An ka makari “mɔgɔ bɛɛ” la

TUMA min na Yezu y’a ka kalandenw degi waajuli kɛcogo la, a y’u lasɔmi ko mɔgɔw tɛna sɔn ka kibaro diiman lamɛn tuma bɛɛ (Luka 10:3, 5, 6). An be mɔgɔ minw kunbɛn waajuli la, u dɔw be se ka fariya wala ka kuma juguw fɔ an ma. N’o ɲɔgɔn y’an sɔrɔ, a be se ka gwɛlɛya an ma ka makari o mɔgɔw la.

Mɔgɔ min be makari, ale b’a lɔn tɔɔw mako be min na ani gwɛlɛya minw b’u kan. A be hinɛ u la ani a b’a fɛ k’u dɛmɛ. An be mɔgɔ minw kunbɛn waajuli la, n’an tɛ makari u la tugun, mun lo bena kɛ do? An tɛna kisɛya waajuli la tugun. O kɔrɔ, a tɛna diya an ye ka mɔgɔw waaju ani an tɛna se k’u dɛmɛ. Nka n’an be makari, a be komi an be lɔgɔ donna tasuma na. O la, an bena to ka kisɛya kosɔbɛ waajuli la!—1 Tes. 5:19.

Hali n’a man nɔgɔ, an be se ka makari tɔɔw la cogo di? An ka ɲɛyirali saba lajɛ an ka ɲi ka minw ladegi: Jehova, Yezu ani ciden Pol.

AN KA JEHOVA KA MAKARI LADEGI

Kabi saan waa caaman, mɔgɔw be ngalonfin lara Jehova kan. O n’a ta bɛɛ, Jehova be “ɲuman kɛ ɲumanlɔnbaliw ni mɔgɔjuguw ye.” (Luka 6:35). A b’a ka ɲumanya yira a ka muɲuli sababu fɛ. Jehova b’a fɛ “mɔgɔ bɛɛ ka kisi.” (1 Tim. 2:3, 4). Tiɲɛn lo ko koo jugu ka gwo Ala ye. Nka, adamadenw koo ka gwɛlɛ a ma ani a t’a fɛ u si ka sa.—2 Piyɛri 3:9.

Minw lanin tɛ Ala la, Sutana y’u hakili dibi kosɔbɛ cogo min na, Jehova b’o kala ma (2 Kor. 4:3, 4). Tiɲɛn ma fɔ mɔgɔ caaman ye Ala koo la kabi u denmisɛn tuma. O kama, u ka miiricogo b’a to a man nɔgɔ u fɛ ka sɔn tiɲɛn ma. Nka, Jehova b’a fɛ k’o ɲɔgɔnnamɔgɔw dɛmɛ. An b’o lɔn cogo di do?

An k’a filɛ Jehova tun be Ninivukaw jati cogo min na. U ka fariyakow bɛɛ n’a ta, Jehova y’a fɔ Zonasi ye ko: “Ne fana tun man kan ka makari Ninivu la wa? Duguba nin, fɛɛn min kɔnɔ mɔgɔw ka ca ni mɔgɔ waa kɛmɛ ni mugan (120000) ye, minw t’u kinibolo lɔn ka bɔ u numanbolo la.” (Zonasi 4:11). Komi Ninivukaw tun tɛ tiɲɛn lɔn Jehova koo la, a makarila u la. O kama, a ye Zonasi ci ka taga u lasɔmi.

Mɔgɔw koo ka gwɛlɛ Jehova ma cogo min na, u koo ka gwɛlɛ an fana ma ten. I ko Jehova, an b’a fɛ k’u dɛmɛ ka tiɲɛn lɔn hali n’a b’an ɲɛɛ na k’u t’a fɛ k’an lamɛn.

AN KA YEZU KA MAKARI LADEGI

Yezu tun be makari mɔgɔw la i ko a Faa. Mɔgɔw makari ye Yezu minɛ “bari u sigɛnnin tun lo, u dusu kasinin tun lo fana. U tun be i ko sagaw, dɛndɛbaga te minw na.” (Mat. 9:36). Yezu y’a faamu fɛɛn min kama u tun be ten. U tun be o cogo la sabu u ka diinan kuntigiw tun tɛ u minɛ ka ɲɛ ani u tun tɛ u kalan tiɲɛn koo la. Yezu tun b’a lɔn ko mɔgɔ caaman tun tɛna sɔn ka kɛ ale ka kalandenw ye koo dɔw kosɔn. O bɛɛ n’a ta, a tora k’u “kalan koo caaman na.”—Mariki 4:1-9.

