Ala ka cikanw labato. Ale fana tun be “Ala ka masaya waati kɔnɔna.” O b’an dɛmɛ k’a faamu fɛɛn min kama a kɛra Yezu ka kalanden dɔ ye (Mariki 15:43; Mat. 27:57). Komi tiɲɛn ni tilenninyako tun ka di a ye kosɔbɛ, n’a sɔrɔ o lo y’a to a sɔnna Yezu ka kuma ma.

A TUN YE YEZU KA KALANDEN YE DOGO LA

Zan 19:38 b’a fɔ ko Yusufu tun ye “Yezu ka kalanden ye dogo la, bari a tun be siran zuwifuw ɲa.” Mun na Yusufu tun be siran? A tun b’a lɔn ko Yezu koo tun man di Yahutuw ye. Mɔgɔ o mɔgɔ tun ko ale lanin be Yezu la, u tun b’o tigi gwɛn ka bɔ Alabatoso kɔnɔ (Zan 7:45-49; 9:22). N’u y’i gwɛn ka bɔ Alabatoso kɔnɔ, mɔgɔw b’i mafiɲɛya, u tɛ sɔn ka jɛn n’i ye ani u b’i jati i n’a fɔ i tɛ Yahutu dɔ ye. O lo kama, Yusufu tun be siran k’a fɔ mɔgɔw ɲɛɛ na ko ale lanin be Yezu la. N’a tun y’o kɛ, a tun bena bɔnɛ a ka lɔyɔrɔba la ani mɔgɔw tun tɛna a bonya tugun.

O gwɛlɛya tun tɛ Yusufu dɔrɔn kan. Zan 12:42 b’a fɔ ko: “Kuntigi caaman lara [Yezu] la, nga Fariziɲɛw ɲasiran kosɔn u tun te sɔn k’u yɛrɛ yira, u tun be siran ko u bena u niin bɔ kalanso koo la.” O gwɛlɛya tun be Nikodɛmu kan. Ale fana tun ye Yahutuw ka kititigɛla dɔ ye.—Zan 3:1-10; 7:50-52.

Yusufu tun ye Yezu ka kalanden ye, nka a ma se k’o fɔ mɔgɔw ɲɛɛ na. Ka kɛɲɛ ni Yezu ka fɔta ye, o tun ye kojuguba ye. Yezu tun ko: “Ni mɔgɔ min y’a fɔ mɔgɔw ɲana ko ale ye ne ka mɔgɔ ye, ne Faa min be sankolo la, ne fana ben’a fɔ ale ɲana k’o tigi ye ne ka mɔgɔ ye. Nga, ni mɔgɔ min banna ne la mɔgɔw ɲana, ne fana bena ban o tigi la n Faa ɲana min be sankolo la.” (Mat. 10:32, 33). Yusufu m’a fɔ ko ale tɛ Yezu lɔn. Nka, a m’a jaa gwɛlɛya fana k’a fɔ ko ale lanin be Yezu la. Ele do?

Yusufu ye koo ɲuman dɔ kɛ. Bibulu b’a fɔ ko kititigɛlaw ye nanbarako min kɛ Yezu la, Yusufu m’a niin don o la (Luka 23:51). Dɔw ka fɔta la, n’a sɔrɔ Yusufu tun tɛ yen tuma min na u tun be kiti tigɛra Yezu kan. A ka kɛ min o min ye, n’a sɔrɔ Yusufu dusu tiɲɛna kosɔbɛ o tilenbaliyako kosɔn. Nka, a tun tɛ se ka foyi kɛ k’o bali!

A YE SEE SƆRƆ A KA SIRANYA KAN

Nka tuma min na Yezu sara, Yusufu ye see sɔrɔ a ka siranya kan ani a y’a latigɛ ka jɛn ni Yezu ka kalandenw ye. O lo yirala ka gwɛ Mariki 15:43 kɔnɔ ko: “Yusufu y’a jaa gwɛlɛya ka taga Pilati sɛgɛrɛ ka Yezu suu daali a fɛ.”

A be komi Yezu sara Yusufu ɲɛɛ na. O lo kama, a kɔnna k’o lɔn Pilati ɲɛ ani a nana Yezu suu deli a fɛ. Pilati “y’a mɛn ko Yezu sara joona ten minkɛ, o y’a kabakoya.” (Mariki 15:44). A be se ka kɛ ko Yezu ɲanina fɔɔ ka taga sa gwengwe yiri kan Yusufu ɲɛɛ na. N’o lo, n’a sɔrɔ o lo ye Yusufu lasun k’a yɛrɛ sɛgɛsɛgɛ ani k’a yira ko ale ye Yezu ka kalanden ye. A ka kɛ min o min ye, Yusufu tun cɛsirinin lo ka dɔ kɛ dɔ ye. A tun tɛna kɛ Yezu ka kalanden ye dogo la tugun.