Ni mɔgɔw tɛ sɔn k’an lamɛn, a ka ɲi an k’a ɲini k’a lɔn fɛɛn min kama. N’a sɔrɔ u tɛ ni miiriya ɲumanw ye Bibulu ani kerecɛnw koo la. Mun na do? Sabu u y’a kɔrɔsi ko dɔw b’a fɔ k’olu ye kerecɛnw ye, u do be koo juguw kɛ. N’a sɔrɔ dɔw t’an lamɛn sabu an lanin be koo minw na, mɔgɔw ma tiɲɛn fɔ u ye o koo la. A be se ka kɛ fana ko dɔw be siran ko u somɔgɔw wala u sigiɲɔgɔnw bena u lɔgɔbɔ n’u sɔnna k’an lamɛn.

Mɔgɔ dɔw tɛ sɔn k’an lamɛn sabu kojuguba dɔw y’u sɔrɔ minw y’u hakili ɲagami. Kim ye misɔnden ye ani a ko a be yɔrɔ min na, mɔgɔ caaman bɔnɛna u ka bololafɛnw bɛɛ la kɛlɛ kosɔn. O kama, u tɛ ni jigiya foyi ye siniɲasigi koo la. U dusu kasinin lo ani u lanin tɛ mɔgɔ si la tugun. O yɔrɔ la, mɔgɔw ka teli k’a ɲini ka Jehova Seerew bali ka waajuli kɛ. Loon dɔ, mɔgɔw wulila Kim kama waajuli la.

O bɛɛ n’a ta, Kim tora ka makari a ka kiinmɔgɔw la. Mun lo y’a dɛmɛ a tora ka makari u la? A tun be to ka miiri tuma bɛɛ Talenw 19:11 ka kumaw la. A fɔra yen ko: “Hakilitigi te dimi joona.” Min y’a ka kiinmɔgɔw sɔrɔ, Kim be to ka miiri o la. O lo b’a dɛmɛ ka makari u la. Ka fara o kan, a ka kiinmɔgɔw bɛɛ lo man jugu a ma. O kiin kɔnɔ, a yɛrɛ be kɔsegi ka taga bɔ mɔgɔ dɔw ye minw b’u mako don kosɔbɛ kibaro diiman na.

An k’an yɛrɛ ɲininga ko: “N’ be mɔgɔ minw waaju, ni n’ tun b’u nɔɔ na, n’ tun bena mun lo kɛ do?” Ɲɛyirali fɛ, an tun bena mun lo kɛ ni mɔgɔw tun ye ngalon tigɛ an ye siɲɛ caaman Jehova Seerew koo la? N’a sɔrɔ an fana tun tɛna sɔn k’u lamɛn ani an mako tun bena kɛ a la u ka makari an na. Yezu ko an ka tɔɔw minɛ i n’a fɔ an b’a fɛ u k’an minɛ cogo min na. N’an be miiri o cikan na, o bena an lasun ka makari tɔɔw la hali n’a ka gwɛlɛ tuma dɔw la k’o kɛ.—Mat. 7:12.

AN KA POL KA MAKARI LADEGI

Mɔgɔ dɔw tun be ciden Pol kɛlɛ ani u tun ka fari a ma a ka waajuli baara kosɔn. O n’a ta bɛɛ, a makarila u la. Mun na do? A hakili jigira ko ale fana y’o ɲɔgɔn kɛ. A ko: “Fɔlɔfɔlɔ ne min tun b’a tɔgɔ cɛn, ka Alaɲasiranbagaw tɔɔrɔ, ani ne tun ka fari, nga o bɛɛ n’a ta a makarila ne la, bari ne ka lanabaliya ni kolɔnbaliya le kosɔn, ne tun be o kɛra.” (1 Tim. 1:13). Pol sɔnna a ma ko Jehova ni Yezu makarila ale la kosɔbɛ. Mɔgɔ minw tun b’a fɛ k’a bali ka waajuli kɛ, a tun b’u faamu sabu ale fana y’o ɲɔgɔn kɛ ka ye.