YUSUFU YE YEZU SUU DON

Yahutuw ka sariya tun b’a waajibiya ko n’u ye mɔgɔjugu dɔ faga, u ka kan k’o tigi suu don sanni tile ka ben (Deter. 21:22, 23). Nka, ni Ɔrɔmukaw tun ye mɔgɔjuguw faga, u tun ka teli k’u suu to gwengwe yiri kan u be toli yen wala u tun b’u bɛɛ sutara dingɛ kelen kɔnɔ. Nka, Yusufu tun t’a fɛ u ka Yezu kɛ ten. Yezu fagayɔrɔ gɛrɛfɛ, Yusufu tun be ni kaburu kura dɔ ye min tun sogira farakurun la. Komi mɔgɔ si suu tun ma don yen fɔlɔ, o b’a yira ko Yusufu tun bɔra Arimatea ka yɛlɛma Zeruzalɛmu, a ma mɛɛn. A tun y’o kaburu sogi walisa a ka kɛ ale n’a ka denbayamɔgɔw sudonyɔrɔ ye (Luka 23:53; Zan 19:41). Yusufu ye Yezu suu don ale yɛrɛ ka kaburu lo kɔnɔ. O tun ye ɲumanya ye dɛ! O koo fana ye kiraya kuma dɔ dafa min tun ko Yezu suu bena don “fɛntigiw” cɛma.—Ezayi 53:5, 8, 9.

Evanzili naani nunu bɛɛ b’a lakali ko tuma min na u ye Yezu suu bɔ gwengwe yiri kan, Yusufu y’a suu meleke lenfu fani kura kɔnɔ. O kɔ, a y’a suu don ale yɛrɛ ka kaburu kɔnɔ (Mat. 27:59-61; Mariki 15:46, 47; Luka 23:53, 55; Zan 19:38-40). Bibulu be mɔgɔ kelen tɔgɔ fɔ min ye Yusufu dɛmɛ. O ye Nikodɛmu lo ye. Ale nana ni tulu kasadimanw ye walisa ka Yezu suu labɛn n’o ye. Komi Yusufu ni Nikodɛmu tun ye mɔgɔbabaw ye, n’a sɔrɔ olu yɛrɛ lo ma Yezu suu ta. A be komi u ka baaradenw lo ye Yezu suu ta ani k’a sutara. Hali n’o lo, o cɛɛ fila ye min kɛ, o tun tɛ koo dennin ye. Mun na do? Sabu ni mɔgɔ tun magara suu la, o tigi nɔgɔnin tun be to tile wolonfila kɔnɔ ani n’a magara fɛɛn o fɛɛn na, o fana be nɔgɔ (Nɔnb. 19:11; Aze 2:13). O kama, Yusufu ni Nikodɛmu tun ka kan k’u mabɔ mɔgɔw la Tɛmɛnkan seli lɔgɔkun bɛɛ la ani u tun tɛ se k’u niin don o fɛti koow la (Nɔnb. 9:6). Yusufu y’a latigɛ ka Yezu suu don minkɛ, a ka baarakɛɲɔgɔnw tun be se k’a lɔgɔbɔ o kosɔn. Nka sisan kɔni, a tun labɛnnin lo ka Yezu sutara koɲuman, k’a yira bɛɛ la ko ale ye Yezu ka kalanden dɔ ye. A tun labɛnnin lo k’o kɛ, o nɔfɛkow mana kɛ min o min ye.

YUSUFU KOO MA FƆ TUGUN

Yezu sutaranin kɔ, Arimateka Yusufu koo ma fɔ yɔrɔ si tugun Bibulu kɔnɔ. O b’a to an b’an yɛrɛ ɲininga ko: “Yusufu ka koo labanna cogo di?” Tiɲɛn fɔ ka di, an t’o lɔn. Nka min fɔra ka tɛmɛ, o b’a to an be se k’a fɔ tiɲɛn na ko a y’a yira mɔgɔw la ko a ye kerecɛn ye. Kɔrɔbɔli tuma na, sanni Yusufu ka limaniya n’a ka jagwɛlɛya barika ka dɔgɔya, dɔ tora ka fara u barika kan le. O b’a yira ko a tora kantigiya la!

An minw ye Yezu ka kalandenw ye, Yusufu ka koo be ɲiningali dɔ lawuli an bɛɛ ka ɲi ka miiri min na: Yala an ka lɔyɔrɔ, an ka baara, an ka bololafɛnw, an somɔgɔw ka kanuya wala an ka hɔɔrɔnya kɔrɔtanin lo an fɛ ka tɛmɛ an ni Jehova ka jɛnɲɔgɔnya kan wa?