Wagati dɔw la, Pol ye mɔgɔ dɔw kunbɛn minw tun lanin be ngalon kalanw na kosɔbɛ. A ye mun lo kɛ do? Kɛwaliw 17:16 b’a fɔ ko ka Pol to Atɛni dugu la, “a ye joo caman ye” ani “a dusu cɛnna.” Nka koo min tun ye Pol dusu tiɲɛ, a basigira o yɛrɛ kan ka seereya kɛ koɲuman (Kɛw. 17:22, 23). A y’a ka waajuli kɛcogo yɛlɛma ka kɛɲɛ ni mɔgɔ sifa caaman ka koow cogoya ye walisa ‘cogo o cogo a ka se ka dɔw kisi.’—1 Kor. 9:20-23.

Ni mɔgɔw tɛ sɔn k’an lamɛn wala n’u masirinin be ngalon kalanw na, an be se ka Pol ladegi. An be min lɔn o mɔgɔw koo la, an be se ka basigi o kan k’u dɛmɛ ka sɔn “kibaru diman” na. O kibaro ɲɛsinna siniɲasigi ɲuman koo ma (Ezayi 52:7). Balimamuso dɔ tɔgɔ ko Dorothy ani a ko: “An ka kiin kɔnɔ, u y’a fɔ mɔgɔ caaman ye ko Ala ye kiritigɛla fariman ye. Ne b’o mɔgɔw tando sabu u lanin be Ala la kosɔbɛ. O kɔ, n’ b’a yira u la Bibulu kɔnɔ ko Jehova b’an kanu ani ko a ye layiduw ta siniɲasigi koo la.”

“SEE KOJUGU KƆRƆ KOƝUMAN BARIKA LA”

Ni duniɲa laban be surunyana kosɔbɛ, an be mɔgɔ minw waaju, u dɔw ka kɛwalew “bena juguya ka taga ɲa.” (2 Tim. 3:1, 13). Nka, an kana a to o b’a kɛ an tɛ makari mɔgɔw la tugun wala o k’an ka ninsɔndiya nagasi. Jehova be se ka fanga di an ma walisa an ka “see kojugu kɔrɔ koɲuman barika la.” (Ɔrɔm. 12:21). Piyɔniye dɔ tɔgɔ ko Jessica. A y’a lakali ko: “N’ ka teli ka mɔgɔ dɔw kunbɛn minw fanin b’u yɛrɛ la. U b’an lɔgɔbɔ ani an be kibaro diiman min fɔ, u b’o mafiɲɛya. O be se ka mɔgɔ dusu gwan. Ni n’ be baro kɛra ni mɔgɔ dɔ ye, n’ be Jehova deli n’ kɔnɔ a ka n’ dɛmɛ k’o tigi jati i ko ale b’a jati cogo min na. O b’a to n’ tɛ miiri n’ dusukunnakow la. Nka, n’ be miiri k’a filɛ n’ be se k’o tigi dɛmɛ cogo min na.”

An be waajuli kɛ ni balima minw ye, a ka ɲi an k’a ɲini k’u jija. Jessica ko: “Ni mɔgɔ ma sɔn k’an dɔ lamɛn, n’ be n’ jija walisa n’ kana sinsin o kan an ka baro la. Nka n’ be baro kɛ koo diiman dɔw kan i n’a fɔ an ka waajuli baara be min ɲɛ mɔgɔw ye hali ni dɔw tɛ sɔn k’an lamɛn.”

An be gwɛlɛya minw sɔrɔ an ka cidenya baara la, Jehova b’u bɛɛ kala ma. N’an b’a ka makari ladegi, o ka di a ye kosɔbɛ! (Luka 6:36). Jehova tɛna to ka makari mɔgɔw la fɔɔ abada duniɲa juguman nin kɔnɔ. An ka la a la ko a b’a lɔn a ka ɲi ka dan sigi duniɲa juguman nin na wagati tigitigi min na. Yanni o cɛ, an ka waajuli baara ye kɔrɔtɔko ye (2 Tim. 4:2). An ka to k’o cii dafa ni kisɛya ye ani ka to ka makari “mɔgɔ bɛɛ” la.